Hardik Pandya Injury: హార్దిక్‌ పాండ్యాకు బిగ్ షాక్.. మరోసారి గాయం.. ఈ గాయాల గోలేందిరా బాబూ!

Hardik Pandya Injury: గాయం నుంచి కోలుకుని తిరిగి టీమిండియాలోకి రావాలని చూస్తోన్న స్టార్ ఆల్‌రౌండర్ హార్దిక్ పాండ్యాకు బిగ్ షాక్ తగిలింది. హార్దిక్ మళ్లీ గాయపడినట్లు సమాచారం. దీంతో సెప్టెంబరు 13 నుంచి అఫ్గానిస్థాన్‌తో జరగనున్న మూడు మ్యాచ్‌ల టీ20 సిరీస్‌కు అతడు దూరమయ్యే అవకాశముంది. హార్దిక్ తాజా లెగ్ సమస్యతో ఇబ్బందులు పడుతున్నట్లు తెలుస్తోంది. దీంతో హార్దిక్ పునరాగమనంపై మరోసారి సందేహాలు నెలకొన్నాయి. ఈ మేరకు ఓ జాతీయ మీడియా తన కథనంలో పేర్కొంది.

బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో హార్దిక్ పాండ్యా గత కొంతకాలంగా ఫిట్‌నెస్, బౌలింగ్‌పై ముమ్మర సాధన చేస్తున్నాడు. పూర్తి తీవ్రతతో బౌలింగ్ చేస్తూ ఎలాంటి పెద్ద ఇబ్బంది లేకుండానే పురోగతి సాధిస్తున్న సమయంలో.. తాజాగా కాలిలో అసౌకర్యం తలెత్తినట్లు సమాచారం. దీంతో ప్రస్తుతం బౌలింగ్‌కు దూరంగా ఉండాలని అతడికి బీసీసీఐ వైద్య బృందం సూచించినట్లు తెలుస్తోంది. దాంతో అఫ్గానిస్థాన్‌తో జరగనున్న టీ20 సిరీస్‌కు హార్దిక్ దూరమయ్యే అవకాశాలు ఉన్నాయి. ఈ వారం బీసీసీఐ సెలెక్టర్లు సమావేశమై సిరీస్‌కు జట్టును ఎంపిక చేయనున్నారు. బెంగళూరు సీఓఈలో చికిత్స, రిహాబిలిటేషన్ కొనసాగిస్తున్న ఆటగాళ్ల ఫిట్‌నెస్‌పై కూడా సెలెక్టర్లు రిపోర్ట్స్ తీసుకోనున్నారు.

హార్దిక్ పాండ్యా పూర్తి తీవ్రతతో బౌలింగ్ చేస్తున్న సమయంలో పెద్దగా అసౌకర్యం కనిపించలేదు. అయితే కాలిలో స్వల్ప సమస్య రావడంతో కొంతకాలం బౌలింగ్‌ను ఆపేయాల్సి వచ్చింది. త్వరలోనే అతడు తిరిగి బౌలింగ్ ప్రారంభించే అవకాశం ఉన్నప్పటికీ.. అఫ్గానిస్థాన్ సిరీస్‌కు సమయం చాలా తక్కువగా ఉండటంతో అప్పటికి పూర్తి ఫిట్‌నెస్ సాధించడం కష్టమని బీసీసీఐ సెంటర్ ఆఫ్ ఎక్సలెన్స్ అధికారులు భావిస్తున్నారు. ప్రస్తుతం హార్దిక్ బ్యాటింగ్, కదలికల్లో పెద్దగా సమస్యలు లేవు. అయినప్పటికీ పూర్తి స్థాయిలో ఫిట్‌గా ఉన్నాడని నిర్ధారించుకున్న తర్వాతే అతడికి గ్రీన్ సిగ్నల్ ఇవ్వాలని సీఓఈ భావిస్తోంది.

హార్దిక్ పాండ్యా చివరిసారిగా 2026 ఐపీఎల్‌లో ముంబై ఇండియన్స్ తరఫున మే 24న మ్యాచ్ ఆడాడు. భారత్ తరఫున చివరి మ్యాచ్ మార్చి 8న 2026 టీ20 ప్రపంచకప్ ఫైనల్లో ఆడాడు. ఆ తర్వాత గాయాల కారణంగా హార్దిక్ అఫ్గానిస్థాన్‌తో స్వదేశీ వైట్‌బాల్ సిరీస్‌తో పాటు ఐర్లాండ్, ఇంగ్లండ్, జింబాబ్వే పర్యటనలకు కూడా దూరమయ్యాడు. ఇప్పుడు మళ్లీ పూర్తి ఫిట్‌నెస్ సాధించి జట్టులోకి రావాలని ప్రయత్నిస్తున్న సమయంలో తాజా లెగ్ సమస్య అతడి రీఎంట్రీని ఆలస్యం చేయనుంది. హార్దిక్ లేకపోవడం టీమిండియా కూర్పుపైనా ప్రభావం చూపవచ్చు.