Ukraine: మరో భారత విద్యార్థి మృతి

ఉక్రెయిన్-రష్యా యుద్ధ జరుగుతోన్న సమయంలో ఇప్పటికే ఓ భారత విద్యార్థి మృతి చెందిన విషయం తెలిసిందే కాగా.. తాజాగా మరో విద్యార్థి ప్రాణాలు కోల్పోయాడు.. పంజాబ్​కు చెందిన చందన్ జిందాల్ అనే 22 ఏళ్ల మెడికల్ విద్యార్థి మృతిచెందాడు… అనారోగ్య సమస్యలతో చందన్‌ జిందాల్‌ కన్నుమూసినట్టు చెబుతున్నారు.. రక్త గడ్డ కట్టడంతో చందన్ జిందాల్‌ను వెంటనే సమీప ఆస్పత్రికి తరలించారు.. అక్కడ చికిత్స పొందుతూ మరణించాడు. బ్రెయిన్ స్ట్రోక్​కారణంగా అతడు మృతిచెందినట్టు జాతీయ మీడియా పేర్కొంది.. ఉక్రెయిన్‌ విన్నిత్సియాలోని విన్నిత్సియా నేషనల్‌ పైరోగవ్‌ మెమోరియల్‌ మెడికల్‌ యూనివర్సిటీలో చందన్‌ జిందాల్‌ ఎంబీబీఎస్‌ చదువుతున్నాడు.. అతడి మృతితో వారి కుటుంబంలో విషాదం నెలకొంది.

Read Also: Ukraine Russia War: ఖార్కివ్‌ అత్యవసరంగా ఖాళీ చేయండి.. భారతీయులకు కేంద్రం ఆదేశాలు

రెండు రోజుల వ్యవధిలోనే భారత్‌కు చెందిన ఇద్దరు విద్యార్థులు ప్రాణాలు కోల్పోయారు. కాగా, ఉక్రెయిన్​పై రష్యా క్షిపణి దాడిలో కర్ణటకకు చెందిన మెడికల్ విద్యార్థి నవీన్​నిన్న మృతి చెందిన విషయం తెలిసిందే.. దేశవ్యాప్తంగా ఈ ఘటన ఆందోళనలు కలిగించింది. ఈ ఘటన మరవక ముందే.. మరో విద్యార్థి మృతిచెందడం విషాదంగా మారింది. మరోవైపు ఉక్రెయిన్ లో భారత విద్యార్థి మృతిపై రష్యా స్పందించింది. విద్యార్థి నవీన్ మృతిపై దర్యాప్తు చేపట్టింది. ఈ మేరకు భారత్ లోని రష్యా రాయబారి ఈ విషయాన్ని వెల్లడించారు. ఇక, ఖార్కివ్‌లోని భారతీయులకు కేంద్రం అత్యవసర ఆదేశాలు జారీ చేసింది.. యుద్ధభూమి ఖార్కివ్‌ను తక్షణం వీడాలని స్పష్టం చేసింది ఉక్రెయిన్‌లోని భారత రాయబార కార్యాలయం.. ఖార్కివ్‌లోని భారతీయులకు ఇండియన్ ఎంబసీ ఈ కీలక సూచనలు చేసిన విషయం విదితమే.