Breast Cancer: తేనెటీగ విషంతో క్యాన్సర్‌కు చెక్ పెట్టొచ్చా? పరిశోధనల్లో ఏం తేలింది?

Breast Cancer: బ్రెస్ట్ క్యాన్సర్ చికిత్సలో కొత్త మార్గాలు అన్వేషిస్తున్న శాస్త్రవేత్తలకు ‘‘తేనెటీగ విషం’’ రూపంలో ఓ మార్గం కనిపించింది. తేనెటీగ విషంలోని సమ్మేళనాలపై పరిశోధనలు జరుగుతున్నాయి. ఈ విషంలోని కొన్ని పదార్థాలు క్యాన్సర్ కణాలను దెబ్బతీయగలదని, వాటి పెరుగుదలను మందగించడం, వ్యాధి ఇతర భాగాలకు వ్యాపించకుండా అడ్డుకునే అవకాశాలు ఉన్నట్లు గుర్తించారు. అయితే, ఈ పరిశోధలు ప్రస్తుతానికి ప్రాథమిక దశలోనే ఉన్నాయి.

మెలిటిన్‌పై సైంటిస్టుల ఆసక్తి..

తేనెటీగ విషంలో ప్రధానం ఉండే మెలిటిన్‌ (Melittin)పై సైంటిస్టుల ఆసక్తి నెలకొంది. ఇది మొత్తం విషయంలో 40-50 శాతం వరకు ఉంటుంది. కణాల బయట పొరను దెబ్బతీసే సామర్థ్యం ఉండటంతో దీనిపై శాస్త్రవేత్తలు ప్రత్యేక దృష్టి సారించారు. 2020లో నేచర్ జర్నల్‌లో ప్రచురితమైన పరిశోధనల్లో ట్రిపుల్-నెగటివ్, HER2-ఎన్‌రిచ్డ్‌ రొమ్ము క్యాన్సర్ కణాలపై తేనెటీగ విషం, మెలిటిన్‌ ప్రభావాన్ని పరిశీలించారు. ఈ పదార్థాలు క్యాన్సర్ కణాల జీవన సామర్థ్యాన్ని తగ్గించగలవని పరిశోధకులు గుర్తించారు. మెలిటిన్ క్యాన్సర్ కణాల పెరుగుదలకు తోడ్పడే EGFR, HER2 ప్రోటీన్ల సంకేత ప్రక్రియలను కూడా ప్రభావితం చేయగలదని అధ్యయనం తెలిపింది.

60 నిమిషాల్లో 100 శాతం క్యాన్సర్ కణాల్ని నాశనం చేసిందా?

తేనెటీగ విషం 60 నిమిషాల్లో 100 శాతం బ్రెస్ట్ క్యాన్సర్ కణాలను నాశనం చేస్తుందనే వాదన ఉంది. అయితే, అధ్యయనాలు మాత్రం దీని మద్దతు ఇవ్వడం లేదు. 2020లో పరిశోధనల్లో ఒక గంట వరకు క్యాన్సర్ కణాలపై మెలిటిన్ ప్రభావాన్ని పరిశీలించారు. ట్రిపుల్-నెగటివ్ రొమ్ము క్యాన్సర్ కణాలపై 60 నిమిషాల ప్రయోగంలో, ఆలస్య దశలో కణ మరణం (late apoptosis) లేదా కణ నాశనం (necrosis)గా వర్గీకరించిన కణాల శాతం తేనెటీగ విషం ఉపయోగించిన సమూహంలో 8.3 శాతంగా ఉండగా, మెలిటిన్‌ ఉపయోగించిన సమూహంలో 23.6 శాతంగా నమోదైంది.

దీని ప్రకారం.. కణాలకు నష్టం కలగడం, వాటి జీవన సామర్థ్యం తగ్గడం, అన్ని క్యాన్సర్ కణాలు పూర్తిగా నాశనం కావడం ఈ మూడింటిని వేర్వేరు అంశాలుగా గుర్తించాలి. వీటిని మనుషుల్లో క్యాన్సర్ పూర్తిగా నయమవుతుందని చెప్పడానికి ఆధారంగా చెప్పలేం.

జంతువులపై ట్రయల్స్..

2024లో కొన్ని జంతు అధ్యయనాలను కూడా శాస్త్రవేత్తలు పరిశీలించారు. వీటిలో కణితి పెరుగుదల, క్యాన్సర్ ఇతర అవయవాలకు వ్యాపించే ప్రక్రియపై తేనెటీగ విష ప్రభావాన్ని అధ్యయనం చేశారు. ఈ ఫలితాలు ఆశాజనకంగా ఉన్నప్పటికీ, జంతవులపై కనిపించే ఫలితాలు మనుషుల్లో ఉంటాయని నిర్ధారించలేము. మనుషుల్లో దీని ప్రభావంపై మరిన్ని అధ్యయనాలు నిర్వహించాల్సి ఉంది.

రొమ్ము క్యాన్సర్‌కు ప్రస్తుత చికిత్సలు ఇవే..

ప్రస్తుతం బ్రెస్ట్ క్యాన్సర్‌కు శస్త్రచికిత్స, కీమోథెరపీ, రేడియేషన్, హార్మోన్ థెరపీ, టార్గెటెడ్ మెడిసిన్స్ వంటి చికిత్సలు ఉన్నాయి. వ్యాధి రకం, దశను బట్టి చికిత్స ఉంటుంది. తేనెటీగ విషం మాత్రం ఇంకా పరిశోధన దశల్లోనే ఉంది.