Rama Nandana: “మొగుడిని బాత్‌రూమ్‌లో దాచేది”.. యూట్యూబర్ రమానందన స్కామ్‌లో సంచలన నిజాలు..

YouTuber Rama Nandana: సోషల్ మీడియాలో వేలల్లో ఫాలోవర్స్.. నోరు తెరిస్తే చాలు విదేశీ ముచ్చట్లు చెప్పే యూట్యూబర్ రమానందన, ఆమె భర్త మధుకర్ దంపతుల లగ్జరీ లైఫ్‌స్టైల్ వెనుక అమాయకులను ముంచేసే పెద్ద స్కెచ్ ఉందనే నిజం ఇటీవల ఆలస్యంగా వెలుగులోకి వచ్చింది. వీరి మోసాల భాగోతం తెలుగు రాష్ట్రాల్లో సంచలనం సృష్టించిన విషయం తెలిసిందే. ఫేక్ వీసాలు, విదేశాల్లో ఉద్యోగాల పేరుతో ఈ జంట పలువురిని బురిడీ కొట్టించినట్లు ఇప్పటికే విజయవాడ, ఇబ్రాహీంపట్నంతో పాటు బాపట్ల జిల్లా అద్దంకి పోలీస్ స్టేషన్లలో కేసులు నమోదైన సంగతి విధితమే. తాజాగా తమిళనాడుకు చెందిన మరో బాధితుడు సామాజిక మాధ్యమాల్లో విడుదల చేసిన వీడియో ద్వారా వీరి లీలలను బయటపెట్టాడు.

యూకేలో ఉద్యోగం ఇప్పిస్తామని నమ్మించడంతో తాను ‘నందూస్ కిచెన్’లో మూడేళ్ల స్పాన్సర్‌షిప్ కోసం భారీ మొత్తంలో డబ్బులు చెల్లించినట్లు బాధితుడు తెలిపాడు. తీరా అక్కడికి వెళ్లి ఉద్యోగంలో చేరిన ఏడాదికే నిబంధనల ఉల్లంఘన కారణంగా రెస్టారెంట్‌ను మూసివేశారని, గడిచిన కొన్ని నెలలుగా జీతాలు కూడా ఇవ్వకుండా తీవ్రంగా వేధించారని ఆరోపించాడు. విదేశీ కలలతో వచ్చిన తనలాంటి ఎంతో మంది యువకులు డబ్బుతో పాటు అమూల్యమైన సమయాన్ని కోల్పోయి రోడ్డున పడ్డారని ఆవేదన వ్యక్తం చేశాడు. బాధితులు కష్టపడి సంపాదించిన డబ్బులు అడిగేందుకు వస్తే ఇంటికి రమానందన్ తన భర్త మధుకర్‌ను బాత్‌రూమ్‌లో దాచిపెట్టేదని సంచలన ఆరోపణ చేశాడు. ఏపీ, తెలంగాణ రాష్ట్రాల పోలీసులు తక్షణమే స్పందించి బాధితులకు న్యాయం చేయాలని, వీరిపై కఠిన చర్యలు తీసుకోవాలని ఆ బాధితుడు విజ్ఞప్తి చేశాడు.