Weather Update : తెలంగాణకు బ్రేక్ ఇచ్చిన రుతుపవనాలు.. మళ్లీ వానల జోరు ఎప్పుడంటే.?

Weather Update : తెలంగాణలో నైరుతి రుతుపవనాల కదలికలు కాస్త నెమ్మదించాయి. ఈ రోజు ఇవి దక్షిణ తెలంగాణ, హైదరాబాద్ పరిసర ప్రాంతాల వద్దే నిలిచిపోయే అవకాశం ఉంది. కనీసం జూన్ 17 వరకు ఉత్తర, ఈశాన్య తెలంగాణ వైపునకు ఇవి ముందుకు కదిలే సూచనలు చాలా తక్కువగా ఉన్నాయని వాతావరణ నిపుణులు చెబుతున్నారు. రుతుపవనాలు బలహీనపడటం వల్ల రాబోయే రోజుల్లో రాష్ట్రంలో ఎండ తీవ్రతతో పాటు ఉక్కపోత కూడా పెరగనుంది. అయితే, ఈ ఎండల వేడి కారణంగా అక్కడక్కడా స్థానికంగా మేఘాలు ఏర్పడి, ఉరుములు మెరుపులతో కూడిన చెదురుమొదురు వర్షాలు పడే అవకాశం ఉంది.

 

ఎండలతో ఇబ్బంది పడుతున్న జనానికి జూన్ 18 తర్వాత వాతావరణం చల్లబడి ఊరట లభించనుంది. ఆ సమయంలో బంగాళాఖాతంలో ఒక అల్పపీడనం ఏర్పడే అవకాశం ఉన్నట్లు తెలుస్తోంది. దీని ప్రభావంతో జూన్ 19 నుండి 23 మధ్య తెలంగాణలోని చాలా ప్రాంతాల్లో రుతుపవనాలు మళ్లీ పుంజుకుని, విస్తారంగా వర్షాలు కురిసే అవకాశం ఉంది. కాబట్టి వచ్చే వారంలో రాష్ట్రవ్యాప్తంగా వానలు జోరందుకుంటాయని వాతావరణ శాఖ అంచనా వేస్తోంది.