Gold Hunt: ఓ వైపు తుఫాన్.. మరోవైపు ఉప్పాడ తీరంలో బంగారం కోసం వేట..

ఆంధ్రప్రదేశ్ కాకినాడ జిల్లాలోని ప్రసిద్ధ ఉప్పాడ సముద్రతీరంలో బంగారం కోసం స్థానికులు వేట కొనసాగించడం మళ్లీ చర్చనీయాంశంగా మారింది. తీవ్ర తుఫానులు, అల్పపీడనాల ప్రభావంతో సముద్రం విపరీతంగా అల్లకల్లోలంగా మారినప్పుడు తీరానికి బంగారం కొట్టుకువస్తుందనే నమ్మకంతో స్థానిక మత్స్యకారులు, ప్రజలు గుంపులు గుంపులుగా తీరానికి చేరుకుంటున్నారు. అలలు వచ్చి పడే ఇసుక తిన్నెల వద్ద చిన్న చిన్న వలలు, జల్లెడలు, పళ్లాలు చేతపట్టుకుని ఇసుకను వడపోస్తూ బంగారం తునకల కోసం గాలిస్తున్నారు.

తీవ్రమైన గాలులు, రాక్షసి అలల దాటికి సముద్ర తీరం భారీగా కోతకు గురికావడమే ఇందుకు ప్రధాన కారణమని చెబుతుంటారు. గతంలో సముద్ర తీరంలో ఉన్న పాత ఇళ్లు, పురాతన గుళ్లు, పూజా స్థలాలు సముద్ర కోత వల్ల నీటిలో మునిగిపోయాయి. తుఫాను సమయంలో సముద్రం తీవ్రంగా ఎగిసిపడినప్పుడు, అడుగున ఉన్న ఇసుక కదిలి పూర్వకాలంలో మునిగిపోయిన ఆభరణాల విభాగాలు, చిన్న చిన్న బంగారు పూసలు అలల వేగానికి ఒడ్డుకు కొట్టుకువస్తాయని భావిస్తారు.

కొద్దిమందికి నిజంగానే చిన్నపాటి బంగారు రేణువులు లభించడంతో ఈ వార్త చుట్టుపక్కల గ్రామాలకు వ్యాపించి వందలాది మంది మహిళలు, పిల్లలు, వృద్ధులు తీరం వెంట గాలించడానికి పోటీపడుతున్నారు. తుఫాను హెచ్చరికల వల్ల వేటకు వెళ్లే అవకాశం లేక ఆదాయం కోల్పోయిన మత్స్యకారులకు ఈ బంగారం వెతుకులాట ఒక ఆశగా మారింది. అయితే సముద్రపు అలలు ఉధృతంగా ఉన్న సమయంలో తీరం వద్ద ఇలా వెతకడం ప్రమాదకరమని అధికారులు హెచ్చరిస్తున్నప్పటికీ, అదృష్టాన్ని పరీక్షించుకోవడానికి ప్రజలు పెద్ద ఎత్తున తీరానికి తరలివస్తూనే ఉన్నారు.