Anasuya Sister: జబర్దస్త్‌లో అక్క అనసూయ స్థానాన్ని చెల్లెలు భర్తీ చేయబోతుందా?

Anasuya Sister: టెలివిజన్ చరిత్రలో జబర్దస్త్ కామెడీ షో ఎంతటి సంచలనాన్ని సృష్టించిందో ప్రత్యేకంగా చెప్పాల్సిన అవసరం లేదు. ఈ షో ద్వారా ఎందరో కమెడియన్‌లు లైమ్‌లైట్‌లోకి వచ్చారు. ఇప్పుడు వాళ్లంతా సినిమా అవకాశాలతో మునిగి తేలుతున్నారు. అటు ఈ షోలో యాంకర్లు ఎంతో క్రేజ్ సంపాదించుకున్నారు. ముఖ్యంగా అనసూయ, రష్మీ ఎందరో అభిమానాన్ని సొంతం చేసుకున్నారు. అనసూయ యాంకర్‌గా రానంతవరకు యాంకర్ అంటే ఎంతో పద్ధతిగా ఉండాలనే భావన అందరిలోనూ ఉండేది. అనసూయ ఎప్పుడైతే జబర్దస్త్ యాంకర్‌గా అడుగుపెట్టిందో అప్పటి నుంచి తన గ్లామర్‌తో ఆమె అందరిని ఆకట్టుకుంది. పొట్టి దుస్తులతో కుర్రాళ్ల మతులను పోగొట్టింది. కేవలం యాంకర్ల కోసమే కొందరు జబర్దస్త్ షోను చూసేవాళ్లంటే అతిశయోక్తి కాదు.

Read Also: Jacqueline Fernandez: బాలీవుడ్‌ బ్యూటీ జాక్వెలిన్‌ ఫెర్నాండెజ్‌కు మధ్యంతర బెయిల్‌ పొడిగింపు

ప్రస్తుతం అనసూయకు వెండితెర అవకాశాలు ఎక్కువగా వస్తుండటంతో ఇటీవల ఆమె జబర్దస్త్ షోకు గుడ్‌బై చెప్పింది. ఆమె స్థానంలో రష్మీ మాత్రమే యాంకర్‌గా వ్యవహరిస్తోంది. గతంలో గురువారం ఎపిసోడ్‌కు అనసూయ, శుక్రవారం ఎపిసోడ్‌కు రష్మీ యాంకర్లుగా కనిపించేవాళ్లు. కానీ ఇప్పుడు రెండు ఎపిసోడ్లలోనూ యాంకర్‌గా రష్మీ మాత్రమే వస్తోంది. దీంతో అనసూయ లేని లోటు స్పష్టంగా కనిపిస్తోంది. అయితే త్వరలో అనసూయ వెలితిని తీర్చేందుకు ఆమె సోదరి వస్తోందని సోషల్ మీడియాలో ప్రచారం జరుగుతోంది. అనసూయ పోలికలతోనే ఉండే ఆమె సోదరి వైష్ణవి యాంకర్‌గా ఇండస్ట్రీకి పరిచయం కాబోతున్నట్లు టాక్ నడుస్తోంది. ప్రస్తుతానికి జీ తెలుగులో ఓ షోకు వైష్ణవి యాంకర్‌గా రానున్నట్లు తెలుస్తోంది. వైష్ణవి అక్కడ ఆకట్టుకుంటే త్వరలో జబర్దస్త్ షోకు కూడా ఆమెను తీసుకునే అవకాశాలు ఉన్నాయని అనసూయ అభిమానులు భావిస్తున్నారు. మరి అక్క అనసూయ తరహాలో వైష్ణవి ఆకట్టుకుంటుందో లేదో వేచి చూడాలి.