Hyderabad Rains: రెండు నెలల తర్వాత హైదరాబాద్‌లో భారీ వర్షం.. ట్రాఫిక్ జామ్

ఎల్‌నినో ప్రభావంతో వర్షాభావ పరిస్థితులు, తీవ్రమైన ఉక్కపోతతో భయాందోళన చెందుతున్న హైదరాబాద్ ప్రజలకు వరుణుడు భారీ ఉపశమనం అందించాడు. శీతాకాలం ప్రారంభమైనప్పటికీ మధ్యాహ్నం వేళల్లో తీవ్రమైన ఎండ, ఉక్కపోతతో నగరవాసులు తీవ్ర ఇబ్బందులు ఎదుర్కొన్నారు. సుమారు రెండు నెలల తర్వాత శుక్రవారం సాయంత్రం వాతావరణం ఒక్కసారిగా మారిపోయి నగరంలోని పలు ప్రాంతాల్లో ఉరుములు, మెరుపులతో కూడిన కుండపోత వర్షం పడింది.

తూర్పు నుంచి పడమర వరకు తడిసిముద్దయిన నగరం

మధ్యాహ్నం వరకు తీవ్రమైన ఎండ కాగా, సాయంత్రానికి నల్లటి మేఘాలు ఆకాశాన్ని కమ్మేశాయి. పశ్చిమ హైదరాబాద్‌లోని మణికొండ, గచ్చిబౌలి, రాయదుర్గం, నానక్‌రామ్‌గూడ, షేక్‌పేట్, మెహదీపట్నం, రాజేంద్రనగర్‌లతో పాటు బంజారాహిల్స్, జూబ్లీహిల్స్, అమీర్‌పేట్, పంజాగుట్ట, ఖైరతాబాద్‌లలో వర్షం దంచికొట్టింది. ఇక తూర్పు, ఉత్తర భాగాలైన ఉప్పల్, ఎల్బీనగర్, నాగోల్, సరూర్‌నగర్, కాప్రా, కీసర, ఘట్‌కేసర్, బోడుప్పల్, చర్లపల్లి ఏరియాలు తడిసిముద్దయ్యాయి. పాతబస్తీలోని చాంద్రాయణగుట్ట, ఫలక్‌నుమా, సంతోష్‌నగర్, కంచన్‌బాగ్, శాలిబండ తదితర ప్రాంతాల్లోనూ వర్షం ధాటికి రహదారులు జలమయమయ్యాయి.

ఒక్కసారిగా స్తంభించిన ట్రాఫిక్.. పీవీఎన్ఆర్ ఎక్స్‌ప్రెస్‌వే వద్ద మోకాలి లోతు నీరు

సాయంత్రం వేళ ఆఫీసుల నుంచి ఇళ్లకు వెళ్లే సమయంలోనే కుండపోత వర్షం కురవడంతో ప్రధాన రహదారులపై వాహనాలు నిలిచిపోయాయి. ముఖ్యంగా గచ్చిబౌలి, మాదాపూర్, ఐటీ కారిడార్‌తో పాటు ఉప్పల్-మేడిపల్లి మార్గాల్లో కిలోమీటర్ల మేర ట్రాఫిక్ జామ్ ఏర్పడింది. పీవీఎన్ఆర్ ఎక్స్‌ప్రెస్‌వే పిల్లర్ నంబర్ 117 వద్ద రహదారిపై నీరు భారీగా నిలిచిపోవడంతో వాహనదారులు తీవ్ర ఇబ్బందులు పడ్డారు.

రంగంలోకి మాన్సూన్ ఎమర్జెన్సీ బృందాలు

వర్ష ప్రభావం ఎక్కువగా ఉండటంతో జీహెచ్‌ఎంసీ మాన్సూన్ ఎమర్జెన్సీ టీమ్స్ తక్షణమే రంగంలోకి దిగాయి. డ్రెయినేజీల్లో అడ్డంకులను తొలగిస్తూ, రోడ్లపై నిలిచిన వరద నీటిని బయటకు పంపించే పనులను వేగవంతం చేశాయి. మరోవైపు, వర్షంతో రహదారులు జలమయమైనందున వాహనదారులు అప్రమత్తంగా ఉండాలని, ట్రాఫిక్ పోలీసుల సూచనలు పాటిస్తూ ప్రయాణించాలని అధికారులు కోరారు.