Hyderabad Traffic : వాహనదారులకు బిగ్ అలర్ట్.. రేపు ఈ రూట్లలో నో ఎంట్రీ.!

హైదరాబాద్ నగరంలో వైభవంగా జరగనున్న బోనాల పండుగ ఉత్సవాలను పురస్కరించుకుని ఆగస్టు 9, 10 (2026) తేదీలలో నగరంలోని పలు కీలక ప్రాంతాల్లో ట్రాఫిక్ మళ్లింపులు చేపడుతున్నట్లు హైదరాబాద్ ట్రాఫిక్ పోలీసులు వెల్లడించారు. లాల్ దర్వాజా, కార్వాన్, అంబర్‌పేట్, చిలకలగూడ ప్రాంతాల్లో భక్తుల రద్దీ , ఊరేగింపుల దృష్ట్యా ప్రత్యేక ప్రత్యామ్నాయ మార్గాలను , పార్కింగ్ ప్రదేశాలను కేటాయించారు. ప్రయాణికులు, వాహనదారులు ఎలాంటి అసౌకర్యానికి గురికాకుండా ఉండటానికి నగర వ్యాప్తంగా చేపడుతున్న ట్రాఫిక్ ఆంక్షల పూర్తి వివరాలు ఇవే:

1. పాతబస్తీలో జరిగే చారిత్రాత్మక లాల్ దర్వాజా బోనాల ఊరేగింపు సందర్భంగా అత్యంత కీలకమైన మళ్లింపులు అమల్లో ఉంటాయి.

మళ్లింపు సమయాలు:

ఆగస్టు 09, 2026: ఉదయం 06:00 గంటల నుండి ఊరేగింపు పూర్తయ్యే వరకు.

ఆగస్టు 10, 2026: ఉదయం 09:00 గంటల నుండి ఊరేగింపు ముగిసే వరకు.

ముఖ్యమైన మళ్లింపు పాయింట్లు..

ఇంజిన్ బౌలి & ఫలక్‌నుమా మార్గం: ఫలక్‌నుమా వైపు నుండి ఆలియాబాద్ వైపు వచ్చే వాహనాలను కొత్త షంషేర్‌గంజ్ ‘T’ జంక్షన్ వద్ద గోశాల, తాడ్‌బన్ లేదా ఖిల్వత్ వైపు మళ్లిస్తారు.

మహబూబ్‌నగర్ (MBNR) ఎక్స్ రోడ్: ఇక్కడి నుండి ఆలియాబాద్ వెళ్లే వాహనాలు ఇంజిన్ బౌలి వద్ద జహానుమా లేదా తాడ్‌బన్ వైపు మళ్లాల్సి ఉంటుంది.

నాగుల్ చింతా & సుధా టాకీస్: లాల్ దర్వాజా ఆలయం వైపు వచ్చే వాహనాలను నెహ్రూ మోడ్ వద్ద సుధా టాకీస్, గౌలీపురా మీదుగా పంపిస్తారు.

గౌలీపురా మార్గం: లాల్ దర్వాజా మోడ్ వైపు వచ్చే వాహనాలను సుధా టాకీస్ వద్ద హరిబౌలి మీదుగా మీర్‌చౌక్ వైపు మళ్లిస్తారు.

చార్మినార్ (పాంచ్ మొహల్లా): నాగుల్ చింతా వైపు వచ్చే వాహనాలను హరిబౌలి, వోల్గా హోటల్, మిస్రీగంజ్ వైపు మళ్లిస్తారు.

కందికల్ గేట్ & ఛత్రినాక: కందికల్ గేట్ నుండి వచ్చే వాహనాలను OP ఛత్రినాక పిఎస్ “Y” జంక్షన్ వద్ద గౌలీపురా వైపు, అలాగే ఫ్లైఓవర్ నుండి వచ్చే వాహనాలను VN రెడ్డి కమాన్ వైపు మళ్లిస్తారు.

ప్రధాన రహదారి పూర్తిగా మూసివేత: మదీనా ఎక్స్ రోడ్స్ నుండి ఇంజిన్ బౌలి వరకు (గుల్జార్ హౌస్, చార్మినార్, హిమ్మత్‌పురా, నాగుల్ చింతా, ఆలియాబాద్ మీదుగా) ప్రధాన రహదారి ఊరేగింపు పూర్తయ్యే వరకు అన్ని రకాల వాహనాలకు పూర్తిగా మూసివేయబడుతుంది.

RTC బస్సులు: TG , APSRTC బస్సులు చార్మినార్, ఫలక్‌నుమా, నయాపూల్ వైపు అనుమతించబడవు. ఇవి పాత CBS, అఫ్జల్‌గంజ్, దారుల్ షిఫా ఎక్స్ రోడ్లలో నిలిపివేయబడతాయి.

భక్తుల పార్కింగ్ స్థలాలు..

ఆలియాబాద్ వైపు నుండి వచ్చే వారు: శాలిబండ పోస్టాఫీసు ఎదురుగా రోడ్డుపై సింగిల్ లైన్‌లో లేదా అల్కా థియేటర్ ఖాళీ స్థలంలో.

హరిబౌలి & గౌలీపురా వైపు నుండి వచ్చే వారు: ఆర్యవైశ్య మందిరం, అల్కా థియేటర్, VDP స్కూల్ మైదానం లేదా మిత్రా స్పోర్ట్స్ క్లబ్.

ఛత్రినాక వైపు నుండి వచ్చే వారు: లక్ష్మీనగర్ వెంకటేశ్వరస్వామి ఆలయ ప్రాంగణం లేదా ఫూల్‌బాగ్ చమన్ గ్రౌండ్.

మూసాబౌలి & మీర్‌చౌక్ వైపు నుండి వచ్చే వారు: చార్మినార్ బస్ టెర్మినల్.

2. కార్వాన్ దర్బార్ మైసమ్మ బోనాలు & ఏనుగు ఊరేగింపు

సమయం : కార్వాన్ నల్లా పోచమ్మ ఆలయ పరిసరాల్లో ఏనుగు ఊరేగింపును పురస్కరించుకుని ఆగస్టు 08 రాత్రి 09:00 గంటల నుండి ఆగస్టు 10 ఉదయం వరకు ట్రాఫిక్ ఆంక్షలు విధించారు.

జియాగూడ & పురానాపూల్ మార్గం: పురానాపూల్ జంక్షన్ నుండి జియాగూడ వైపు వెళ్లే ఆర్టీసీ బస్సులు , కార్లను పురానాపూల్ వద్ద మళ్లిస్తారు.

టప్పాచబుత్రా మార్గం: దర్బార్ మైసమ్మ వైపు వెళ్లే సాధారణ వాహనాలను మెస్కో కాలేజ్ వద్ద ‘వీ ది స్కూల్’ మీదుగా మళ్లిస్తారు. టప్పాచబుత్రా నుండి వచ్చే వాహనాలను జిర్రా రోడ్డు వైపు తిప్పుతారు.

యాదవ్ భవన్ & మొఘల్ కా నాలా: కార్వాన్ రోడ్డు ద్వారా వచ్చే వాహనాలను ముర్గి చౌక్, తల్లాగడ్డ వద్ద, అలాగే మొఘల్ కా నాలా నుండి వచ్చే వాహనాలను నెహ్రూ స్కూల్ (2J బస్ స్టాప్) వద్ద మళ్లిస్తారు.

పార్కింగ్ ప్రదేశాలు:

• ప్రభుత్వ ప్రాథమిక , ఉన్నత పాఠశాల మైదానం, కార్వాన్.
• తోలి మసీదు (ప్రభుత్వ పాఠశాల ఎదురుగా).
• జగత్ సింగ్ ప్రైవేట్ స్థలం (కేవలం ద్విచక్ర వాహనాల కోసం).

3. అంబర్‌పేట్ శ్రీ మహంకాళి ఆలయం

అంబర్‌పేట్‌లో బోనాల సందర్భంగా ప్రయాణికులకు ఇబ్బంది కలగకుండా ఫ్లైఓవర్‌ను గరిష్టంగా వినియోగించనున్నారు.

సమయం: ఆగస్టు 09 ఉదయం 06:00 గంటల నుండి ఆగస్టు 10 మధ్యాహ్నం 12:00 గంటల వరకు.

భారీ వాహనాలు & బస్సులు: ఉప్పల్ నుండి చాదర్‌ఘాట్, MGBS వైపు , తిరుగు ప్రయాణంలో వెళ్లే జిల్లా, సిటీ బస్సులు, దారి మళ్లించే భారీ వాహనాలన్నీ అంబర్‌పేట్ ఫ్లైఓవర్ మీదుగా మాత్రమే పంపిస్తారు.

రామంతాపూర్ నుండి ఆలయానికి వచ్చే భక్తులు: ఫ్లైఓవర్ ఎడమ బైలేన్ గుండా గాంధీ విగ్రహం వద్ద ఎడమ మలుపు తీసుకుని, అంబర్‌పేట్ GHMC మైదానంలో వాహనాలను పార్క్ చేయాలి.

తిలక్‌నగర్ & NCC మార్గం: రామంతాపూర్, ఉప్పల్ వైపు వెళ్లే బస్సులను రోడ్ నెం. 06 జంక్షన్ వద్ద గోల్నాక వైపు మళ్లించి, గోల్నాక చిల్లా వద్ద యు-టర్న్ తీసుకుని ఫ్లైఓవర్ మీదుగా పంపిస్తారు.

4. చిలకలగూడ శ్రీ కట్ట మైసమ్మ – పోచమ్మ ఆలయం

సమయం: ఆగస్టు 09 , 10 తేదీలలో ఉదయం 05:00 గంటల నుండి రాత్రి 11:00 గంటల వరకు.

సీతాఫల్‌మండి నుండి మళ్లింపు: సీతాఫల్‌మండి జంక్షన్ నుండి చిలకలగూడ ఎక్స్ రోడ్ వైపు వచ్చే వాహనాలను నామలగుండు – వారసిగూడ ఎక్స్ రోడ్, సీతాఫల్‌మండి T జంక్షన్, OU సిటీ రోడ్ – తార్నాక వైపు మళ్లిస్తారు.

సికింద్రాబాద్ మార్గం: అల్లుగడ్డ బావి, సికింద్రాబాద్ నుండి చిలకలగూడ మీదుగా సీతాఫల్‌మండి వెళ్లే వాహనాలను పద్మారావు నగర్ T జంక్షన్ వైపు మళ్లిస్తారు.

ప్రయాణికులకు ట్రాఫిక్ పోలీసుల విజ్ఞప్తి

బోనాల ఉత్సవాల వేళ నగరవాసులు తమ ప్రయాణాలను ముందస్తుగా ప్రణాళిక చేసుకోవాలని హైదరాబాద్ ట్రాఫిక్ జాయింట్ కమిషనర్ ఆఫ్ పోలీస్ విజ్ఞప్తి చేశారు. ప్రయాణంలో ఏవైనా అత్యవసర పరిస్థితులు ఎదురైతే సహాయం కోసం ట్రాఫిక్ హెల్ప్‌లైన్ నంబర్: 9010203626 ను సంప్రదించవచ్చు. తాజా ట్రాఫిక్ సమాచారం కోసం హైదరాబాద్ ట్రాఫిక్ పోలీసుల అధికారిక సోషల్ మీడియా ఖాతాలను [@HYDP (Twitter)], [Hyderabad Traffic Police (Facebook)] అనుసరించాల్సిందిగా కోరారు.