మద్యం షాపుల కేటాయింపుల్లోనూ రిజర్వేషన్లు కల్పిస్తూ నిర్ణయం తీసుకుంది తెలంగాణ ప్రభుత్వం.. గౌడ్, ఎస్సీ, ఎస్టీలకు షాపుల కేటాయింపుల్లో రిజర్వేషన్లు కల్పించింది.. అయితే, మద్యం దుకాణాల కేటాయింపులో రిజర్వేషన్లపై హైకోర్టులో పిటిషన్ దాఖలైంది.. ఖమ్మం జిల్లాకు చెందిన రవికాంత్ ఈ రిజర్వేషన్లను సవాల్ చేస్తూ పిటిషన్ వేయగా.. హైకోర్టు అత్యవసర విచారణకు స్వీకరించింది.. కులాల ప్రాతిపదికన రిజర్వేషన్లు ఉండొద్దని సుప్రీంకోర్టు తీర్పు ఉందన్న తన పిటిషన్లో పేర్కొన్నారు పిటిషనర్.. అయితే, ఈ కేసుపై విచారణ చేపట్టిన తెలంగాణ హైకోర్టు.. ఏ ప్రాతిపదికన రిజర్వేషన్లు నిర్ణయించారో తెలపాలంటూ ప్రభుత్వానికి ఆదేశాలు జారీ చేసింది.. ప్రభుత్వాన్ని సంప్రదించి వివరాలు సమర్పించాలని ప్రభుత్వ న్యాయవాదిని ఆదేశించింది. ఇక, ఈ కేసులో తదుపరి విచారణను ఎల్లుండికి వాయిదా వేసింది హైకోర్టు. కాగా, కొత్త మద్యం పాలసీలో రిజర్వేషన్లు కల్పించిన ప్రభుత్వం.. రిజర్వేషన్ల వారీగా కేటాయింపులు కూడా చేసింది.. మిగతా షాపులను ఓపెన్ కేటగిరిలో పెట్టిన సంగతి తెలిసిందే.
