Andhra Pradesh: సీఎం జగన్‌ను కలిసిన ఏటీసీ టైర్స్ కంపెనీ ప్రతినిధులు

అమరావతిలోని తాడేపల్లి సీఎం క్యాంప్ కార్యాలయంలో ముఖ్యమంత్రి జగన్‌ను ఏటీసీ టైర్స్ కంపెనీ ప్రతినిధులు మర్యాదపూర్వకంగా కలిశారు. ఈ సందర్భంగా తమ ప్లాంట్ ప్రారంభోత్సవానికి రావాలని సీఎం జగన్‌ను ఏటీసీ టైర్స్ డైరెక్టర్ తోషియో ఫుజివారా, కంపెనీ ప్రతినిధులు ఆహ్వానించారు. ఈ సమావేశంలో పరిశ్రమల శాఖ మంత్రి గుడివాడ అమర్‌నాథ్ కూడా పాల్గొన్నారు. విశాఖపట్నం అచ్యుతాపురం వద్ద ఏపీఐఐసీ కేటాయించిన భూమిలో ఏటీసీ టైర్స్ ఏపీ ప్రైవేట్ లిమిటెడ్ నూతన ప్లాంట్‌ను ఏర్పాటు చేసింది. ఈ మేరకు ఈ ఏడాది ఆగస్టులో నూతన ప్లాంట్‌ను ప్రారంభించేందుకు కంపెనీ సన్నాహాలు చేపట్టింది.

కాగా ఏటీసీ ది యోకోహామా రబ్బర్‌ కో లిమిటెడ్ జపాన్‌కు పూర్తిగా అనుబంధ సంస్ధ. ఏటీసీ, ఏటీసీ అనుబంధ కంపెనీలు సంయుక్తంగా అలయెన్స్‌ టైర్‌ గ్రూప్‌ (ఏటీజీ)గా ఏర్పడ్డాయి. ఆఫ్‌ హైవే టైర్ల (ఓహెచ్‌టీ) వ్యాపారంలో ప్రపంచంలో ఏటీజీ ప్రముఖ సంస్థగా ప్రసిద్ధి పొందింది. ఆరు ఖండాల్లోని 120 దేశాలలో ఏటీజీ వ్యాపారాలు కొనసాగుతున్నాయి. ఏటీసీ భారతదేశంలో రెండు తయారీ ప్లాంట్లను కలిగి ఉంది. ఇందులో ఒకటి తిరునెల్వేలి (తమిళనాడు), మరొకటి దహేజ్‌ (గుజరాత్‌). అంతేకాకుండా ఏపీలోని విశాఖపట్నం అచ్యుతాపురం వద్ద రూ. 1,750 కోట్లతో ప్లాంట్‌ ఏర్పాటు చేసింది. ప్రారంభంలో రోజుకు 135 మెట్రిక్‌ టన్నుల ప్రొడక్షన్‌ కెపాసిటీని ఏటీసీ సంస్థ కలిగి ఉంటుంది. ఈ ప్లాంట్ ద్వారా 2 వేల మందికి ఉద్యోగావకాశాలు లభించనున్నాయి.