IPL 2026 Playoffs: ఆర్సీబీ లేదా జీటీకే ఐపీఎల్ 2026 టైటిల్.. ఎస్‌ఆర్‌హెచ్, ఆర్‌ఆర్‌లకు కష్టమే!

RCB And GT Strong Favorites To Win IPL 2026 Title: ఐపీఎల్ 2026 లీగ్ దశ ముగియడంతో ఇప్పుడు అందరి దృష్టి ప్లేఆఫ్స్‌పై పడింది. రాయల్ ఛాలెంజర్స్ బెంగళూరు (ఆర్సీబీ), గుజరాత్ టైటాన్స్ (జీటీ), సన్‌రైజర్స్ హైదరాబాద్ (ఎస్‌ఆర్‌హెచ్), రాజస్థాన్ రాయల్స్ (ఆర్ఆర్) జట్లు టాప్-4లో నిలిచాయి. ఈ నాలుగు జట్లూ ఇప్పటికే ఒక్కోసారి టైటిల్ గెలిచిన నేపథ్యంలో.. ఈ సీజన్‌లో రెండోసారి ఛాంపియన్‌గా నిలిచే జట్టు ఏదన్నదే ఇప్పుడు ఆసక్తికరంగా మారింది. అయితే ఐపీఎల్ చరిత్రను పరిశీలిస్తే.. టైటిల్ గెలిచే అవకాశాలు ఎక్కువగా ఆర్సీబీ లేదా జీటీకే ఉన్నట్లు గణాంకాలు చెబుతున్నాయి.

మంగళవారం ధర్మశాలలో జరిగే క్వాలిఫయర్-1లో ఆర్సీబీ, గుజరాత్ టైటాన్స్ తలపడనున్నాయి. ఈ మ్యాచ్‌లో గెలిచిన జట్టు నేరుగా ఫైనల్‌కు చేరుకుంటుంది. మరోవైపు బుధవారం న్యూ చండీగఢ్‌లో జరిగే ఎలిమినేటర్‌లో సన్‌రైజర్స్ హైదరాబాద్, రాజస్థాన్ రాయల్స్ పోటీ పడనున్నాయి. ఈ మ్యాచ్‌లో ఓడిన జట్టు టోర్నీ నుంచి నిష్క్రమిస్తే.. విజేత క్వాలిఫయర్-2 ఆడాల్సి ఉంటుంది. క్వాలిఫయర్-1లో ఓడిన జట్టు, ఎలిమినేటర్‌ విజేత టీమ్ క్వాలిఫయర్-2 మ్యాచ్ ఆడుతాయన్న విషయం తెలిసిందే.

అయితే 2011 నుంచి అమల్లోకి వచ్చిన ప్రస్తుత ప్లేఆఫ్స్ ఫార్మాట్ గణాంకాలు చూస్తే.. టైటిల్ గెలిచే అవకాశాలు టాప్-2 జట్లకే ఎక్కువగా ఉన్నట్లు స్పష్టమవుతోంది. గత 15 సీజన్లలో 14 సార్లు క్వాలిఫయర్-1 ఆడిన రెండు జట్లలో ఒకటి ఐపీఎల్ ట్రోఫీని గెలుచుకుంది. అంటే ఈసారి కూడా ఆర్సీబీ లేదా గుజరాత్ టైటాన్స్ టైటిల్ గెలిచే అవకాశాలు 93.3 శాతంగా ఉన్నాయి. ఇక ఎలిమినేటర్ ఆడే ఎస్‌ఆర్‌హెచ్ లేదా రాజస్థాన్ రాయల్స్ టైటిల్ గెలిచే అవకాశాలు కేవలం 6.66 శాతమే.

ప్రస్తుత ప్లేఆఫ్స్ ఫార్మాట్‌లో టాప్-2లో లేకుండానే టైటిల్ గెలిచిన ఏకైక జట్టు సన్‌రైజర్స్ హైదరాబాద్ మాత్రమే. 2016లో మూడో స్థానంలో నిలిచిన ఎస్‌ఆర్‌హెచ్.. ఫైనల్లో ఆర్సీబీని ఓడించి ట్రోఫీని సొంతం చేసుకుంది. ఆ తర్వాత నాలుగో స్థానంలో నిలిచిన ఏ జట్టూ ఛాంపియన్ కాలేదు. అందుకే ఈసారి రాజస్థాన్ రాయల్స్, సన్‌రైజర్స్ హైదరాబాద్‌కు గట్టి సవాలు ఎదురుకానుంది. ఇంకా ఆసక్తికరమైన విషయం ఏమిటంటే.. గత 15 సీజన్లలో 12 సార్లు క్వాలిఫయర్-1 గెలిచిన జట్టే చివరికి ఐపీఎల్ ఛాంపియన్‌గా నిలిచింది. కేవలం 2013, 2017లో ముంబై ఇండియన్స్.. 2016లో సన్‌రైజర్స్ హైదరాబాద్ మాత్రమే ఈ ట్రెండ్‌ను బ్రేక్ చేశాయి. అలాగే క్వాలిఫయర్-1 ఆడిన జట్లు 15లో 12 సార్లు ఫైనల్‌కు కూడా చేరుకున్నాయి.

ఈ గణాంకాలన్నీ ఇప్పుడు ఆర్సీబీ, గుజరాత్ అభిమానుల్లో మరింత నమ్మకాన్ని పెంచుతున్నాయి. అయితే టీ20 క్రికెట్ అనిశ్చితికి మరో పేరు. ఒక్క మ్యాచ్‌లో పరిస్థితులు పూర్తిగా మారిపోవచ్చు. ముఖ్యంగా వైభవ్ సూర్యవంశీ వంటి యువ ఆటగాళ్లు ఫామ్‌లో ఉన్న రాజస్థాన్ రాయల్స్, అలాగే విధ్వంసక బ్యాటింగ్‌తో దూసుకెళ్తున్న సన్‌రైజర్స్ హైదరాబాద్ కూడా చరిత్రను తిరగరాసే సామర్థ్యం కలిగిన జట్లే. దీంతో ఐపీఎల్ 2026 ప్లేఆఫ్స్ మరింత ఉత్కంఠభరితంగా మారాయి. చూడాలి మరి ఏం జరుగుతుందో.