Donald Trump: రిపబ్లికన్లు ఓడితే ‘‘వీటో’’ వాడుతా.. డెమోక్రాట్లకు ట్రంప్ వార్నింగ్.!

Donald Trump: అమెరికా మధ్యంతర ఎన్నికలపై ప్రపంచంవ్యాప్తంగా ఆసక్తి ఉంది. ఈ ఎన్నికల్లో విపక్ష డెమోక్రటిక్ పార్టీ విజయం సాధించి అమెరికన్ కాంగ్రెస్‌లో ఆధిపత్యం సంపాదిస్తే, వారి బిల్లులను అడ్డుకునేందుకు తన ‘‘వీటో’’ అధికారాన్ని ఉపయోగిస్తారని అధ్యక్షుడు డొనాల్డ్ ట్రంప్ హెచ్చరికలు పంపారు. అధికార రిపబ్లికన్ పార్టీ ప్రతినిధుల సభలో లేదా సెనెట్‌లో లేదా రెండు సభల్లో మెజారిటీ కోల్పోతే తాను ‘‘మిస్టర్ వీటో’’గా మారుతానని వ్యాఖ్యానించారు.

న్యూయార్క్ పోస్ట్‌కు చెందిన మిరాండా డివైన్ నిర్వహించే ‘‘పాడ్ ఫోర్స్ వన్’’ పోడ్‌కాస్ట్‌కు ఇచ్చిన ఇంటర్వ్యూలో ట్రంప్ ఈ వ్యాఖ్యలు చేశారు. కాంగ్రెస్‌లో డెమోక్రాట్లకు ఆధిక్యత వస్తే ఎలా వ్యవహరిస్తారని ప్రశ్నించగా.. ‘‘అప్పుడు నేను మిస్టర్ వీటోగా మారుతానేమో. వాళ్లను దేశాన్ని నాశనం చేయనివ్వను’’ అని ట్రంప్ అన్నారు. డెమోక్రాట్లు పంపించే బిల్లులను తిరస్కరిస్తానని ఆయన చెప్పారు. ఇలా నెల లేదా రెండు నెలల పాటు వరసగా వీటోలు విధిస్తే, చివరకు సమయం వృథా అవుతోందని గుర్తించి డెమోక్రాట్లు చర్చలకు వస్తారని అభిప్రాయపడ్డారు. అప్పుడు ఇరు పక్షాలు ఒక ఒప్పందానికి రావచ్చని అన్నారు. చట్టాల ఆమోదం కోసం గతంలో రిపబ్లికన్లు, డెమోక్రాట్లు ఒప్పందాలు చేసుకున్నాయని గుర్తుచేశారు. అయితే, ఈ పరిస్థితి రాకూడదని, రిపబ్లికన్లే కాంగ్రెస్‌పై నియంత్రణ కొనసాగించాలని ఆయన కోరుకున్నారు.

ట్రంప్ రెండో సారి అధికారంలోకి వచ్చిన తర్వాత ఇప్పటి వరకు రెండుసార్లే వీటో అధికారం వాడారు. మొదటిసారి అధ్యక్ష పదవీ కాలంలో ఏకంగా 10 బిల్లులను వీటో చేశారు. అమెరికా చట్టసభలు ఆమోదించిన బిల్లుల్ని తిరస్కరించే అధికారమే ‘‘వీటో’’. అయితే, అమెరికా అధ్యక్షుడు వీటో చేసినప్పటికీ, రెండు చట్టసభలు కలిసి మూడింట రెండొంతుల మంది సభ్యులు మద్దతు ఇస్తే ఆ బిల్లు చట్టంగా మారుతుంది.

అమెరికాలో నవంబర్ 3న మధ్యంతర ఎన్నికలు జరగనున్నాయి. ప్రతినిధుల సభలోని మొత్తం 435 స్థానాలకు, సెనెట్‌లోని 100 స్థానాల్లో 35 స్థానాలకు ఎన్నికలు నిర్వహిస్తు్న్నారు. ప్రస్తుతం ప్రతినిధుల సభలో రిపబ్లికన్లకు స్వల్ప మెజారిటీ ఉంది. దీంతో ఈసారి సభపై తమ పట్టు పెంచుకోవాలని డెమోక్రాట్లు లక్ష్యంగా పెట్టుకున్నారు.