‘ఎస్పీ మ్యూజిక్’ వచ్చేస్తోంది!

గత కొన్ని రోజులుగా సురేశ్ ప్రొడక్షన్స్ సంస్థ మ్యూజిక్ రంగంలోకి అడుగుపెడుతోందనే వార్త సోషల్ మీడియాలో చక్కర్లు కొడుతోంది. అందులో నూరు శాతం వాస్తవం ఉందని సురేశ్ ప్రొడక్షన్స్ అధినేత, ప్రముఖ నిర్మాత డి. సురేశ్ బాబు ప్రకటించారు.
”1964లో డా. రామానాయుడుచే స్థాపించ‌బ‌డిన సురేష్ ప్రొడ‌క్ష‌న్స్ సంస్థ జాతీయ సినిమాకు 50 ఏళ్ళకు పైగా సహకారం అందించిన భారతదేశపు అతిపెద్ద చిత్ర నిర్మాణ సంస్థలలో ఒకటిగా అవతరించిన విషయం తెలిసిందే. ఎక్కువ సంఖ్యలో భారతీయ భాషల్లో సినిమాలు తీసిన ఘనత కూడా ఈ సంస్థకు ఉంది. సురేష్ ప్రొడక్షన్స్ సినిమాల నిర్మాణమే కాకుండా తెలుగు రాష్ట్రాల్లో డిస్ట్రిబ్యూషన్ కూడా చేస్తోంది. దశాబ్దాలుగా పరిశ్రమ అభివృద్దికి తోడ్పాటు ప‌డిన అగ్రశ్రేణి ప్రొడక్షన్ హౌస్ ఇప్పటికీ కొత్త ప్రతిభను ప్రోత్సహించే అన్ని రకాల బడ్జెట్ల చిత్రాలను నిర్మిస్తోంది. ఇప్పుడు ‘ఎస్పీ మ్యూజిక్’ అనే కొత్త మ్యూజిక్ లేబుల్‌ను ప్రారంభించి సంగీత పరిశ్రమలోకి అడుగుపెట్టింది సురేష్ ప్రొడక్షన్స్ సంస్థ‌” అని సురేశ్ బాబు తెలిపారు.

‘మ్యూజిక్ అనేది మన సినిమాలకు హృదయం లాంటిదని, అందుకే దాన్ని సొంతంగా సెల‌బ్రేట్ చేసుకోవాల్సిన‌ అవసరాన్ని తాము గుర్తించామ’ని అన్నారు సురేశ్ బాబు. ‘సురేష్ ప్రొడక్షన్స్ యొక్క వారసత్వాన్ని ముందుకు తీసుకువెళుతున్న ‘ఎస్.పి. మ్యూజిక్’ లేబుల్ మంచి సంగీతాన్ని ప్రొడ్యూస్ చేయడానికి ఒక వేదికగా ఉపయోగపడుతుందని, అలాగే సంగీత శక్తి కేంద్రంగా మారడం లక్ష్యంగా పెట్టుకున్నామ’ని సురేశ్ బాబు చెప్పారు.