తెలంగాణలో నామినేటెడ్ పదవు భర్తీ వ్యవహారం కొలిక్కి వచ్చిందా? ఇన్నాళ్లు ఎప్పటికప్పుడు వాయిదా పడుతున్నా…ఇక సమయం లేదు మిత్రమా అంటున్నారా? ఆల్రెడీ లిస్ట్ మొత్తం సిద్ధమైపోయి కేవలం ఢిల్లీ స్టాంప్ కోసం ఎదురు చూస్తోందా? వాయిదాల కారణంగా పెరుగుతున్న అసంతృప్తిని పసిగట్టిన అగ్ర నాయకత్వం ఇక డూ ఫెస్టివల్ అంటోందా? ఇంతకీ భర్తీ ఎప్పుడు?
తెలంగాణలో నామినేటెడ్ పోస్టుల భర్తీ కొలిక్కి వస్తున్నట్టు తెలుస్తోంది. ఇటీవల హస్తినకు వెళ్లిన పిసిసి చీఫ్ మహేష్ గౌడ్…ఇన్ఛార్జ్ మీనాక్షి నటరాజన్తో కొన్ని పదవులకు ఆమోద ముద్ర వేయించినట్టు చెప్పుకుంటున్నారు. భర్తీ విషయమై ఎప్పటికప్పుడు వాయిదా పర్వం నడుస్తున్న క్రమంలో కాంగ్రెస్ కేడర్ బాగా అసంతృప్తితో ఉంది. ఆ సంగతి గ్రహించిన అధిష్టానం వీలైనంత త్వరగా పని పూర్తి చేయాలన్న ఆలోచనతో ఉందట. అధికారంలో ఉండి కూడా…. పదవులు ఇవ్వకపోవడంతో వృధాగా కాలం గడిచిపోతోందన్న చర్చ పెరుగుతోంది. ఇన్నాళ్లు వాయిదా వేసిన ప్రతిసారి… ఈ నెలాఖరు వరకు అని చెప్పుకుంటూ వస్తున్నారు పీసీసీ అధ్యక్షుడు.
ఇక మీదట ఇలాంటి స్టేట్మెంట్స్తో కాలం వెళ్ళదీయడం కష్టమైన పనిగానే కనిపిస్తోంది. దీంతో… దసరా లోపు పదవుల్ని భర్తీ చేయాలన్న ఆలోచనకు పార్టీ పెద్దలు వచ్చినట్టు తెలుస్తోంది. వివిధ సంస్థల డైరెక్టర్స్ నియామకం, కార్పొరేషన్ చైర్మన్స్ ఎంపిక కోసం ఇప్పటికే కొంత కసరత్తు జరిగింది. నియోజకవర్గాల వారీగా పేర్లు తీసుకుని లిస్ట్ సిద్ధం చేశారట. ఆ రకంగా ఒకే సారి.. రెండు.. మూడు వేల మంది పార్టీ నాయకులకు పదవులు ఇచ్చి పండగ వాతావరణం కల్పించేలా ప్రణాళిక సిద్ధం చేస్తున్నట్టు తెలుస్తోంది.
సాధారణంగా పార్టీలో పదవుల భర్తీ వ్యవహారాన్ని PCC చీఫ్ మహేష్ గౌడ్… సీఎం రేవంత్ రెడ్డి, డిప్యూటీ సీఎం భట్టి విక్రమార్క, మంత్రి ఉత్తమ్కుమార్రెడ్డితో కలిసి రాష్ట్ర వ్యవహారాల ఇన్చార్జ్ పర్యవేక్షిస్తారు. ఈ క్రమంలో ఇప్పటికే అన్ని నియోజకవర్గాల నుంచి ఆశావహుల జాబితా సిద్ధంగా ఉంది కాబట్టి…త్వరలోనే ఢిల్లీకి వెళ్ళి ఆమోదముద్ర వేయించే పనిలో ఉన్నట్టు తెలుస్తోంది. ఇప్పటికే… పార్టీ అధికారంలోకి వచ్చిన కొత్తల్లో ఇచ్చిన 37 కార్పొరేషన్ల ఛైర్మన్స్ పదవీ కాలం ముగిసింది. వీరిలో కొందరికి రెన్యువల్ చేయాల్సి ఉంది. ఆ రెన్యువల్ జాబితా పై కూడా వీలైనంత త్వరగా నిర్ణయం తీసుకోవచ్చని అంటున్నారు. మహా… అయితే వాళ్ళలో ఐదుగురికి మించి తిరిగి ఇవ్వకపోవచ్చని అంటున్నారు. ఏది ఏమైనా…. అన్నిటినీ కలిపి ఒకేసారి అతి త్వరలోనే లిస్ట్ విడుదల చేయవచ్చంటున్నారు. సో… కాంగ్రెస్ లీడర్స్….. డూ ఫెస్టివల్.
