GTvsLSG: గిల్ క్లాస్.. బట్లర్ మాస్.. లక్నోను చిత్తు చేసిన గుజరాత్ ఓపెనర్లు..

ఐపీఎల్ 2026 సీజన్‌లో గుజరాత్ టైటాన్స్ తన జైత్రయాత్రను కొనసాగిస్తూ లక్నో సూపర్ జెయింట్స్‌పై అద్భుత విజయాన్ని అందుకుంది. బ్యాటింగ్, బౌలింగ్ విభాగాల్లో సమతూకంతో కనిపిస్తున్న గుజరాత్, లక్నో నిర్దేశించిన 165 పరుగుల లక్ష్యాన్ని కేవలం 3 వికెట్లు కోల్పోయి మరో 8 బంతులు మిగిలి ఉండగానే ఛేదించింది. ఉత్కంఠభరితంగా సాగుతుందనుకున్న ఈ పోరులో గుజరాత్ ఓపెనర్లు లక్నో బౌలర్లపై పూర్తి ఆధిపత్యం ప్రదర్శించి, తమ జట్టుకు వరుసగా రెండో విజయాన్ని అందించారు.

Pakistan: యుద్ధంలోకి పాకిస్తాన్.. సౌదీలో పాక్ సైన్యం మోహరింపు..

ఛేదనలో గుజరాత్ టైటాన్స్ కెప్టెన్ శుభ్‌మన్ గిల్ , జోస్ బట్లర్ ఆకాశమే హద్దుగా చెలరేగిపోయారు. గిల్ తన క్లాస్ షాట్లతో అలరిస్తూ 40 బంతుల్లో 56 పరుగులు చేయగా, మరోవైపు బట్లర్ తన టీ20 కెరీర్‌లో 100వ అర్ధ సెంచరీ మార్కును అందుకుంటూ 37 బంతుల్లోనే 60 పరుగులు సాధించి జట్టు విజయాన్ని సులభతరం చేశారు. మధ్యలో సాయి సుదర్శన్ (15) , చివరలో వాషింగ్టన్ సుందర్ (20 నాటౌట్) మెరుపులు మెరిపించడంతో గుజరాత్ లక్ష్యం వైపు అలవోకగా దూసుకెళ్లింది. లక్నో బౌలర్లలో ప్రన్ష్ యాదవ్, షమీ , దిగ్వేష్ రాఠీ చెరో వికెట్ తీసినప్పటికీ, గుజరాత్ బ్యాటర్ల జోరును అడ్డుకోవడంలో వారు విఫలమయ్యారు.

అంతకుముందు టాస్ ఓడి బ్యాటింగ్‌కు దిగిన లక్నో సూపర్ జెయింట్స్ నిర్ణీత 20 ఓవర్లలో 8 వికెట్ల నష్టానికి 164 పరుగులు చేసింది. గుజరాత్ పేసర్ ప్రసిద్ధ్ కృష్ణ తన అద్భుతమైన బౌలింగ్‌తో లక్నో బ్యాటర్లను ముప్పుతిప్పలు పెట్టాడు. కేవలం 28 పరుగులిచ్చి 4 వికెట్లు పడగొట్టిన ప్రసిద్ధ్, లక్నో మిడిలార్డర్ వెన్నువిరిచాడు. ఓపెనర్లు మార్క్రమ్ (30), మిచెల్ మార్ష్ (11) విఫలం కాగా, కెప్టెన్ రిషబ్ పంత్ (18) కూడా ఎక్కువ సేపు క్రీజులో నిలబడలేకపోయాడు. చివరలో మహమ్మద్ షమీ కొన్ని కీలక పరుగులు జోడించడంతో లక్నో గౌరవప్రదమైన స్కోరు సాధించగలిగింది. ఏదేమైనా, సమష్టి కృషితో రాణించిన గుజరాత్ టైటాన్స్ ఈ మ్యాచ్‌లో లక్నోను అన్ని విభాగాల్లోనూ చిత్తు చేసి ఘనవిజయాన్ని సొంతం చేసుకుంది.

LSG vs GT: లక్నో బ్యాటర్లను వణికించిన గుజరాత్ బౌలర్లు.. గిల్ సేన టార్గెట్ ఎంతంటే!