Rohit Sharma Records: వన్డే నుంచి టీ20 వరకు.. కోహ్లీ కూడా బ్రేక్ చేయలేని రోహిత్ శర్మ చారిత్రాత్మక రికార్డ్స్ ఇవే!
- రోహిత్ శర్మ చారిత్రాత్మక రికార్డ్స్
- విరాట్ కోహ్లీకి కూడా అసాధ్యం!
- వన్డేల్లో అత్యధిక వ్యక్తిగత స్కోరు - 264 పరుగులు
- Follow Us :
-
-
Add as a preferred
source on google
భారత క్రికెట్లో అత్యుత్తమ బ్యాట్స్మెన్లలో ఇద్దరు పేర్లు చెప్పాలంటే ముందుగా గుర్తుకు వచ్చేవారు రోహిత్ శర్మ, విరాట్ కోహ్లీ. ఎన్నో చారిత్రాత్మక రికార్డులను తన పేరిట నమోదు చేసుకున్న విరాట్ కోహ్లీ, సచిన్ టెండూల్కర్కు చెందిన అనేక రికార్డ్స్ ను అధిగమించాడు. అయినప్పటికీ, రోహిత్ శర్మ పేరిట ఉన్న కొన్ని అరుదైన రికార్డులు మాత్రం ఇప్పటికీ చెక్కుచెదరలేదు. వాటిని కోహ్లీ కూడా అధిగమించడం దాదాపు అసాధ్యమేనని క్రికెట్ విశ్లేషకులు భావిస్తున్నారు.
1. వన్డేల్లో అత్యధిక వ్యక్తిగత స్కోరు – 264 పరుగులు
2014లో శ్రీలంకతో జరిగిన వన్డే మ్యాచ్లో రోహిత్ శర్మ కేవలం 173 బంతుల్లో 264 పరుగులు చేసి ప్రపంచ రికార్డు సృష్టించాడు. ఇప్పటివరకు వన్డే చరిత్రలో ఏ బ్యాట్స్మన్ కూడా ఈ స్కోరును అధిగమించలేదు. విరాట్ కోహ్లీ అత్యధిక వన్డే స్కోరు 183 మాత్రమే. అంతేకాదు, అతను ఇప్పటివరకు వన్డేల్లో డబుల్ సెంచరీ కూడా నమోదు చేయలేదు.
2. వన్డేల్లో మూడు డబుల్ సెంచరీలు
వన్డే క్రికెట్లో డబుల్ సెంచరీ సాధించడం ఎంతో అరుదైన ఘనత. అలాంటి డబుల్ సెంచరీని రోహిత్ శర్మ ఒకసారి కాదు, రెండుసార్లు కాదు, మూడుసార్లు సాధించి చరిత్ర సృష్టించాడు. ఈ రికార్డు ఇప్పటికీ అతని పేరిటే ఉంది. మరోవైపు, కోహ్లీ ఇప్పటివరకు ఒక్క డబుల్ సెంచరీ కూడా చేయలేదు.
3. ఒకే ప్రపంచకప్లో ఐదు సెంచరీలు
2019 వన్డే ప్రపంచకప్లో రోహిత్ శర్మ అద్భుత ప్రదర్శనతో ఒకే టోర్నీలో ఐదు శతకాలు నమోదు చేశాడు. ప్రపంచకప్ చరిత్రలో ఇది ఇప్పటికీ అత్యధిక సెంచరీల రికార్డు. అదే టోర్నీలో అత్యధిక పరుగులు చేసిన బ్యాట్స్మన్గా కూడా నిలిచాడు. ఈ రికార్డును అధిగమించడం ఏ ఆటగాడికైనా చాలా కష్టమైన సవాలే.
4. టీ20 అంతర్జాతీయాల్లో అత్యధిక సెంచరీలు
టీ20 అంతర్జాతీయ క్రికెట్లో రోహిత్ శర్మ ఐదు సెంచరీలు నమోదు చేశాడు. ఈ రికార్డును అతను గ్లెన్ మాక్స్వెల్తో కలిసి పంచుకుంటున్నాడు. విరాట్ కోహ్లీ తన టీ20 అంతర్జాతీయ కెరీర్లో కేవలం ఒక సెంచరీ మాత్రమే చేశాడు. ప్రస్తుతం ఇద్దరూ ఈ ఫార్మాట్కు వీడ్కోలు చెప్పడంతో, కోహ్లీ ఈ రికార్డును అధిగమించే అవకాశం లేదు.
5. అంతర్జాతీయ క్రికెట్లో అత్యధిక సిక్సర్లు
రోహిత్ శర్మకు “హిట్మ్యాన్” అనే పేరు రావడానికి ప్రధాన కారణం అతని భారీ సిక్సర్లు. మూడు ఫార్మాట్లలో కలిపి రోహిత్ ఇప్పటివరకు 656 సిక్సర్లు బాదాడు. ఇది అంతర్జాతీయ క్రికెట్లో అత్యధిక సిక్సర్ల రికార్డు. విరాట్ కోహ్లీ తన కెరీర్లో 322 సిక్సర్లు మాత్రమే నమోదు చేశాడు. దీంతో ఈ ఘనతను అందుకోవడం కూడా అతనికి దాదాపు అసాధ్యంగా కనిపిస్తోంది.
విరాట్ కోహ్లీ తన అద్భుతమైన నిలకడ, పరుగుల వరదతో ఎన్నో చారిత్రాత్మక రికార్డులను సొంతం చేసుకున్నప్పటికీ, రోహిత్ శర్మ పేరిట ఉన్న ఈ ఐదు అరుదైన రికార్డులు ఇప్పటికీ ప్రత్యేక స్థానాన్ని నిలబెట్టుకున్నాయి. ముఖ్యంగా వన్డేల్లో 264 పరుగులు, మూడు డబుల్ సెంచరీలు, ఒకే ప్రపంచకప్లో ఐదు శతకాలు వంటి ఘనతలు భవిష్యత్తులో కూడా చెరగని రికార్డులుగా నిలిచే అవకాశముంది.