Gudivada Amarnath: పవన్ కళ్యాణ్, నాదెండ్ల మనోహర్ భార్యాభర్తల్లా తిరుగుతున్నారు

Gudivada Amarnath: విశాఖలో ఈనెల 15న పవన్ కళ్యాణ్ పర్యటిస్తున్న నేపథ్యంలో అధికార వైసీపీ, జనసేన నేతల మధ్య మాటల యుద్ధం చోటు చేసుకుంటోంది. ఈ సందర్భంగా జనసేన అధినేత పవన్ కళ్యాణ్‌పై మంత్రి గుడివాడ అమర్నాథ్ సంచలన వ్యాఖ్యలు చేశారు. తనకు చీరలు, గాజులు పెట్టి పంపిస్తామన్న జనసేన నేతల వ్యాఖ్యలపై మంత్రి అమర్నాథ్ స్పందిస్తూ.. పవన్ కళ్యాణ్ దగ్గర చీరలు, గాజులు బోలెడన్నీ మిగిలిపోయాయని.. అందుకే వాటిని ఏం చేయాలో తెలియడం లేదని చురకలు అంటించారు. పవన్ కళ్యాణ్, నాదెండ్ల మనోహర్ భార్యాభర్తలు తరహాలో తిరుగుతున్నారని.. వైసీపీ నేతలకు చీరలు ఇచ్చే బదులు భార్యాభర్తలుగా కలిసి తిరుగుతున్నందున ముందుగా మనోహర్‌కు చీర కడితే బాగుంటుందని తమ అభిప్రాయంగా మంత్రి గుడివాడ అమర్నాథ్ సెటైర్లు వేశారు.

తాము చేపట్టిన విశాఖ గర్జన కార్యక్రమం ఫెయిల్ చేసేందుకే ఈనెల 15న పవన్ కళ్యాణ్ జనవాణి కార్యక్రమాన్ని పెట్టుకున్నారని మంత్రి గుడివాడ అమర్నాథ్ ఆరోపించారు. రేపు నాన్ పొలిటికల్ జేఏసీ ఇచ్చిన విశాఖ గర్జనకు వైసీపీ పూర్తి మద్దతు తెలుపుతుందన్నారు. విశాఖ గర్జన ర్యాలీలో లక్షలాది మంది పాల్గొంటారని ఇంటలిజెన్స్ రిపోర్ట్ ఉందన్నారు. వెనుకబడిన ఉత్తరాంధ్రకు రాజధాని కావాలని ప్రజలు కోరుకుంటున్నట్లు మంత్రి అమర్నాథ్ స్పష్టం చేశారు.

మరోవైపు మంత్రి విడదల రజినీ కూడా విశాఖ గర్జనపై స్పందించారు. ఎండొచ్చినా, వానొచ్చినా విశాఖ గర్జన విజయవంతం కావడం ఖాయమని ఆమె అభిప్రాయపడ్డారు. చంద్రబాబు అండ్ కో ఎన్ని కుట్రలు చేసినా పరిపాలన వికేంద్రీకరణను ప్రజలు కోరుకుంటున్నారని మంత్రి విడదల రజినీ స్పష్టం చేశారు. అభివృద్ధి జరిగితే రాజకీయ ఉనికి కోల్పోతారని చంద్రబాబు భయపడుతున్నారని చురకలు అంటించారు. ఉత్తరాంధ్ర అభివృద్ధి కాంక్షించే ప్రజలందరూ సీఎం జగన్ మోహన్ రెడ్డికి మద్దతుగా నిలుస్తున్నారని ఆమె తెలిపారు.