WhatsApp Username Feature: కేంద్రం గ్రీన్‌ సిగ్నల్‌ ఇస్తుందా..? వాట్సాప్ యూజర్‌నేమ్ ఫీచర్‌పై ఉత్కంఠ..

WhatsApp Username Feature: వాట్సాప్ ప్రతిపాదిత యూజర్‌నేమ్ ఫీచర్‌పై కేంద్ర ప్రభుత్వం జారీ చేసిన నోటీసుకు మెటా స్పందన సమర్పించింది. ఈ స్పందనను ప్రస్తుతం సమాచార సాంకేతిక శాఖ పరిశీలిస్తోంది. పరిశీలన అనంతరం ఫీచర్ అమలుపై ప్రభుత్వం తన నిర్ణయాన్ని ప్రకటించనుంది. అయితే, మొబైల్ నంబర్‌ను పంచుకోకుండా వినియోగదారులు పరస్పరం చాట్ చేసుకునే వీలును కల్పించే ఈ ఫీచర్‌పై ప్రభుత్వం పలు ఆందోళనలు వ్యక్తం చేసింది. ముఖ్యంగా ఆన్‌లైన్ మోసాలు, ఫిషింగ్, డిజిటల్ అరెస్ట్ మోసాలు, నకిలీ గుర్తింపుల వంటి సైబర్ నేరాలు పెరిగే అవకాశం ఉందని పేర్కొంది. సంతృప్తికరమైన వివరణ వచ్చే వరకు భారతదేశంలో ఈ ఫీచర్‌ను ప్రారంభించవద్దని మెటాకు సూచించింది.

ప్రభుత్వంతో సంప్రదింపులు పూర్తయ్యే వరకు ఫీచర్‌ను భారత్‌లో అందుబాటులోకి తేవబోమని వాట్సాప్ హామీ ఇచ్చింది. నకిలీ గుర్తింపులను నిరోధించేందుకు ప్రముఖులు, ప్రభుత్వ సంస్థలు, ధృవీకరించబడిన ఖాతాల పేర్లను రిజర్వ్ చేసినట్లు సంస్థ వెల్లడించింది. అలాగే వాట్సాప్ వినియోగానికి మొబైల్ నంబర్ తప్పనిసరిగా ఉంటుందని, భద్రతా చర్యలను మరింత బలోపేతం చేసినట్లు స్పష్టం చేసింది.

వాట్సాప్ యూజర్‌నేమ్ ఫీచర్ అంటే ఏమిటి?

వాట్సాప్ యూజర్‌నేమ్ ఫీచర్ వాస్తవానికి వినియోగదారులు తమ మొబైల్ నంబర్లను పంచుకోకుండానే ఒకరితో ఒకరు సంభాషించుకోవడానికి వీలు కల్పిస్తుంది. ఈ ఫీచర్‌ను నిర్వహించాలని ప్రభుత్వం కోరింది.. ఈ విషయంపై సంతృప్తికరమైన స్పందన లభించే వరకు భారతదేశంలో ఈ ఫీచర్‌ను ప్రారంభించవద్దని ప్రభుత్వం తన నోటీసులో మెటాను ఆదేశించింది. స్పందించడానికి అదనపు సమయం కావాలని వాట్సాప్ ప్రభుత్వాన్ని కోరింది.. ప్రభుత్వంతో చర్చలు పూర్తయ్యే వరకు భారతదేశంలో ఈ ఫీచర్‌ను ప్రారంభించబోమని హామీ ఇచ్చింది. సమాచార సాంకేతిక (ఐటీ) మంత్రిత్వ శాఖకు వాట్సాప్ నుంచి స్పందన అందింది. ప్రభుత్వం ఇప్పుడు ఆ స్పందనను పరిశీలించి, తన నిర్ణయాన్ని వెల్లడించనుంది..

టెలిగ్రామ్, సిగ్నల్‌లో ప్రశ్నలు..
గురువారం అంతకుముందు జరిగిన CII GCC బిజినెస్ సమ్మిట్‌లో, వాట్సాప్ స్పందన గురువారం వస్తుందని ఐటీ కార్యదర్శి ఎస్. కృష్ణన్ చెప్పారు. వారి యూజర్‌నేమ్ ఫీచర్‌కు సంబంధించి పంపిన నోటీసులపై టెలిగ్రామ్, సిగ్నల్ వంటి ఇతర మెసేజింగ్ ప్లాట్‌ఫామ్‌లు కూడా స్పందించాయా అని అడగ్గా, వారికి మరికొంత సమయం ఉందని ఆయన బదులిచ్చారు.

ప్రభుత్వం నోటీసులో ఈ ప్రశ్న అడిగింది
ఈ కొత్త ఫీచర్ కారణంగా సైబర్ నేరాలు జరిగే అవకాశం ఉన్నందున, ఐటీ చట్టం మరియు సంబంధిత నిబంధనల కింద వాట్సాప్‌పై ఎందుకు చర్యలు తీసుకోకూడదని మెటాకు పంపిన నోటీసులో ప్రభుత్వం ప్రశ్నించింది. వాట్సాప్ ఒక ముఖ్యమైన సోషల్ మీడియా మధ్యవర్తి అని, నిబంధనల ప్రకారం తగిన శ్రద్ధ వహించాల్సిన చట్టపరమైన బాధ్యత దానికి ఉందని కూడా ప్రభుత్వం గుర్తుచేసింది. గత వారం, వాట్సాప్ ప్రతినిధి ఒకరు యూజర్‌నేమ్ ఫీచర్ ఇంకా అందుబాటులోకి రాలేదని చెప్పారు. ఈ ఏడాది చివర్లో దీనిని దశలవారీగా విడుదల చేయనున్నారు. మొత్తంగా.. వాట్సాప్ ఉపయోగించడానికి మొబైల్ నంబర్ తప్పనిసరిగా ఉండాలని కంపెనీ స్పష్టం చేసింది. యూజర్‌నేమ్‌లకు సంబంధించిన మోసాలను నివారించడానికి పలు భద్రతా ఏర్పాట్లు ఉన్నాయి.