Healthy Snacks : నల్లగా మారిన అరటిపండ్లు పారేయొద్దు.. ఇలా చేస్తే అదిరిపోయే టేస్టీ డెజర్ట్స్.!

మనలో చాలామంది మార్కెట్లో కొన్న అరటిపండ్లు నల్లగా మారితే, అవి బాగా పండిపోయి లోపల కుళ్ళిపోయాయని భావించి పారేస్తుంటాము. బాగా పండిన లేదా కుళ్ళిపోయిన పండ్లను నేరుగా తినడం సురక్షితం కాకపోయినప్పటికీ, తొక్కపై నల్లటి మచ్చలు వచ్చి లోపల మెత్తగా ఉన్నంత మాత్రాన అది పాడైపోయిందని అర్థం కాదు. పండే కొద్దీ అరటిపండ్లలోని పిండిపదార్థం సహజ చక్కెరలుగా మారి మరింత తియ్యగా తయారవుతాయి. రాబోయే స్వాతంత్ర్య దినోత్సవ వేడుకల సాంస్కృతిక కార్యక్రమాల్లో లేదా పండుగ రోజుల్లో పిల్లలు, పెద్దల కోసం ఈ పండ్లతో ఎంతో రుచికరమైన, ఆరోగ్యకరమైన డెజర్ట్లు తయారు చేయవచ్చు.

పండిన అరటిపండ్లలో ఉండే పోషకాలు

రీసెర్చ్‌గేట్ పరిశోధన ప్రచురణల ప్రకారం, పండిన అరటిపండ్లలో సులభంగా జీర్ణమయ్యే కార్బోహైడ్రేట్లు, అధిక మొత్తంలో పొటాషియం (100 గ్రాములకు సుమారు 358 మి.గ్రా) , అవసరమైన పీచుపదార్థం సమృద్ధిగా లభిస్తాయి. పిండిపదార్థం సరళ చక్కెరలుగా మారే క్రమంలో వీటిలో స్వేచ్ఛా యాంటీఆక్సిడెంట్ల పరిమాణం పెరుగుతుంది. బాగా పండిన గుజ్జు , తొక్కలో ఉండే ఫినాలిక్స్, కెరోటినాయిడ్లు ఆక్సీకరణ ఒత్తిడిని , ఫ్రీ రాడికల్స్‌ను ఎదుర్కోవడంలో ప్రముఖ పాత్ర పోషిస్తాయి.

అల్పాహారం కోసం అరటిపండు పాన్‌కేక్‌లు

ఉదయం అల్పాహారంలోకి తీపిగా, ఆరోగ్యకరంగా ఏదైనా చేయాలనుకుంటే బాగా పండిన అరటిపండ్లు బెస్ట్ ఆప్షన్. ముందుగా ఒక గిన్నెలో అరటిపండ్లను మెత్తగా చేసి, దానికి పిండి, పాలు , దాల్చినచెక్క పొడిని కలిపి చిక్కటి పేస్ట్‌లా సిద్ధం చేసుకోవాలి. నాన్-స్టిక్ పాన్‌పై కొద్దిగా నెయ్యి వేడి చేసి, ఈ మిశ్రమాన్ని చిన్న పాన్‌కేక్‌ల ఆకారంలో పరచి రెండు వైపులా బంగారు గోధుమ రంగు వచ్చేవరకు కాల్చాలి. చివరగా పైన కొద్దిగా తేనె చల్లి వేడిగా తింటే తక్షణ శక్తి లభిస్తుంది.

నోరూరించే సంప్రదాయ వంటకం..

ఉత్తర భారత కుటుంబాలలో పండిన అరటిపండ్లు, గోధుమ పిండితో తయారుచేసే ‘గుల్గుల’ అనే స్వీట్ చాలా ప్రసిద్ధి చెందింది. ముందుగా బెల్లాన్ని కొద్దిగా నీటిలో కరిగించి పక్కన పెట్టుకోవాలి. ఒక గిన్నెలో మెత్తటి అరటిపండు గుజ్జు, గోధుమ పిండి, సోంపు గింజలు , బెల్లం నీటిని వేసి బాగా కలపాలి. ఈ మిశ్రమాన్ని చిన్న చిన్న ఉండలుగా నూనెలో తక్కువ మంట మీద బంగారు గోధుమ రంగు వచ్చేవరకు వేయిస్తే సాయంత్రం టీ, కాఫీలతో తినే గులాగుల సిద్ధమవుతాయి.

ఇన్స్టెంట్ ఎనర్జీ డ్రింక్.. పండిన అరటిపండు స్మూతీ

పండిన అరటిపండ్లలో సహజ చక్కెరలు ఎక్కువగా ఉంటాయి కాబట్టి ఈ స్మూతీకి అదనపు చక్కెర అవసరం లేదు. బ్లెండర్‌లో అరటిపండు ముక్కలు, చల్లని పాలు, డ్రై ఫ్రూట్స్ వేసి గ్రైండ్ చేసుకోవాలి. మరింత ఆరోగ్యకరమైన ఎంపిక కోసం ఒక చెంచా ఓట్స్ లేదా పీనట్ బటర్ కలుపుకుంటే, ఇది జిమ్‌కు వెళ్లేవారికి , పిల్లలకు అద్భుతమైన ఎనర్జీ డ్రింక్‌గా ఉపయోగపడుతుంది.

నోరూరించే అరటి హల్వా

ఇంట్లోనే తక్కువ సమయంలో డెజర్ట్ తయారుచేయడానికి అరటిపండు హల్వా చక్కటి మార్గం. అరటిపండ్లను మిక్సర్‌లో మెత్తటి పేస్ట్‌లా గ్రైండ్ చేసి పెట్టుకోవాలి. బాణలిలో నెయ్యి వేడి చేసి, బొంబాయి రవ్వ లేదా గోధుమపిండిని వేయించిన తర్వాత అందులో అరటిపండు మిశ్రమం, తగినంత చక్కెర వేసి తక్కువ మంటపై ఉడికించాలి. మిశ్రమం చిక్కబడి గిన్నె అంచులకు అంటుకోకుండా విడిపోతున్నప్పుడు యాలకుల పొడి, డ్రై ఫ్రూట్స్ కలిపితే రుచికరమైన హల్వా రెడీ అవుతుంది.