TVK: నీట్‌ను పూర్తిగా రద్దు చేయాలి.. టీవీకే పార్టీ సంచలన డిమాండ్

TVK: నీట్ (NEET) పేపర్ లీకేజీలు, విద్యార్థుల ఆందోళనల నేపథ్యంలో తమిళనాడులోని అధికార పక్షం తమిళగ వెట్రి కజగం (TVK) తన స్వరాన్ని మరింత పెంచింది. తమిళనాడు ముఖ్యమంత్రి ‘దళపతి’ విజయ్ నాయకత్వంలోని టీవీకే పార్టీ, కేవలం నీట్ పరీక్షలో జరిగే అక్రమాలను వ్యతిరేకించడమే కాకుండా, ఈ జాతీయ స్థాయి వైద్య ప్రవేశ పరీక్షను దేశవ్యాప్తంగా పూర్తిగా రద్దు చేయాలని డిమాండ్ చేసింది. అంతేకాకుండా, వైద్య విద్యకు సంబంధించిన అంశాలపై రాష్ట్ర ప్రభుత్వాలకే పూర్తి అధికారాలు ఇవ్వాలని స్పష్టం చేసింది.

దేశ రాజధాని ఢిల్లీలో నీట్‌కు వ్యతిరేకంగా విద్యార్థుల నిరసనలు ఉధృతమవుతున్న తరుణంలో, నీట్‌ను పూర్తిగా రద్దు చేయడమే తమ రాజీలేని, స్పష్టమైన వైఖరి అని టీవీకే ప్రకటించింది. గత 2021 అసెంబ్లీ ఎన్నికల సమయంలో తాము అధికారంలోకి వస్తే నీట్‌ను రద్దు చేస్తామని హామీ ఇచ్చి ఓట్లు దండుకున్నారని పరోక్షంగా ప్రధాన ప్రతిపక్షమైన డీఎంకేను లక్ష్యంగా చేసుకుని విమర్శలు గుప్పించింది. తాము అలా ఓట్ల కోసం ప్రజలను మభ్యపెట్టే “కపట రాజకీయం” ఎప్పటికీ చేయబోమని తేల్చిచెప్పింది.

ఈ సమస్యకు శాశ్వత పరిష్కారంగా భారత రాజ్యాంగంలో ప్రస్తుతం ‘ఉమ్మడి జాబితా’ (Concurrent List) లో ఉన్న విద్యా రంగాన్ని తిరిగి ‘రాష్ట్ర జాబితా’ (State List) లోకి మార్చాలని టీవీకే డిమాండ్ చేసింది. దీనికి ఏవైనా చట్టపరమైన లేదా సాంకేతికపరమైన అడ్డంకులు ఉంటే, తాత్కాలిక పరిష్కారంగా ఒక ప్రత్యేక ఉమ్మడి జాబితాను ఏర్పాటు చేసి, వైద్య విద్యతో సహా మొత్తం విద్యా రంగంపై రాష్ట్రాలకే పూర్తి అధికారాలు కల్పించాలని కోరింది. ఇతరుల కష్టాన్ని, ఆలోచనలను, పోరాటాలను తమ ఖాతాలో వేసుకుంటూ స్వార్థ రాజకీయం చేసేవారు టీవీకేను విమర్శించడం తక్షణమే ఆపాలని హితవు పలికింది.