Pawan Kalyan : గోదావరి పుష్కరాలకు పవన్ మాస్టర్ ప్లాన్.. 268 మోడల్ పంచాయతీలు సిద్ధం.!

Pawan Kalyan : రాబోయే గోదావరి పుష్కరాలను అత్యంత వైభవంగా, పర్యావరణహితంగా నిర్వహించడానికి ఆంధ్రప్రదేశ్ ప్రభుత్వం భారీ ప్రణాళికలను సిద్ధం చేస్తోంది. దీనిలో భాగంగా గోదావరి మోడల్ పుష్కర్ పంచాయతీ ప్రణాళికపై ఉప ముఖ్యమంత్రి పవన్ కళ్యాణ్ ఉన్నతాధికారులతో ప్రత్యేక సమీక్షా సమావేశాన్ని నిర్వహించారు. కాలుష్య రహిత గోదావరి పుష్కరాల నిర్వహణే ప్రభుత్వ ప్రధాన లక్ష్యమని, పవిత్రమైన గోదావరి నదిలోకి పంచాయతీల నుండి చుక్క మురుగు నీరు కూడా కలవకూడదని ఆయన అధికారులను ఆదేశించారు. జీరో లిక్విడ్ డిశ్చార్జి (వ్యర్థ జలాలు నదిలోకి విడుదల కాని) పంచాయతీల ఏర్పాటుతో గోదావరి పుష్కరాలకు మరింత శోభ రానుందని ఆయన ఆశాభావం వ్యక్తం చేశారు.

268 మోడల్ పంచాయతీలు.. మ్యాజిక్ డ్రెయిన్లతో శాశ్వత పరిష్కారం

గోదావరి పుష్కరాల కోసం ప్రభుత్వం ఒక సమగ్రమైన వ్యూహాన్ని అమలు చేయబోతోంది. దీనిలో భాగంగా పుష్కర పరిసరాల్లోని 268 గ్రామ పంచాయతీలను మోడల్ పంచాయతీలుగా తీర్చిదిద్దాలని ప్రభుత్వం నిర్ణయించింది. ఈ గ్రామాల నుండి మురుగు నీరు నదిలోకి కలవకుండా నిరోధించడానికి ప్రతి పంచాయతీకి ఒక ప్రత్యేక కార్యాచరణ ప్రణాళిక అవసరమని ఉప ముఖ్యమంత్రి స్పష్టం చేశారు. గతంలో పెదపెంకి వంటి గ్రామాలలో మంచి ఫలితాలను ఇచ్చిన మ్యాజిక్ డ్రెయిన్ల విధానాన్ని ఇక్కడ కూడా ఉపయోగించి, మురుగు నీటి సమస్యకు శాశ్వత పరిష్కారం చూపాలని అధికారులను ఆదేశించారు.

మునికూడలి ఘాట్‌కు ‘సప్తర్షి పుష్కర్ ఘాట్’గా నామకరణం

ఈ పుష్కరాలలో మునికూడలి పుష్కర ఘాట్‌ను ఒక ప్రతిష్టాత్మకమైన జాతీయ స్థాయి నమూనాగా తీర్చిదిద్దాలని ప్రభుత్వం ప్రణాళికలు రచిస్తోంది. ఈ ఘాట్‌కు ‘సప్తర్షి పుష్కర్ ఘాట్’గా కొత్త నామకరణం చేస్తున్నట్లు ఉప ముఖ్యమంత్రి ప్రకటించారు. దేశంలోనే మొట్టమొదటి జీరో లిక్విడ్ డిశ్చార్జి పంచాయతీగా మునికూడలిని నిలపడమే తమ సంకల్పమని ఆయన పేర్కొన్నారు. ఈ ఘాట్ వద్ద ఒకేసారి 75 వేల మంది భక్తులు ఎటువంటి ఇబ్బంది లేకుండా పుష్కర స్నానం చేసేలా భారీ ఏర్పాట్లు చేయనున్నారు.

సమన్వయంతో పనులు.. భక్తులకు మౌలిక వసతులు

పుష్కర ఘాట్లు, పుష్కర నగర్లలో భక్తుల రద్దీకి అనుగుణంగా మౌలిక వసతుల కల్పనపై ప్రభుత్వం ప్రత్యేక దృష్టి సారించింది. ఘాట్ల విస్తరణతో పాటు వాహనాల నిలుపుదల (పార్కింగ్), వీధి దీపాలు, దుస్తులు మార్చుకునే గదులు (డ్రెస్సింగ్ రూమ్స్), రోడ్లు , డ్రెయినేజీల ఆధునీకరణ పనులను ముందస్తుగానే పూర్తి చేయనున్నారు. వాహనాల నిలుపుదల స్థలాల కోసం స్థానిక రైతుల సహకారాన్ని తీసుకోనున్నారు. ఈ పద్ధతిలో రైతులకు కూడా లబ్ధి చేకూర్చేలా, అక్కడ వచ్చే ఆదాయంలో వారికి తగిన వాటా కల్పించే యోచనలో ప్రభుత్వం ఉంది.

దీనితో పాటు దేవాదాయ శాఖతో సమన్వయం చేసుకుంటూ ప్రధాన ఘాట్లలో ప్రత్యేకంగా ‘గోదావరి హారతి’ ఇచ్చేందుకు ఏర్పాట్లు చేయాలని పవన్ కళ్యాణ్ సూచించారు. ఈ ప్రాంతంలోని ప్రసిద్ధ పుణ్యక్షేత్రాలైన సోమేశ్వరాలయం, వేణుగోపాల స్వామి ఆలయాల ఆధునీకరణ పనులను కూడా వేగవంతం చేయనున్నారు. రాబోయే క్యాబినెట్ సమావేశం ముగిసిన వెంటనే తాను స్వయంగా మునికూడలి ఘాట్‌ను సందర్శించి పనుల పురోగతిని పరిశీలిస్తానని డిప్యూటీ సీఎం తెలిపారు. పుష్కరాల నిర్వహణను అత్యంత ప్రతిష్టాత్మకంగా తీసుకుని, ప్రభుత్వానికి మంచి పేరు తీసుకువచ్చేలా అధికారులు బాధ్యతాయుతంగా పనిచేయాలని ఆయన పిలుపునిచ్చారు.