గిట్టుబాటు ధర రాలేదని.. ఉల్లిగడ్డలకు నిప్పు పెట్టిన అన్నదాత

సాధారణంగా ఉల్లిగడ్డలు తరిగేటప్పుడు కన్నీరు వస్తుంది. కానీ తరగకుండానే రైతులకు ఉల్లిగడ్డలు కన్నీరు పెట్టిస్తున్నాయి. బహిరంగ మార్కెట్‌లో ఒక్కసారిగా ఉల్లిపాయల ధరలు పడిపోవడంతో అన్నదాతలు లబోదిబోమంటున్నారు. తాము పండించిన పంటకు గిట్టుబాటు ధర రాకపోవడంతో ఉల్లి రైతులు ఆగ్రహం వ్యక్తం చేస్తున్నారు. ఈ నేపథ్యంలో కర్నూలు జిల్లాలో ఉల్లి రైతులు ఆందోళనకు దిగారు.

Read Also: ఇద్దరు టీడీపీ నేతలను సస్పెండ్ చేసిన చంద్రబాబు

శనివారం రోజు కర్నూలు జిల్లా పంచలింగాలకు చెందిన వెంకటేశ్వర్లు అనే రైతు తాను పండించిన ఉల్లి పంటను విక్రయించేందుకు కర్నూలు వ్యవసాయ మార్కెట్‌కు తీసుకువచ్చాడు. ఈ-నామ్ పద్ధతిలో క్వింటాల్ ఉల్లికి రూ.350 మాత్రమే రావడంతో అన్నదాతల ఆగ్రహం కట్టలు తెంచుకుంది. తమకు ఆ ధర ఏ మాత్రం గిట్టుబాటు కాదని.. ఎండ అనక.. వాన అనక.. ఎంతో కష్టపడి పండించిన పంటకు కేవలం రూ.350 మాత్రమే రావడాన్ని జీర్ణించుకోలేని రైతు వెంకటేశ్వర్లు తాను తెచ్చిన ఉల్లిబస్తాలపై పెట్రోల్ పోసి నిప్పంటించాడు. అయితే ఈ ఘ‌ట‌న‌పై మార్కెటింగ్‌శాఖ అధికారులు స్పందించి… క్వింటాల్‌కు రూ.700 ఇప్పిస్తామ‌ని ప్రకటించడంతో రైతులు శాంతించారు.