Telangana Govt: పాఠశాల విద్యాశాఖ కీలక ఉత్తర్వులు.. టీచర్ల సర్దుబాటుపై కలెక్టర్లకు పూర్తి అధికారం!

Telangana Govt: తెలంగాణలో ప్రభుత్వ పాఠశాలల్లో విద్యాబోధనకు ఎలాంటి ఆటంకం కలగకుండా ఉండేందుకు పాఠశాల విద్యాశాఖ కీలక ఉత్తర్వులు జారీ చేసింది. రాష్ట్రవ్యాప్తంగా అవసరమైన పాఠశాలలకు ఉపాధ్యాయుల కేటాయింపు, మిగులు (సర్ప్లస్) ఉపాధ్యాయుల సర్దుబాటు ప్రక్రియపై స్పష్టమైన ఆదేశాలు ఇచ్చింది. జిల్లాల్లో విద్యార్థుల సంఖ్యను బట్టి, పాఠశాలల వారీగా మరియు సబ్జెక్టుల వారీగా అవసరాలను క్షుణ్ణంగా పరిశీలించి ఉపాధ్యాయుల సర్దుబాటు ప్రక్రియను చేపట్టే పూర్తి అధికారాలను ప్రభుత్వం ఆయా జిల్లాల కలెక్టర్లకు అప్పగించింది.

ఈ ఏడాది ఏప్రిల్ 22న ‘వర్క్ అడ్జస్ట్‌మెంట్’ (పని సర్దుబాటు) కింద అవసరమైన పాఠశాలలకు డెప్యుటేషన్‌పై పంపిన ఉపాధ్యాయులను ప్రస్తుతానికి రిలీవ్ చేయవద్దని జిల్లా విద్యాశాఖాధికారులకు (DEOs) విద్యాశాఖ స్పష్టమైన ఆదేశాలు జారీ చేసింది. సదరు డెప్యుటేషన్ పాఠశాలలో ఆయా సబ్జెక్ట్ టీచర్ల అవసరం ఉన్నంత కాలం వారు ప్రస్తుత పాఠశాలల్లోనే కొనసాగేలా చూడాలని మండల విద్యాధికారులు (MEOs), ప్రధానోపాధ్యాయులను (HMs) ఆదేశించింది. పాఠశాలల్లో ఉపాధ్యాయుల పదవీ విరమణ (రిటైర్మెంట్), దీర్ఘకాలిక సెలవులు లేదా ఇతర కారణాల వల్ల ఖాళీలు ఏర్పడితే, విద్యార్థుల చదువులకు నష్టం కలగకుండా తగిన జాగ్రత్తలు తీసుకోవాలని స్పష్టం చేసింది. జిల్లాల్లో పాఠశాలలు సజావుగా నడవడానికి వీలుగా, జిల్లా కలెక్టర్ ఆమోదంతో మిగులు ఉపాధ్యాయులను అవసరమైన చోట్లకు డెప్యుటేషన్‌పై పంపేందుకు డీఈఓలు తగిన చర్యలు తీసుకోవాలని సూచించింది. ఈ సర్దుబాటు ప్రక్రియ మొత్తాన్ని జూన్ 20, 2026 నాటి విద్యార్థుల ఎన్‌రోల్‌మెంట్ సంఖ్యను ప్రాతిపదికగా తీసుకుని, జీఓ నంబర్ 25 (GO 25) మార్గదర్శకాలకు అనుగుణంగా పాఠశాలల వారీగా, సబ్జెక్టుల వారీగా విశ్లేషించి పూర్తి చేయాలని విద్యాశాఖ తన ఉత్తర్వుల్లో పేర్కొంది.