‘రాజావారు రాణివారు’తో హీరోగా గుర్తింపు తెచ్చుకున్న కిరణ్ అబ్బవరం ఆ తర్వాత శ్రీధర్ గాదె దర్శకత్వంలో నటించిన ‘ఎస్.ఆర్.కళ్యాణమండపం’ చిత్రం జనాన్ని భలేగా ఆకట్టుకుంది. దాంతో వారిద్దరి కాంబోలో తెరకెక్కిన ‘నేను మీకు బాగా కావలసిన వాడిని’ చిత్రంపైనా అంచనాలు నెలకొన్నాయి. మరి ఈ కావలసినవాడి కథ విషయానికి వస్తే – కాసేపట్లో పెళ్ళి అనగా పెళ్ళికూతురు లేచిపోతుంది. దాంతో ఆమె తండ్రికి హార్ట్ ఎటాక్ వస్తుంది. వేరే ఊరు చేరిన హీరోయిన్ ఆ తరువాత పురుష ద్వేషిగా మారి తాగుడుకి బానిస అవుతుంది. ఓ సారి పబ్ ఓ ఆకతాయి ఆమెను టీజ్ చేస్తాడు. వాడితో గొడవపడుతుంది. ఆపై క్యాబ్ డ్రైవర్ వచ్చి ఆమెను తన కారులో తీసుకువెళతాడు. మధ్యలో ఆకతాయిగాడు మళ్ళీ ఆమెను పట్టుకోబోతే డ్రైవర్ రక్షిస్తాడు. ఆ లేచిపోయిన అమ్మాయి హీరోయిన్, అమ్మాయిని కాపాడిన డ్రైవర్ హీరో. ఆ తర్వాత ఒకరికొకరు తమ తమ కథలు చెప్పుకుంటారు. ప్రేమించిన వాడు మోసం చేశాడని ఆమె తన కథ చెబుతుంది. తాను ప్రేమించిన అమ్మాయి అన్నా అని పిలిచి తను ప్రేమించిన వాడిని చేసుకుని వెళ్ళి పోయిందని అతను చెబుతాడు. ఆ తర్వాత హీరోయిన్ కు నచ్చ చెప్పి కన్నవారి దగ్గరకు వెళ్ళమని, ఆదరిస్తారని చెబుతాడు. అందుకు అంగీకరించిన ఆమెను తన కారులోనే దించుతాడు. ఈ నేపథ్యంలో ఒకరిపై ఒకరికి అభిమానం పెరుగుతుంది. ఇంట్లో వాళ్ళు ఆదరించారని పొంగిపోయి దీనంతటికీ కారణమైన హీరోను కలసి ఓ విషయం చెప్పాలని అంటోంది. అతనిపై తన ప్రేమను వ్యక్తం చేయాలనుకుంటుంది. అప్పుడే హీరో ఓ విషయం రివీల్ చేస్తాడు. అదేమిటి? హీరోయిన్ హీరోకి ఏం చెప్పాలనుకుంటుంది? చివరికి ఏం జరిగిందన్నది ఈ సినిమా.
నటీనటులు విషయానికి వస్తే కిరణ్ అబ్బవరం తన పాత్రకు తగ్గ అభినయం ప్రదర్శించారు. సంజనా ఆనంద్ పరవాలేదనిపించింది. మిగగిలిన పాత్రధారులు తమ పరిధి మేరకు నటించారు. మణిశర్మ బాణీలు మాత్రం ఈ చిత్రానికి బలాన్నిచ్చాయి. నేపథ్యం సంగీతం కూడా బలం చేకూర్చిందనే చెప్పవచ్చు. ప్రథమార్ధంలో హీరో పాత్ర నిడివి చాలా తక్కువ. కథ కూడా సహనాన్ని పరీక్షిస్తుంది. ద్వితీయార్ధం ఊపందుకున్నా పాత చింతకాయ వాసనే తగులుతుంది. టోటల్ గా కథను పరికించి చూస్తే కృష్ణవంశీ తెరకెక్కించిన `శశిరేఖా పరిణయం` గుర్తుకు రాకమానదు. కోడిరామకృష్ణ కుమార్తె దీప్తి నిర్మాతగా మారి తీసిన ఈ సినిమా నిర్మాణాత్మక విలువలు బాగానే ఉన్నాయి. మణిశర్మ పాటల్లో ఐటమ్ సాంగ్ మినహా అన్నీ అలరించాయి. ‘మనసే చిలకలా…’, ‘మనసొక మాట అంది…’, ‘రా… లాయర్ పోరీ…’, ‘నచ్చావబ్బాయి…’ అంటూ సాగే పాటలు, వాటి చిత్రీకరణ ఆకట్టుకుంది. ఒక్క మాటలో చెప్పాలంటే మణిశర్మ సంగీతం లేకపోతే సినిమాగా చెప్పుకునేది ఏమీలేదనే చెప్పాలి.
ప్లస్ పాయింట్స్:
– ఆకట్టుకొనే మణిశర్మ సంగీతం
– క్లయిమాక్స్ ట్విస్ట్
– నిర్మాణ విలువలు
మైనస్ పాయింట్స్:
– కొత్తదనం లేని కథ, కథనం
– అలరించని సన్నివేశాలు, సంభాషణలు
– ఆకట్టుకోలేక పోయిన పాత్రౌచిత్యం
రేటింగ్: 2/5
ట్యాగ్ లైన్: ఏమాత్రం కావలసినవాడు కాదు!
