Captain Changes: ఆసియా గేమ్స్‌లో ఓటమి.. పాకిస్థాన్ కెప్టెన్ పై వేటు..! కొత్త కెప్టెన్ ఎవరంటే.?

Captain Changes: పాకిస్థాన్ టీ20 క్రికెట్‌లో కీలక మార్పులు చోటుచేసుకున్నాయి. టీ20 జట్టు కెప్టెన్ సల్మాన్ ఆఘాను కెప్టెన్సీ నుంచి తొలగించడంతో పాటు జట్టు నుంచి కూడా తప్పించారు. శ్రీలంకతో జరగనున్న మూడు మ్యాచ్‌ల టీ20 సిరీస్‌కు సాహిబ్‌జాదా ఫర్హాన్‌ను కొత్త కెప్టెన్‌గా నియమించారు.

ఇటీవల జరిగిన ఆసియా గేమ్స్‌లో పాకిస్థాన్‌కు రజత పతకం అందించడంలో ఫర్హాన్ కీలక పాత్ర పోషించారు. గత ఏడాది ఆసియా కప్‌లో అద్భుత ప్రదర్శనతో పాకిస్థాన్ జట్టులో తన స్థానాన్ని బలపర్చుకున్న అతడు.. ఆ తర్వాత టీ20 ప్రపంచకప్‌లోనూ సత్తా చాటాడు. ఆ టోర్నీలో 383 పరుగులతో అత్యధిక పరుగులు చేసిన బ్యాటర్‌గా నిలిచాడు. ఆసియా గేమ్స్‌లో భారత్‌తో జరిగిన ఫైనల్‌కు ముందు పాకిస్థాన్ ఆడిన రెండు మ్యాచ్‌ల్లో ఫర్హాన్ బ్యాట్‌తో పెద్దగా రాణించలేకపోయాడు. అయితే ఫైనల్లో భారత్‌కు పాకిస్థాన్ గట్టి పోటీ ఇచ్చింది. చివరకు 19 పరుగుల తేడాతో ఓటమిపాలై రజతంతో సరిపెట్టుకుంది. ఈ నేపథ్యంలో ఫర్హాన్‌కు టీ20 కెప్టెన్సీ బాధ్యతలు అప్పగించారు.

ఇక ఆసియా గేమ్స్ ఫైనల్లో భారత్‌పై 96 పరుగులు చేసిన హసన్ నవాజ్ తన స్థానాన్ని నిలబెట్టుకున్నాడు. దాదాపు ఏడాది తర్వాత అతడు టీ20 జట్టులోకి తిరిగి వచ్చాడు. గత ఏడాది ఆసియా కప్‌లో పేలవ ప్రదర్శనతో పాటు వరుసగా తక్కువ స్కోర్లు చేయడంతో నవాజ్ జట్టుకు దూరమయ్యాడు. నవంబర్ 2025 తర్వాత మళ్లీ టీ20 జట్టులో చోటు దక్కించుకున్నాడు. పేసర్ నసీమ్ షా కూడా టీ20 జట్టులోకి తిరిగి వచ్చాడు. ఈ ఫార్మాట్‌లో అతడు చివరిసారిగా ఫిబ్రవరిలో జరిగిన టీ20 ప్రపంచకప్‌లో ఆడాడు. ఏప్రిల్‌లో పాకిస్థాన్ సూపర్ లీగ్ సందర్భంగా మోకాలి గాయానికి గురైన నసీమ్.. దేశవాళీ క్రికెట్‌తో పాటు కరేబియన్ ప్రీమియర్ లీగ్‌లో ఆడి బౌలింగ్ సామర్థ్యాన్ని తిరిగి పెంచుకున్నాడు.

ఇంగ్లండ్‌తో సెప్టెంబర్‌లో జరిగిన టెస్టు అరంగేట్రంలో వేగంతో ఆకట్టుకున్న రజావుల్లా కూడా టీ20, వన్డే జట్లలో చోటు దక్కించుకున్నాడు. టెస్టుల్లోనే కాకుండా బ్యాట్‌తోనూ అతడు ఆకట్టుకున్నాడు. అయితే పరిమిత ఓవర్ల క్రికెట్‌లో ఇంకా అరంగేట్రం చేయలేదు. ఇక వన్డే జట్టులో మాత్రం పెద్దగా మార్పులు చేయలేదు. షాహీన్ అఫ్రిదీనే కెప్టెన్‌గా కొనసాగనున్నాడు. బాబర్ ఆజమ్‌కు వన్డే జట్టులో చోటు దక్కగా.. మహ్మద్ రిజ్వాన్‌కు మాత్రం అవకాశం లభించలేదు. నేషనల్ సైబర్ క్రైమ్ ఇన్వెస్టిగేషన్ అథారిటీతో కొనసాగుతున్న దర్యాప్తు, న్యాయపరమైన ప్రక్రియల కారణంగా రిజ్వాన్ రెండు ఫార్మాట్ల జట్లలోనూ చోటు దక్కించుకోలేదు.

దీంతో గాజీ ఘోరి వన్డేల్లో పాకిస్థాన్ తొలి ఎంపిక వికెట్ కీపర్‌గా మారాడు. ఇంగ్లండ్‌తో ఎడ్జ్‌బాస్టన్ టెస్టులో అరంగేట్రం చేసిన ఘోరి ఇప్పటివరకు నాలుగు వన్డేలు ఆడాడు. టీ20 జట్టులో మాత్రం ఖవాజా నఫే ఏకైక స్పెషలిస్ట్ వికెట్ కీపర్‌గా ఉన్నాడు. ఇదిలా ఉంటే పాకిస్థాన్ బౌలింగ్ కోచ్‌గా షాన్ టైట్ తిరిగి బాధ్యతలు చేపట్టాడు. 2022 ఫిబ్రవరి నుంచి ఏడాది పాటు పాకిస్థాన్ బౌలింగ్ కోచ్‌గా పనిచేసిన టైట్.. ఆ తర్వాత బంగ్లాదేశ్ ఫాస్ట్ బౌలింగ్ కోచ్‌గా బాధ్యతలు నిర్వర్తించాడు. అతని పర్యవేక్షణలో బంగ్లాదేశ్ పేస్ బౌలింగ్ విభాగం బలోపేతమైంది. పాకిస్థాన్‌తో జరిగిన టెస్టు సిరీస్‌ను 2-0తో గెలవడంతో పాటు వన్డే, టీ20 సిరీస్‌ల్లోనూ బంగ్లాదేశ్ విజయాలు సాధించింది.

ప్రస్తుతం పాకిస్థాన్ బౌలింగ్ కోచ్‌గా ఉన్న యాష్లే నాఫ్కే నెదర్లాండ్స్ హెడ్ కోచ్‌గా బాధ్యతలు చేపట్టేందుకు పదవి నుంచి తప్పుకోవడంతో అతని స్థానంలో షాన్ టైట్ వచ్చాడు. శ్రీలంకతో పాకిస్థాన్ టీ20 సిరీస్ అక్టోబర్ 9 నుంచి ప్రారంభం కానుంది. మూడు టీ20 మ్యాచ్‌లూ రావల్పిండిలోనే జరగనున్నాయి. ఆపై అక్టోబర్ 18 నుంచి శ్రీలంక, ఇంగ్లండ్‌తో కలిసి పాకిస్థాన్ వన్డే ట్రై సిరీస్‌లో పాల్గొంటుంది. రావల్పిండిలో శ్రీలంకతో జరిగే మ్యాచ్‌తో ఈ ట్రై సిరీస్ ప్రారంభం కానుంది.