Visakha Steel Plant: విశాఖ స్టీల్‌ ప్లాంట్‌ దుర్ఘటన.. మరొకరి మృతి..!

Visakha Steel Plant: విశాఖపట్నం ఉక్కు కర్మాగారం (స్టీల్ ప్లాంట్)లో జరిగిన భారీ ప్రమాదంలో గాయపడి ఆసుపత్రిలో ప్రాణాలతో పోరాడుతున్న మరో కార్మికుడు కన్నుమూశారు. ప్రమాద తీవ్రతకు గురై తీవ్ర గాయాలతో చికిత్స పొందుతున్న సూరిబాబు అనే కార్మికుడు పరిస్థితి విషమించడంతో మరణించారు. దీంతో ఈ ఘోర ప్రమాదంలో ప్రాణాలు కోల్పోయిన వారి మొత్తం సంఖ్య 10కి చేరుకుంది.

80 శాతం గాయాలతో కన్నుమూత

ప్రమాదం జరిగిన సమయంలో ఉక్కు కరుగుతున్న వేడి ద్రవం (మోల్టెన్ స్టీల్) సూరిబాబు శరీరంపై పడటంతో ఆయనకు దాదాపు 80 శాతానికి పైగా తీవ్రమైన కాలిన గాయాలయ్యాయి. అత్యంత క్లిష్టమైన పరిస్థితుల్లో వైద్యులు ఆయనకు అత్యవసర చికిత్స అందించినప్పటికీ ఫలితం లేకపోయింది. సూరిబాబు పెదగంటాడ మండలం, సీతానగరం గ్రామానికి చెందిన వ్యక్తిగా గుర్తించారు. ఆయన మరణవార్త తెలియడంతో సీతానగరం గ్రామంలో తీవ్ర విషాద ఛాయలు అలముకున్నాయి. బాధితుడి కుటుంబ సభ్యులు, బంధువులు కన్నీరుమున్నీరుగా విలపిస్తున్నారు.

ఆసుపత్రుల్లో నలుగురికి చికిత్స

ఈ ప్రమాదంలో గాయపడిన మిగిలిన నలుగురు కార్మికులు ప్రస్తుతం నగరంలోని వివిధ కార్పొరేట్ ఆసుపత్రుల్లో చికిత్స పొందుతున్నారు. వీరిలో ఒకరు సెవెన్ హిల్స్ ఆసుపత్రిలో చికిత్స పొందుతుండగా, మరో ముగ్గురు శీలానగర్‌లోని కిమ్స్ ఆసుపత్రిలో వైద్యుల పర్యవేక్షణలో ఉన్నారు. వీరి ఆరోగ్య పరిస్థితిని వైద్య బృందం నిరంతరం సమీక్షిస్తోంది.

స్టీల్ ప్లాంట్ హిస్టరీలోనే అత్యంత దారుణమైన ఈ పారిశ్రామిక ప్రమాదం కార్మిక లోకాన్ని తీవ్ర దిగ్భ్రాంతికి గురిచేసింది. యాజమాన్యం , ప్రభుత్వం బాధితులకు పూర్తి స్థాయిలో అండగా నిలవాలని కార్మిక సంఘాలు డిమాండ్ చేస్తున్నాయి.