White House shooting: వాషింగ్టన్‌లో కలకలం.. వైట్ హౌస్ సమీపంలో షూటౌట్

White House shooting: అమెరికా అధ్యక్ష భవనం వైట్ హౌజ్ సమీపంలో శనివారం రాత్రి కాల్పులు చోటుచేసుకున్నాయి. ఈ ఘటనతో ఒక్కసారిగా యూఎస్ భద్రతా సిబ్బంది అలర్ట్ అయ్యారు. వాషింగ్టన్ డీసీలో జరిగిన ఈ కాల్పుల ఘటనకు పాల్పడిన నిందితుడిని సీక్రెట్ సర్వీస్ సిబ్బంది కాల్చేశారు. కాల్పులోల గాయపడిన నిందితుడిని ఆస్పత్రికి తరలించే సమయంలో మరణించారు. మరో దుండగుడు కాల్పుల్లో తీవ్రంగా గాయపడినట్లు తెలుస్తోంది. ఈ ఘటన జరిగిన సమయంలో ప్రెసిడెంట్ డొనాల్డ్ ట్రంప్ వైట్‌హౌజ్‌లోనే ఉన్నారు.

సుమారుగా 25 రౌండ్ల కాల్పులు జరిగినట్లు తెలుస్తోంది. ప్రస్తుతం పరిస్థితి అదుపులో ఉన్నట్లు అధికారులు చెప్పారు. వైట్ హౌస్‌కు ఒక బ్లాక్ దూరంలో ఉన్న 17వ వీధి,పెన్సిల్వేనియా అవెన్యూ నార్త్‌వెస్ట్ సమీపంలో కాల్పులు జరిగినట్లు తెలుస్తోంది. ఘటనపై అధికారులు స్పందిస్తున్నారని, మాకు వీలైన వెంటనే తాజా సమాచారాన్ని అందిస్తామని ఎఫ్‌బీఐ డైరెక్టర్ కాష్ పటేల్ చెప్పారు. కాల్పుల ఘటన తర్వాత వైట్ హౌజ్‌ సమీపంలో భద్రతను మరింత కట్టుదిట్టం చేశారు. భవనంపై స్నైపర్ టీమ్‌లు మోహరించాయి.