తాడిపత్రిలో అల్లర్లపై కొనసాగుతున్న సిట్ దర్యాప్తు
ఏపీలో ఎన్నికల సమయంలో ఘర్షణలపై సిట్ దర్యాప్తు కొనసాగుతోంది. తిరుపతి, పల్నాడు, తాడిపత్రిలోనే సిట్ అధికారులు మకాం వేసింది. అవసరమైతే మరోసారి అల్లర్లు జరిగిన ప్రాంతానికి సిట్ టీమ్ వెళ్లనుంది. జిల్లాల్లో పోలీసులు కేసులు విచారిస్తున్న తీరుపై సిట్ మరో నివేదిక ఇచ్చే అవకాశం కూడా ఉంది. ఆంధ్రప్రదేశ్ లో కౌంటింగ్ సమయం దగ్గర పడుతుండటంతో ముమ్మర తనిఖీలు చేస్తున్నారు. రాష్ట్ర వ్యాప్తంగా 168 సమస్యాత్మక ప్రాంతాలను ఇప్పటికే గుర్తించారు. పోలింగ్ తర్వాత అల్లర్లలో పాల్గొన్న వారిపై సిట్ అధికారులు ప్రత్యేకంగా ఫోకస్‌ పెట్టింది. దీంతో అనంతపురం జిల్లా తాడిపత్రిలో జరిగిన అల్లర్ల ఘటనపై సిట్ బృందం దర్యాప్తు కొనసాగుతుంది. కేసుల వివరాలు, నిందితుల గుర్తింపులాంటి అంశాలపై పరిశీలిస్తున్నారు. గొడవలకు గల కారణాలను పూర్తి స్థాయిలో విచారించి నివేదిక సిద్ధం చేసే పనిలో సిట్ బృందం ఉంది. మరో వైపు తాడిపత్రి అల్లర్ల ఘటనలో అరెస్టులు కొనసాగుతున్నాయి. కాగా, వైఎస్సాఆర్ కాంగ్రెస్ పార్టీ ఎమ్మెల్యే అభ్యర్థి కేతిరెడ్డి పెద్దారెడ్డితో పాటు టీడీపీ అభ్యర్థి జేసి అస్మిత్ రెడ్డిలకు కూడా హైకోర్టులో ఊరట దక్కింది. జూన్ 6వ తేదీ వరకు అరెస్టు చేయవద్దు అంటూ హైకోర్టు ఆదేశాలు జారీ చేసింది. నియోజకవర్గంలోకి వెళ్ళ వద్దంటూ కేతిరెడ్డి పెద్దారెడ్డి, జేసీ అస్మిత్ రెడ్డికి న్యాయస్థానం సూచించింది. తాడిపత్రిలో కౌంటింగ్ పూర్తి అయ్యే వరకు సిట్ అధికారులు జిల్లాలోనే మకాం వేయనున్నారు. ఇప్పటికే 639 మంది అల్లర్లు , రాళ్లదాడిలో పాల్గొన్నట్లు పోలీసులు గుర్తించారు. కాగా, 102 మందిని అరెస్టు చేసి రిమాండ్ కు తరలించారు. అల్లర్లలో పాల్గొన్న నిందితులందరూ ఇతర రాష్ట్రాల్లో తలదాచుకున్నట్లు పోలీసులు అనుమానిస్తున్నారు. నిందితులను అరెస్టు చేయడానికి చర్యలు వేగవంతం చేసిన పోలీసు అధికారులు.. కౌంటింగ్ రోజు తాడిపత్రిలోకి బయట వారు రాకుండా అష్టదిగ్బంధం చేయడానికి అధికారుల కసరత్తు చేస్తున్నారు.
పిన్నెల్లి సహా ఎమ్మెల్యే అభ్యర్థుల ముందస్తు బెయిల్ పిటిషన్లపై హైకోర్టు కీలక ఆదేశాలు
పిన్నెల్లి రామకృష్ణారెడ్డి సహా ఎమ్మెల్యే అభ్యర్థుల ముందస్తు బెయిల్ పిటిషన్లపై ఏపీ హైకోర్టు కీలక ఆదేశాలు జారీ చేసింది. జూన్ 5వ తేదీ వరకు ఎలాంటి చర్యలు తీసుకోవద్దని తెలిపింది. తదుపరి విచారణ జూన్ 6కి వాయిదా వేస్తున్నట్లు పేర్కొనింది. సాక్షులను ప్రభావితం చేయకూడదంటూ అభ్యర్థులకు షరతు విధించింది. అలాగే, ఎమ్మెల్యే అభ్యర్థులపై ప్రత్యేక నిఘా ఉంచాలని ఈసీకి హైకోర్టు ఆదేశాలు ఇచ్చింది. ఎమ్మెల్యే అభ్యర్థులు కౌంటింగ్ ప్రక్రియ పర్యవేక్షించాలని, కౌంటింగ్ ఏజెంట్లను మానిటర్ చేయాలి కాబట్టి.. అభ్యర్థులపై ముందస్తు చర్యలు తీసుకోకుండా చూడాలన్న పిటిషనర్ వాదనలతో ఏకీభవించిన కోర్టు.. అభ్యర్థులు కాకుండా కేసుల్లో నిందితులుగా ఉన్న వారి.. ముందస్తు బెయిల్ పిటిషన్లను ఈ నెల 30వ తేదీన విచారిస్తామన్న హైకోర్టు వెల్లడించింది.
శ్రీవారి భక్తులకు గుడ్ న్యూస్.. నేడు ప్రత్యేక ప్రవేశ దర్శన టికెట్లు విడుదల..
తిరుమల శ్రీవారి భక్తులకు టీటీడీ గుడ్ న్యూస్ చెప్పింది. ఇవాళ (శుక్రవారం) ఉదయం 10 గంటలకు తిరుమల శ్రీవారి ప్రత్యేక ప్రవేశ దర్శనం 300 రూపాయల టికెట్లను తిరుమల తిరుపతి దేవస్థానం ఆన్‌లైన్‌లో రిలీజ్ చేయనుంది. అంతేకాదు నేటి (మే 24న) మధ్యాహ్నం 3 గంటలకు తిరుమల, తిరుప‌తిల‌లో ఉన్న వసతి గదుల కోటాను ఆన్‌లైన్‌లో విడుదల చేయబోతుంది. తిరుమల, తిరుపతి శ్రీవారి సేవ కోటాను మే 27 (సోమవారం)న ఉదయం 11 గంటలకు, మధ్యాహ్నం 12 గంటలకు న‌వ‌నీత సేవ, మధ్యాహ్నం 1 గంట‌కు ప‌ర‌కామ‌ణి సేవ ఆన్‌లైన్‌లో టికెట్లను విడుదల చేయనుంది టీటీడీ. భక్తులు ఈ టికెట్లను https://ttdevasthanams.ap.gov.in వెబ్‌సైట్ ద్వారా శ్రీవారి ఆర్జిత సేవ, దర్శన టికెట్లను బుక్ చేసుకునే అవకాశం టీటీడీ కల్పించింది. ఇక, తిరుమలలోని వైకుంఠం క్యూ కాంప్లెక్స్ లోని కంపార్టుమెంట్లని నిండిపోయి వెలుపల క్యూ లైన్లలో భక్తులు వేచి ఉన్నారు. టోకెన్ లేని భక్తుల సర్వ దర్శనానికి 20 గంటల సమయం పడుతుంది. కాగా, నిన్న శ్రీవారిని 65, 416 మంది భక్తులు దర్శించుకున్నారు. తలనీలాలు 36, 128 మంది భక్తులు సమర్పించుకున్నారు. శ్రీవారి హుండి ఆదాయం 3.51 కోట్ల రూపాయలు వచ్చినట్లు టీటీడీ తెలిపింది.
నేటి నుంచి తెలంగాణ ఇంటర్ సప్లిమెంటరీ పరీక్షలు
తెలంగాణ రాష్ట్ర ఇంటర్ అడ్వాన్స్‌ సప్లిమెంటరీ పరీక్షలు ఇవాళ్టి నుంచి ప్రారంభంకానున్నారు. ప్రభుత్వం ప్రకటించిన షెడ్యూల్‌ ప్రకారమే ఇవాల్టి నుంచి జూన్ 3 వరకు పరీక్షలు నిర్వహించనున్నారు. ఆయా తేదీల్లో ఇంటర్ మొదటి సంవత్సరం పరీక్షలు ఉదయం 9 గంటల నుంచి మధ్యాహ్నం 12 గంటల వరకు జరుగగా.. సెకెండియర్‌ పరీక్షలు మధ్యాహ్నం 2.30 నుంచి సాయంత్రం 5.30 గంటలకు వరకు జరుగనున్నాయి. కాగా.. ఇప్పటికే సప్లిమెంటరీ పరీక్షల హాల్‌టికెట్లను ఇంటర్ బోర్డు అధికారిక వెబ్‌సైట్‌లో అందుబాటులో ఉంచిన సంగతి తెలిసిందే. ఇక విద్యార్థులు తమ రూల్ నెంబరు, పుట్టినతేదీ వివరాలు నమోదుచేసి హాల్‌టికెట్లు డౌన్‌లోడ్ చేసుకోవచ్చు. ఇంటర్మీడియట్ విద్యార్థులకు థియరీ పరీక్షలు ముగిశాక మళ్లీ జూన్ 4 నుంచి 8 వరకు ప్రాక్టికల్ పరీక్షలు నిర్వహించనున్నారు. ఇక ఆయా తేదీల్లో ఉదయం 9 గంటల నుంచి 12 వరకు మొదటి సెషన్‌లో.. మధ్యాహ్నం 2 గంటల నుంచి సాయంత్రం 5 గంటల వరకు రెండో సెషన్‌లో ప్రాక్టికల్ పరీక్షలు నిర్వహిస్తారు. అంతేకాకుండా.. ఇంటర్ ప్రథమ సంవత్సరం విద్యార్థులకు జూన్ 10న ఇంగ్లిష్ ప్రాక్టికల్ పరీక్ష నిర్వహించనున్నారు. ఇక ఉదయం 9 గంటల నుంచి పరీక్ష నిర్వహిస్తారు. కాగా.. ఇంటర్నల్ పరీక్షలకు సంబంధించి.. జూన్ 11న ఎన్విరాన్‌మెంటల్ ఎడ్యుకేషన్ పరీక్ష.. జూన్ 12న ఎథిక్స్ అండ్ హ్యుమ‌న్ వాల్యూస్ పరీక్షలు నిర్వహించనున్నారు. ఇక ఆయా తేదీల్లో ఉదయం 10 నుంచి మధ్యాహ్నం ఒంటి గంట వరకు పరీక్షలు జరుగనున్నాయి.
నేడే పాలీసెట్ పరీక్ష.. నిమిషం ఆలస్యమైనా నో ఎంట్రీ..
తెలంగాణ రాష్ట్రంలోని పాలిటెక్నిక్ కళాశాలల్లో 2024-25 విద్యా సంవత్సరానికి వివిధ పాలిటెక్నిక్ కళాశాలల్లో ప్రవేశాల కోసం నిర్వహించనున్న పాలీసెట్ పరీక్షకు అధికారులు అన్ని ఏర్పాట్లు పూర్తి చేశారు. నేడు పరీక్ష ఉదయం 11 గంటల నుండి మధ్యాహ్నం 1.30 గంటల వరకు నిర్వహించబడుతుంది , పరీక్ష ప్రారంభానికి ఒక గంట ముందుగా కేంద్రాలలోకి ప్రవేశం ప్రారంభమవుతుంది. ఉదయం 11 గంటల తర్వాత అభ్యర్థులను పరీక్ష హాలులోకి అనుమతించరు. రాష్ట్ర వ్యాప్తంగా 250 కేంద్రాల్లో జరిగే ఈ పరీక్షకు మొత్తం 92,808 మంది అభ్యర్థులు నమోదు చేసుకున్నారు. తెలంగాణ స్టేట్ బోర్డ్ ఆఫ్ టెక్నికల్ ఎడ్యుకేషన్ అండ్ ట్రైనింగ్, పాలీసెట్‌ను కలిగి ఉంది , విద్యార్థులు రెండు వైపులా OMR షీట్ వివరాలను పూరించి సంతకం చేయవలసిందిగా కోరింది. విద్యార్థులు తప్పనిసరిగా హెచ్‌బి బ్లాక్ పెన్సిల్, ఎరేజర్, బ్లూ లేదా బ్లాక్ బాల్ పెన్ను వెంట తీసుకెళ్లాలి. హాల్‌టికెట్‌పై ఫొటో ముద్రించని వారు పాస్‌పోర్టు సైజ్ ఫొటో, ఆధార్ కార్డు వెంట తీసుకెళ్లాలి. కేంద్రాల్లోకి సెల్‌ఫోన్లు, ఇతర ఎలక్ట్రానిక్ పరికరాలను అనుమతించరు. SBTET Google Play స్టోర్‌లోని దాని SBTET అప్లికేషన్‌లో POLYCET పరీక్షా కేంద్రం లొకేటర్‌ను అందుబాటులో ఉంచింది. అభ్యర్థులు తమ హాల్ టికెట్ నంబర్‌ను దరఖాస్తులో సమర్పించడం ద్వారా తమ కేంద్రాలను గుర్తించవచ్చు. వ్యవసాయం, పశువైద్యం , ఉద్యానవనాలలో డిప్లొమాతో పాటు రాష్ట్రంలోని ప్రభుత్వ , ప్రైవేట్ పాలిటెక్నిక్‌లలో మూడేళ్ల ఇంజనీరింగ్ , నాన్-ఇంజనీరింగ్ డిప్లొమా కోర్సులలో ప్రవేశానికి పాలిసెట్ నిర్వహించబడుతుంది.
60వేల మంది పోలీసులు, 51 కంపెనీల సెంట్రల్ ఫోర్స్… ఢిల్లీలో కట్టుదిట్టమైన భద్రత
మే 25న ఢిల్లీలో ఓటింగ్‌కు ఢిల్లీ పోలీసులు పూర్తి స్థాయిలో సన్నాహాలు చేస్తున్నారు. ఎన్నికల రోజున ఢిల్లీలో దాదాపు 60 వేల మంది పోలీసులు భద్రత బాధ్యతలు చేపట్టనున్నారు. ప్రతి ప్రాంతంలో కట్టుదిట్టమైన భద్రతా ఏర్పాట్లు చేశారు. ఓటింగ్ కేంద్రం వద్ద కేవలం 33 వేల మంది ఢిల్లీ పోలీసులు మాత్రమే మోహరించనున్నారు. రాజస్థాన్, ఉత్తరాఖండ్, మధ్యప్రదేశ్‌లకు చెందిన 51 కంపెనీల పారామిలటరీ ఫోర్స్‌తో పాటు 17,500 మంది హోంగార్డులను కూడా విధుల్లోకి తీసుకోనున్నారు. సున్నిత ప్రాంతాలను డ్రోన్లతో పర్యవేక్షిస్తామని పోలీసులు తెలిపారు. దీంతో పాటు సరిహద్దుల్లో ఢిల్లీ పోలీసులపై గట్టి నిఘా ఉంటుంది. ఓటింగ్ సమయంలో సీసీ కెమెరాల ద్వారా కూడా నిఘా ఉంచనున్నారు. మే 25న రాజధాని ఢిల్లీలో ఓటింగ్ జరగనున్న నేపథ్యంలో ఢిల్లీ పోలీసులు కట్టుదిట్టమైన భద్రతా ఏర్పాట్లు చేశారు. డీసీపీ ఎలక్షన్ సెల్ సంజయ్ సెహ్రావత్ తెలిపిన వివరాల ప్రకారం.. మే 25న పోలింగ్ జరగనున్న నేపథ్యంలో పోలీసులు కట్టుదిట్టమైన ఏర్పాట్లు చేశారు. ఢిల్లీలో 2628 ఓటింగ్ కేంద్రాలు ఉండగా, వాటిలో 429 చాలా సున్నితమైనవిగా ప్రకటించబడ్డాయి. దీన్ని దృష్టిలో ఉంచుకుని ఓటింగ్ కేంద్రం వద్ద మొత్తం 33 వేల మంది ఢిల్లీ పోలీసులను మోహరిస్తున్నట్లు ఆయన తెలిపారు. మేము మొత్తం ఢిల్లీ గురించి మాట్లాడినట్లయితే, ఓటింగ్ కేంద్రాల వద్ద మోహరించిన ఢిల్లీ పోలీసు సిబ్బందితో సహా, ఓటింగ్ రోజున ఢిల్లీలోని వివిధ ప్రాంతాలలో సుమారు 60 వేల మంది ఢిల్లీ పోలీసు సిబ్బందిని మోహరిస్తారు, ఇందులో పిసిఆర్, స్పెషల్ బ్రాంచ్, సిబ్బంది ఉన్నారు. ట్రాఫిక్ పోలీసులు మరియు పెట్రోలింగ్ సిబ్బంది తదితరులు ఉన్నారు. దీనితో పాటు రాజస్థాన్, ఉత్తరాఖండ్, మధ్యప్రదేశ్‌లకు చెందిన 51 కంపెనీల పారామిలటరీ ఫోర్స్‌తో పాటు 17,500 మంది హోంగార్డులను కూడా విధుల్లోకి తీసుకున్నారు. డిసిపి ఎన్నికల సెల్ సంజయ్ సెహ్రావత్ ప్రకారం, డ్రోన్ల ద్వారా అత్యంత సున్నితమైన ప్రాంతాలను పర్యవేక్షిస్తారు. ఢిల్లీ సరిహద్దుల్లో కట్టుదిట్టమైన భద్రతా ఏర్పాట్లు చేశారు.
జార్ఖండ్ తర్వాత కేరళలో విస్తరిస్తున్న బర్డ్ ఫ్లూ .. అప్రమత్తమైన యంత్రాంగం
జార్ఖండ్ తర్వాత, ఇప్పుడు కేరళలోని పౌల్ట్రీ ఫామ్‌లలో బర్డ్ ఫ్లూ నిర్ధారించబడింది. మానర్కాడ్‌లోని ప్రభుత్వ ప్రాంతీయ కోళ్ల ఫారమ్‌లో ఏవియన్ ఫ్లూ (H5N1) వ్యాప్తి చెందినట్లు జిల్లా యంత్రాంగం ధృవీకరించింది. పౌల్ట్రీ ఫారమ్‌కు ఒక కిలోమీటరు పరిధిలో ఉన్న పెంపుడు పక్షులన్నింటినీ చంపాలని నిర్ణయం తీసుకున్నట్లు కొట్టాయం జిల్లా యంత్రాంగం ఒక ప్రకటనలో తెలిపింది. జిల్లాలో కోడి, బాతు, పిట్ట, ఇతర పక్షుల పౌల్ట్రీ ఉత్పత్తుల విక్రయాలను ప్రభుత్వం నిషేధించింది. ప్రభావిత ప్రాంతంలో క్రిమిసంహారక చర్యలు తీసుకుంటామని, పౌల్ట్రీ ఫారం నుండి 1 నుండి 10 కి.మీ వ్యాసార్థాన్ని నిఘా జోన్‌గా ప్రకటించామని ప్రకటనలో తెలిపారు. ఇది కాకుండా, రాష్ట్రంలోని కొట్టాయం జిల్లాలో చికెన్, బాతు, పిట్ట మరియు ఇతర పక్షుల పౌల్ట్రీ ఉత్పత్తుల అమ్మకం, దిగుమతిపై నిషేధం విధించబడింది. పశుసంవర్థక శాఖ ఆధ్వర్యంలో నిర్వహిస్తున్న పౌల్ట్రీ ఫారంలో ఏవియన్ ఫ్లూ వ్యాపించినట్లు జిల్లా కలెక్టర్ వి.విఘ్నేశ్వరి నిర్ధారించడంతో కలెక్టరేట్‌లో జరిగిన అంతర్‌శాఖల సమావేశంలో ఈ చర్యలు చేపట్టారు. ఫారంలో సుమారు తొమ్మిది వేల కోళ్లను పెంచినట్లు తెలిపారు. మధ్యప్రదేశ్‌లోని భోపాల్‌లోని నేషనల్ ఇన్‌స్టిట్యూట్ ఆఫ్ హై సెక్యూరిటీ యానిమల్ డిసీజ్ ల్యాబ్ ఫారమ్‌లో చనిపోయిన పెద్ద సంఖ్యలో కోళ్ల నమూనాలను పరీక్షించిన తర్వాత H5N1 వ్యాప్తిని నిర్ధారించింది. బుధవారం, జార్ఖండ్‌లోని రాంచీలోని పౌల్ట్రీ ఫామ్‌లో ఏవియన్ ఫ్లూ వ్యాప్తి చెందడంతో 920 పక్షులు చనిపోయాయి. రాంచీలోని ఓ పౌల్ట్రీ ఫామ్‌లో బర్డ్ ఫ్లూ కేసులు నమోదవడంతో జార్ఖండ్ ప్రభుత్వం బుధవారం అలర్ట్ ప్రకటించింది. ఈ సంఘటన తర్వాత, రాంచీలోని మోర్హబడిలో రామ్ కృష్ణ ఆశ్రమం నిర్వహిస్తున్న పౌల్ట్రీ ఫారం అయిన దివ్యాయన్ కృషి విజ్ఞాన కేంద్రంలో 770 బాతులతో సహా 920 పక్షులు చంపబడ్డాయి.
ఘోర రోడ్డు ప్రమాదం.. ఏడుగురు మృతి, 20 మందికి పైగా గాయాలు
ఢిల్లీ-జమ్మూ జాతీయ రహదారిపై శుక్రవారం ఉదయం జరిగిన ఘోర రోడ్డు ప్రమాదంలో ఒకే కుటుంబానికి చెందిన ఏడుగురు మరణించారు. ఈ ఘటనలో 20 మందికి పైగా తీవ్రంగా గాయపడ్డారు. ప్రస్తుతం అంబాలా ఆసుపత్రిలో చికిత్స పొందుతున్నారు. అంబాలాలో ఈ ప్రమాదం జరిగింది. అందుతున్న సమాచారం ప్రకారం.. ట్రక్కును మినీ బస్సు ఢీకొనడంతో ఈ ప్రమాదం జరిగింది. ట్రక్కు హైవేపై అకస్మాత్తుగా బ్రేకులు వేయడంతో వెనుక నుంచి వస్తున్న మినీ బస్సు ఢీకొందని పోలీసుల విచారణలో తేలింది. పోలీసులు తెలిపిన వివరాల ప్రకారం.. యూపీలోని బులంద్‌షహర్‌ నుంచి భక్తులు మాతా వైష్ణో దేవిని దర్శించుకునేందుకు మినీ బస్సులో వెళ్తున్నారు. తమ మినీ బస్సు కంటే ముందు వెళ్తున్న ట్రక్కు ఒక్కసారిగా బ్రేకులు వేసిందని ప్రమాదం నుంచి తృటిలో తప్పించుకున్న ఇతర వ్యక్తులు తెలిపారు. దీంతో మినీ బస్సు ట్రక్కును ఢీకొట్టింది. ఈ ఘటనలో చనిపోయిన ఏడుగురు ఒకే కుటుంబానికి చెందిన వారు. ఈ ఘటనలో గాయపడిన ముగ్గురు అక్కడికక్కడే మృతి చెందగా, నలుగురు వ్యక్తులు ఆస్పత్రిలో చికిత్స పొందుతూ మృతి చెందినట్లు పోలీసులు తెలిపారు. ఈ ప్రమాదంలో ఇప్పటి వరకు ఏడుగురు మరణించారని, పలువురి పరిస్థితి విషమంగా ఉందని వైద్యుల సమాచారం మేరకు అంబాలాలోని పడవ్ పోలీస్ స్టేషన్ ఎస్‌హెచ్‌ఓ దిలీప్ తెలిపారు. పరిస్థితి విషమంగా ఉన్న వారిని సమీపంలోని పెద్ద ఆసుపత్రికి తరలించారు. ఈ సంఘటనలో గాయపడిన వారిలో కొంతమంది సివిల్ ఆసుపత్రిలో చికిత్స పొందుతున్నారు. గాయపడిన వారిలో కొందరి పరిస్థితిని పరిగణనలోకి తీసుకొని ప్రైవేట్ ఆసుపత్రికి తరలించారు.
ఆ దర్శకుడితో మరో సినిమా చేయబోతున్న నాగార్జున..?
టాలీవుడ్ సీనియర్ స్టార్ హీరో అక్కినేని నాగార్జున నటించిన “నా సామిరంగ” సినిమా ఈ ఏడాది సంక్రాంతి కానుకగా రిలీజ్ అయి మంచి విజయం సాధించింది.ఈ సినిమాను కొత్త దర్శకుడు విజయ్ బిన్నీ తెరకెక్కించారు.ఈ సినిమా మలయాళం మూవీ రీమేక్ గా తెరకెక్కింది.ఈ సినిమాతో నాగార్జున కొరియోగ్రాఫర్‌ గా వున్న విజయ్ బిన్నీని దర్శకుడిగా పరిచయం చేశారు.ఈ సినిమాలో అల్లరి నరేష్ ,రాజ్ తరుణ్ కీలక పాత్రలు పోషించారు.సంక్రాంతికి ‘నా సామిరంగ’ సినిమాతో మంచి హిట్ అందుకున్న నాగార్జున ప్రస్తుతం ‘కుబేర’సినిమాతో బిజీగా ఉన్నారు. శేఖర్‌ కమ్ముల దర్శకత్వం వహిస్తున్న కుబేర సినిమాలో హీరోగా కోలీవుడ్ స్టార్ హీరో ధనుష్ నటిస్తుండగా నాగార్జున అతిథి పాత్రలో నటిస్తున్నారు.ఈ సినిమా తరువాత నాగార్జున ఎవరి డైరెక్షన్ లో నటిస్తున్నారు అని నాగార్జున ఫ్యాన్స్ ఎంతో ఆసక్తిగా ఎదురు చూస్తున్నారు.అయితే నాగార్జున తన తరువాత సినిమాను కూడా విజయ్ బిన్నీతోనే చేయనున్నట్లు సమాచారం.అయితే ఇటీవలే విజయ్‌కి అడ్వాన్స్‌ కూడా ఇచ్చారని సమాచారం. అయితే ఈ సారి సొంత కథతోనే వీరిద్దరి కాంబోలో సినిమా రానున్నట్లు సమాచారం.త్వరలోనే ఈ మూవీ గురించి అధికారిక ప్రకటన రానుంది.
నేడు క్వాలిఫయర్‌-2.. ఫైనల్‌కు వెళ్లేదెవరో!
ఐపీఎల్ 2024లో నేడు క్వాలిఫయర్‌-2 జరగనుంది. పాయింట్ల పట్టికలో రెండు, మూడు స్థానాల్లో నిలిచిన సన్రైజర్స్ హైదరాబాద్, రాజస్తాన్‌ రాయల్స్ క్వాలిఫయర్‌–2 సమరానికి సిద్ధమయ్యాయి. చెన్నైలోని చెపాక్‌ మైదానంలో శుక్రవారం రాత్రి 7.30కు మ్యాచ్ ఆరంభం కానుంది. ఈ మ్యాచ్‌లో గెలిచిన జట్టు ఆదివారం కోల్‌కతా నైట్‌ రైడర్స్‌తో జరిగే ఫైనల్‌లో తలపడుతుంది. ఓడిన జట్టు ఇంటికెళుతుంది. ఈ నేపథ్యంలో మ్యాచ్ రసవత్తరంగా సాగనుంది. క్వాలిఫయర్‌-1లో కోల్‌కతా చేతిలో చిత్తుగా ఓడిన సన్రైజర్స్.. రెండో అవకాశాన్నైనా ఉపయోగించుకోవాలనే పట్టుదలతో ఉంది. ఓపెనర్లు ట్రావిస్‌ హెడ్, అభిషేక్ శర్మలపైనే భారమంతా ఉంది. ఈ ఇద్దరు గత మ్యాచ్‌లో త్వరగా అవుట్ అయితే.. పరిస్థితి ఎలా ఉందో మనం చూసాం. దాంతో ఈ కీలక మ్యాచ్‌లో చెలరేగాలని టీం ఆశిస్తోంది. హేన్రిచ్ క్లాసెన్‌ ఫామ్‌ కొనసాగించడం కలిసొచ్చే అంశం. రాహుల్‌ త్రిపాఠి, నితీశ్‌ కుమార్‌ రెడ్డి, అబ్దుల్‌ సమద్‌ సహకరించాల్సి ఉంది. బ్యాటింగ్‌ను పటిష్టం చేసేందుకు ఐడెన్ మార్క్‌రమ్‌ లేదా గ్లెన్‌ ఫిలిప్స్‌లలో ఒకరిని ఆడించవచ్చు. విజయకాంత్‌ స్థానంలో లెగ్‌ స్పిన్నర్‌ మయాంక్‌ మార్కండేను తీసుకొని.. ఇంపాక్ట్‌ ద్వారా మరో బ్యాటర్‌ను ఆడించే అవకాశం ఉంది. అయితే బంతి ఆగి వచ్చే చెపాక్‌లో ఆడడం స్ట్రోక్‌ప్లే బ్యాటర్లకు సవాలే. ఇక్కడ స్పిన్నర్లు కీలక పాత్ర పోషించనున్నారు. చెపాక్‌లో ఎంతో క్రికెట్‌ ఆడిన అశ్విన్, చహల్‌లు హెడ్, అభిషేక్, క్లాసెన్‌లను త్వరగా వెనక్కి పంపి మ్యాచ్‌పై రాజస్థాన్ పట్టు సాధించే అవకాశాలు ఉన్నాయి. చెపాక్‌ పిచ్‌పై షహబాజ్‌తో పాటు మరో స్పిన్నర్‌ జట్టుకు అవసరం. పేస్‌ బౌలింగ్‌లో భువనేశ్వర్, కమిన్స్‌లతో పాటు సొంత మైదానంలో ఆడుతున్న నటరాజన్‌ కీలకం అవుతారు. మరోవైపు రాజస్థాన్ వరుస పరాభవాల నుంచి తేరుకుని ఎలిమినేటర్‌లో విజయంతో ఉత్సాహంగా ఈ పోరుకు సిద్ధం అయింది. రాజస్థాన్ అన్ని విభాగాల్లో పటిష్టంగానే ఉంది. జైస్వాల్‌, శాంసన్‌, రియాన్‌ పరాగ్‌, హెట్‌మయర్‌, పావెల్, కోలర్, జురేల్ వంటి వారితో రాజస్థాన్ బ్యాటింగ్‌ లైనప్‌ బాగుంది. వీరిని నిలువరించడం హైదరాబాద్ బౌలర్లకు సవాలే. అగ్రశ్రేణి స్పిన్నర్లు అశ్విన్, చహల్‌.. పేసర్ బౌల్ట్ జట్టు భారం మోస్తారు. ఈ ముగ్గురు చెలరేగితే హైదరాబాద్‌కు కష్టాలు తప్పవు.
