బ్రిటన్లో 23 ఏళ్లుగా కొనసాగిన విడాకుల కేసులో భారత సంతతికి చెందిన మహిళకు భారీ విజయం లభించింది. కోర్టు ఆమెకు 6.6 మిలియన్ పౌండ్లు (సుమారు రూ.85 కోట్లు) చెల్లించాలని తీర్పు ఇవ్వడంతో, యూకే న్యాయ చరిత్రలో అత్యంత సుదీర్ఘ విడాకుల కేసుల్లో ఒకటిగా నిలిచిన ఈ వివాదానికి ముగింపు లభించింది.
2002లో ప్రారంభమైన కేసు
వర్షా గోహిల్ అనే మహిళ 2002లో తన భర్త భద్రేష్ గోహిల్పై విడాకుల కోసం దరఖాస్తు చేశారు. భర్త వివాహేతర సంబంధాలు, అనుచిత ప్రవర్తన కారణంగా ఆమె ఈ నిర్ణయం తీసుకున్నారు. ఆ సమయంలో ఇరు పక్షాలు ఒక ఆర్థిక ఒప్పందానికి వచ్చాయి. దాని ప్రకారం వర్షా గోహిల్కు 2.7 లక్షల పౌండ్లు (సుమారు రూ.3.5 కోట్లు), కుటుంబానికి చెందిన కారును ఇచ్చారు. అయితే తన భర్త ఆస్తుల వివరాలను పూర్తిగా వెల్లడించలేదనే అనుమానం ఆమెకు అప్పటి నుంచే ఉండేది.
మనీలాండరింగ్ కేసుతో బయటపడిన ఆస్తులు
కొన్ని సంవత్సరాల తర్వాత భద్రేష్ గోహిల్ భారీ మనీలాండరింగ్ కేసులో చిక్కుకున్నారు. నైజీరియాకు చెందిన మాజీ గవర్నర్ జేమ్స్ ఇబోరి అనుచరులతో సంబంధాలున్న ఆర్థిక అక్రమాల్లో ఆయన పాత్ర ఉందని అధికారులు గుర్తించారు. దర్యాప్తులో భద్రేష్ గోహిల్ విదేశీ కంపెనీలు, ఇతర మార్గాల ద్వారా కోట్లాది పౌండ్ల ఆస్తులను దాచిపెట్టినట్లు బయటపడింది. అనంతరం మనీలాండరింగ్, ఫోర్జరీ, మోసపూరిత కుట్ర కేసుల్లో దోషిగా తేలడంతో ఆయనకు 10 ఏళ్ల జైలు శిక్ష విధించారు.
సుప్రీంకోర్టు వరకు వెళ్లిన వివాదం
భర్త తన ఆస్తులను పూర్తిగా వెల్లడించలేదని వర్షా గోహిల్ వాదిస్తూ అసలు ఒప్పందాన్ని రద్దు చేయాలని కోర్టును ఆశ్రయించారు. ఈ కేసు చివరకు యూకే సుప్రీంకోర్టు వరకు వెళ్లింది. 2015లో సుప్రీంకోర్టు కీలక తీర్పు ఇస్తూ, విడాకుల సమయంలో ఆస్తులను దాచిపెట్టిన వ్యక్తి ఆ తప్పిదం వల్ల లాభపడకూడదని స్పష్టం చేసింది. దీంతో కేసును తిరిగి విచారించేందుకు మార్గం సుగమమైంది.
రూ.85 కోట్ల పరిహారం
తాజాగా హైకోర్టు విచారణలో భద్రేష్ గోహిల్కు చెందిన కొన్ని ఆస్తులు చట్టబద్ధమైనవేనని గుర్తించింది. వాటిలో వర్షా గోహిల్కు హక్కు ఉందని నిర్ణయిస్తూ 6.6 మిలియన్ పౌండ్లు (సుమారు రూ.85 కోట్లు) చెల్లించాలని ఆదేశించింది. భద్రేష్ గోహిల్ ప్రవర్తనను కోర్టు తీవ్రంగా విమర్శిస్తూ, ఆయనను “పూర్తిగా నిజాయితీ లేని వ్యక్తి”గా అభివర్ణించింది. అనంతరం యూకే అప్పీల్ కోర్టు కూడా ఇకపై ఎలాంటి అప్పీల్స్కు అవకాశం లేదని స్పష్టం చేయడంతో 23 ఏళ్ల న్యాయపోరాటానికి తెరపడింది.