Mahasakthi Review: మహాశక్తి రివ్యూ

Mahasakthi Review: నయనతార ప్రధాన పాత్రలో వచ్చిన ‘మూకుత్తి అమ్మన్’ (తెలుగులో అమ్మోరు తల్లి) మంచి విజయం సాధించిన సంగతి తెలిసిందే. దానికి సీక్వెల్‌గా, సుందర్ సి దర్శకత్వంలో భారీ అంచనాల నడుమ థియేటర్లలోకి వచ్చిన డెవోషనల్ ఫాంటసీ థ్రిల్లర్ ‘మూకుత్తి అమ్మన్ 2’ తెలుగులో ‘మహాశక్తి’. కోలీవుడ్‌తో పాటు టాలీవుడ్‌లోనూ డబ్బింగ్ సినిమాగా విడుదలైన ఈ సినిమా ప్రేక్షకులను ఏ మేరకు మెప్పించిందో రివ్యూలో పరిశీలిద్దాం.

కథ

శక్తి (నయనతార) ఓ నిజాయితీ గల పోలీస్ ఆఫీసర్. తన పెంపుడు తల్లి బాలమ్మ (ఊర్వశి)తో కలిసి జీవిస్తుంటుంది. అయితే, కొంతకాలంగా శక్తికి వింత కలలు వస్తుంటాయి. ఎవరో గుర్తుతెలియని వ్యక్తులు మైలాంచి అనే గ్రామానికి రమ్మని పదే పదే పిలుస్తున్నట్లు ఆమెకు పీడకలలు వెంటాడుతుంటాయి. ఈ కలల వెనుక ఉన్న ఆంతర్యం ఏమిటో తెలుసుకోవాలని భావించిన శక్తి, మైలాంచి గ్రామానికి ట్రాన్స్ఫర్ కోరి మరీ వెళ్తుంది. అక్కడ ఆమెకు భైరి (రెజీనా కసాండ్రా) రూపంలో ఉన్న ఒక దుష్టశక్తి ఎదురవుతుంది. అసలు శక్తికి ఆ ఊరికి ఉన్న సంబంధం ఏమిటి? గ్రామ దేవత అంశతో ముడిపడిన ఆ రహస్యం ఏమిటి? భైరిని శక్తి ఎలా ఎదుర్కొంది? అన్నదే మిగతా కథ. ఇందులో మంత్రి(దునియా విజయ్) పాత్ర ఏమిటి? అనేది తెలియాలంటే సినిమాని బిగ్ స్క్రీన్ మీద చూడాల్సిందే.

విశ్లేషణ
సాధారణంగా డెవోషనల్ ఫాంటసీ సినిమాలకు ఒక పక్కా మీటర్ ఉంటుంది. నేటితరం ప్రేక్షకులు ఇలాంటి కథలను నమ్మాలంటే విజువల్స్ అద్భుతంగా అయినా ఉండాలి, లేదా కథనంలో బలమైన ఎమోషన్ అయినా పండాలి. ‘మహాశక్తి’ విషయంలో ఈ రెండూ గాడి తప్పాయి. ఒక గ్రామ దేవత అవతారం, గ్రామీణ నేపథ్యం, దైవిక శక్తి వర్సెస్ దుష్టశక్తి పోరాటం అనేది పేపర్ మీద మంచి డ్రామాకి ఆస్కారమున్న పాయింట్. మొదట్లో వచ్చే పీడ కలల ఎపిసోడ్లు సినిమాపై కాస్త ఆసక్తిని రేకెత్తించినా, అసలు కథ మైలాంచి గ్రామానికి చేరిన తర్వాత దర్శకుడు సుందర్ సి పట్టు కోల్పోయారు. రైటింగ్ పరంగా 90ల నాటి రొటీన్ ఫార్ములాను నమ్ముకోవడమే సినిమాకు పెద్ద మైనస్. కథలో ఎక్కడా కొత్తదనం కనిపించదు. ఫస్టాఫ్ కాస్త పర్వాలేదనిపించినా, సెకండాఫ్‌కు వచ్చేసరికి స్క్రీన్‌ప్లే పూర్తిగా ట్రాక్ తప్పింది. భారీ యుద్ధ సన్నివేశాలను తెరకెక్కించే క్రమంలో ఎమోషన్ డ్రైవ్ పూర్తిగా పక్కకు వెళ్లిపోయింది. ఇక సుందర్ సి బలం కామెడీ, కానీ ఇందులో ఇరికించిన యోగి బాబు కామెడీ ట్రాక్ కథాగమనానికి పెద్ద అడ్డంకిగా మారి విసుగు పుట్టిస్తుంది. సీనియర్ నటీమణులతో చేయించిన క్యామియోలు కూడా సినిమాకు ఎలాంటి మైలేజ్ ఇవ్వలేకపోయాయి. అన్నింటికంటే దారుణమైన విషయం ఏమిటంటే టెక్నికల్ అవుట్‌పుట్. మేకర్స్ ప్రచారం చేసిన ‘భారీ బడ్జెట్’ తెరపై ఎక్కడా కనిపించదు. నాసిరకం వీఎఫ్‌ఎక్స్ (VFX), అటవీ సన్నివేశాల్లో కృత్రిమంగా కొట్టొచ్చినట్లు కనిపించే ఏఐ (AI) విజువల్స్ సినిమా స్థాయిని దారుణంగా దిగజార్చాయి. ఒక డివోషనల్ ఫాంటసీ సినిమాకి గూస్‌బంప్స్ తెప్పించాల్సిన బ్యాక్‌గ్రౌండ్ స్కోర్, ఇక్కడ కేవలం చెవులు చిల్లులు పడే సౌండ్‌గా మాత్రమే మిగిలింది. భారీ తారాగణం, మంచి కాన్సెప్ట్ చేతిలో ఉన్నప్పటికీ.. బలహీనమైన దర్శకత్వం, అసహజమైన గ్రాఫిక్స్ వల్ల ‘మహాశక్తి’ ప్రేక్షకుడి సహనానికి పరీక్షగా మారింది.

నటీనటుల పనితీరు విషయానికి వస్తే శక్తి పాత్రకు నయనతార న్యాయం చేసినప్పటికీ, ఆమె స్థాయికి తగ్గ బలమైన సన్నివేశాలు చిత్రంలో పెద్దగా కనిపించవు. ఒకటి రెండు సన్నివేశాల్లో ఆమె ఎలివేషన్లు బాగున్నాయి. విలన్ పాత్రలో రెజీనా తనదైన నటనతో ఆకట్టుకుంటుంది. ఆమె స్క్రీన్ ప్రెజెన్స్, క్రూరమైన హావభావాలు మెప్పిస్తాయి. ఊర్వశి తన పరిధి మేరకు నటించింది. దునియా విజయ్, సునీల్, గరుడ రామ్ వంటి ప్రతిభావంతులైన నటులు ఉన్నప్పటికీ, వారి పాత్రలను సరిగ్గా తీర్చిదిద్దకపోవడంతో వారు వృథా అయ్యారనే చెప్పాలి. ఇక రెండో భాగంలో వచ్చే యోగి బాబు కామెడీ ట్రాక్ నవ్వించకపోగా విసుగు తెప్పిస్తుంది.

సాంకేతిక విభాగం విషయానికి వస్తే చిత్ర బృందం ప్రచారం చేసుకున్న భారీ బడ్జెట్‌కు, తెరపై కనిపించే విజువల్స్‌కు అసలు పొంతన లేదు. చాలా చోట్ల నాసిరకం గ్రాఫిక్స్, కృత్రిమంగా అనిపించే అటవీ నేపథ్యాలు (AI వాడకం ప్రభావం స్పష్టంగా కనిపిస్తూ) తీవ్రంగా నిరాశపరుస్తాయి. హిప్‌హాప్ తమిళ అందించిన పాటలు అంతగా గుర్తుండవు. కొన్ని కీలక సన్నివేశాల్లో నేపథ్య సంగీతం అవసరానికి మించి శృతిమించి వినిపిస్తుంది. సుందర్ సి సాధారణంగా రొటీన్ కథలను కూడా వినోదాత్మకంగా నడిపించడంలో దిట్ట. కానీ ఈ చిత్రంలో ఆయన మార్కు వినోదం లోపించింది. కాగితంపై ఆసక్తికరంగా అనిపించే విలేజ్ డెయిటీ పాయింట్‌ను తెరపైకి తీసుకురావడంలో వెంకట్ రాఘవన్ స్క్రీన్‌ప్లే చాలా పాత పద్ధతిలో సాగింది. గోపీ అమర్‌నాథ్ సినిమాటోగ్రఫీ సాధారణంగా ఉంది. దాదాపు రెండున్నర గంటల నిడివి ఉన్నప్పటికీ, ముఖ్యంగా సెకండాఫ్‌లోని యుద్ధ సన్నివేశాలు సాగదీతగా అనిపించి ఎడిటింగ్‌పై అసంతృప్తి మిగుల్చుతాయి.
మంచి కాన్సెప్ట్ ఉన్నప్పటికీ, పాతకాలపు కథనం, పేలవమైన విజువల్ ఎఫెక్ట్స్, తేలిపోయిన ద్వితీయార్థం కారణంగా ‘మహాశక్తి’ ఒక నీరసమైన భక్తి-ఫాంటసీ డ్రామాగా మిగిలిపోయింది. థియేటర్లలో చూడటానికి పెద్దగా సహనానికి పరీక్ష పెట్టే సినిమా ఇది.

ఫైనల్లీ ‘మహాశక్తి’..సహనానికి పరీక్ష