Mujeeb Ur Rahman has been replaced by Hazratullah Zazai: టీ20 ప్రపంచకప్‌ 2024 సూపర్-8 చేరి మంచి జోష్‌లో ఉన్న అఫ్గనిస్తాన్‌కు భారీ షాక్‌ తగిలింది. అఫ్గాన్‌ స్టార్ స్పిన్నర్ ముజీబ్‌ ఉర్‌ రహ్మాన్‌ టీ20 ప్రపంచకప్‌కు దూరమయ్యాడు. వేలి గాయం కారణంగా అతడు మెగా టోర్నీలోని మిగతా మ్యాచ్‌లకు అందుబాటులో ఉండటం లేదు. ఈ విషయాన్ని అంతర్జాతీయ క్రికెట్‌ మండలి (ఐసీసీ) ఓ ప్రకటనలో తెలిపింది. ముజీబ్‌ స్థానంలో హజ్రతుల్లా జజాయ్‌ జట్టులోకి చేరినట్లు పేర్కొంది.
అఫ్గనిస్తాన్‌ జట్టులోని ముజీబ్‌ ఉర్‌ రహ్మాన్‌ కీలక ఆటగాడిగా ఉన్నాడు. టీ20లలో అతడికి మెరుగైన రికార్డు ఉంది. అఫ్గాన్‌ తరఫున 46 టీ20లు ఆడిన ముజీబ్‌.. 59 వికెట్లు పడగొట్టాడు. టీ20 ప్రపంచకప్‌ 2024లో ఉగాండాపై మాత్రమే ముజీబ్‌ ఆడాడు. మూడు ఓవర్లలో 16 పరుగులు ఇచ్చి.. ఒక వికెట్‌ తీశాడు. గాయం కారణంగా మళ్లీ అతడు మైదానంలోకి దిగలేదు. ముజీబ్‌ స్థానంలో నూర్ అహ్మద్‌ బరిలోకి దిగాడు. మణికట్టు స్పిన్నర్ అయిన నూర్.. మెగా టోర్నీలో రెండు గేమ్‌లు ఆడాడు. న్యూజిలాండ్‌, పాపువా న్యూ గినియాతో జరిగిన మ్యాచ్‌లలో నూర్ ఆకట్టుకున్నాడు.
Also Read: Gold Price Today: భారీ షాకిచ్చిన బంగారం ధరలు.. తులంపై రూ.660 పెరిగింది!
గ్రూప్-సీలో ఉన్న అఫ్గనిస్తాన్‌ ఇప్పటికే హ్యాట్రిక్‌ విజయాలతో సూపర్-8కు చేరుకుంది. గ్రూప్ దశలో మరో మ్యాచ్ ఆడాల్సి ఉంది. అయితే స్పిన్‌కు అనుకూలించే వెస్టిండీస్‌ పిచ్‌లపై ముజీబ్‌ లాంటి కీలక బౌలర్‌ సేవలు కోల్పోవడం అఫ్గాన్‌ జట్టుకు పెద్ద ఎదురుదెబ్బ అని చెప్పాలి. స్పిన్నర్లు రషీద్‌ ఖాన్‌, మహ్మద్‌ నబీ.. పేసర్‌ ఫజల్‌హక్‌ ఫరూకీ రాణిస్తుండటం ఊరట కలిగించే అంశం. సూపర్-8లో అఫ్గాన్‌ ఎలా రాణిస్తుందో చూడాలి.