Viveka Murder Case: వివేకా కేసులో సునీల్ యాదవ్ సంచలన వాంగ్మూలం..!

Viveka Murder Case: మాజీ మంత్రి వైఎస్ వివేకానందరెడ్డి హత్య కేసులో నిందితుడు సునీల్ యాదవ్‌ను ఎన్‌ఫోర్స్‌మెంట్ డైరెక్టరేట్ (ఈడీ) నిర్వహించిన విచారణ ముగిసింది. రెండో రోజు దాదాపు నాలుగు గంటల పాటు సుదీర్ఘంగా సాగిన ఈ విచారణలో ఈడీ అధికారులు సునీల్ యాదవ్‌ను పలు కీలక అంశాలపై క్షుణ్ణంగా ప్రశ్నించారు. ప్రధానంగా హత్య వెనుక ఉన్న ఆర్థిక లావాదేవీలు, సుమారు రూ. 40 కోట్ల ఫండింగ్ వ్యవహారాలు, ఫోన్ కాల్స్ , డిజిటల్ ఆధారాలపై అధికారులు ప్రత్యేకంగా దృష్టి సారించారు.

గూగుల్ టెక్ అవుట్ ఆధారాలు.. నిందితుల కాల్ డేటాపై ఆరా

విచారణ సందర్భంగా కేసులో ఏ1 నిందితుడు ఎర్ర గంగిరెడ్డి, ఏ3 నిందితుడు ఉమాశంకర్ రెడ్డిలతో సునీల్ యాదవ్ జరిపిన ఫోన్ సంభాషణలపై ఈడీ అధికారులు తీవ్రస్థాయిలో ప్రశ్నించారు. ముఖ్యంగా ఉమాశంకర్ రెడ్డితో తరచూ మాట్లాడిన కాల్ డేటా రికార్డులను ఆయన ముందు ఉంచి వివరాలు సేకరించారు. అంతేకాకుండా, సాంకేతిక సాక్ష్యాలైన ‘గూగుల్ టెక్ అవుట్’ (Google Takeout) వివరాలను సునీల్ యాదవ్ ముందు ఉంచి, వివేకా హత్య జరిగిన సమయంలో ఆయన కదలికలు, లొకేషన్ హిస్టరీపై నిలదీశారు.

హత్య సమయంలో ఇంట్లోనే ఉన్నా..  

ఈడీ విచారణ సందర్భంగా సునీల్ యాదవ్ సంచలన వాంగ్మూలం ఇచ్చారు. వివేకానందరెడ్డి హత్య జరిగిన సమయంలో తాను స్వగృహంలోనే ఉన్నానని అధికారులకు తెలిపారు. అదే సమయంలో, తనకు వైఎస్సార్‌సీపీకి చెందిన కొందరు నాయకుల నుంచి  ప్రాణహాని ఉందని ఈడీకి ఇచ్చిన వాంగ్మూలంలో పేర్కొనడం రాజకీయ వర్గాల్లో చర్చనీయాంశంగా మారింది. హత్య వెనుక సాగిన ఆర్థిక లావాదేవీల నెట్‌వర్క్‌ను ఛేదించేందుకు ఈడీ అధికారులు సేకరించిన ఆధారాల ఆధారంగా దర్యాప్తును మరింత వేగవంతం చేశారు.