Team India: మైదానంలోకి దూసుకెళ్లాడు.. రోహిత్ శర్మను కౌగిలించుకున్నాడు

Team India: గతంలో సచిన్, గంగూలీ అంటే ఎంతో మంది క్రికెట్ అభిమానులు ఇష్టపడేవారు. వాళ్లు రిటైర్ అయిన తర్వాత వాళ్ల స్థానాలను విరాట్ కోహ్లీ, రోహిత్ శర్మ ఆక్రమించారు. వీళ్లిద్దరూ అంటే ప్రపంచ వ్యాప్తంగా ఎంతో మంది అభిమానించే వాళ్లు ఉన్నారు. తాజాగా న్యూజిలాండ్‌తో జరిగిన రాయ్‌పూర్ వన్డేలో ఓ అభిమాని సెక్యూరిటీ కళ్లు గప్పి మైదానంలోకి దూసుకొచ్చాడు. తన అభిమాన క్రికెటర్ అయిన రోహిత్ శర్మ గట్టిగా హగ్ చేసుకున్నాడు. ఈ ఊహించని ఘటనతో మైదానంలోని భద్రతా సిబ్బంది షాక్ తిన్నారు. వెంటనే అప్రమత్తమై ఆ అభిమానిని మైదానం నుంచి తీసుకెళ్లారు. దాంతో మ్యాచ్ కాసేపు నిలిచి పోయింది.

Read Also: Drone Hulchul in Tirumala Live: తిరుమలలో డ్రోన్ కలకలం .. ఎన్టీవీ చేతిలో వీడియో

భారత్ ఇన్నింగ్స్ సందర్భంగా బ్లెయిర్ టిక్‌నెర్ వేసిన 10వ ఓవర్‌లో ఈ ఘటన చోటు చేసుకుంది. ఈ ఓవర్ నాలుగో బంతిని రోహిత్ సిక్సర్ బాదగా.. అనంతరం ఆ బాలుడు మైదానంలోకి దూసుకొచ్చాడు. అయితే మైదానంలోకి దూసుకొచ్చిన రోహిత్ శర్మ అభిమాని ఓ 12 ఏళ్ల బాలుడు కావడం విశేషం. రోహిత్ శర్మ అంటే తనకు ఎంతో ఇష్టం కావడంతో అతడు తన అభిమాన క్రికెటర్‌ను కలిసేందుకు ఇలా సాహసానికి ప్రయత్నించాడు. తనను కౌగిలించుకునేందుకు వచ్చిన బాలుడిని వదిలేయాలని సెక్యూరిటీ సిబ్బందికి రోహిత్ శర్మ చెప్పడం పలువురిని ఆకట్టుకుంది. ప్రస్తుతం ఈ ఘటనకు సంబంధించిన వీడియో, ఫొటోలు సోషల్ మీడియాలో వైరల్‌ అవుతున్నాయి.