SA vs IND: పోరాడి ఓడిన దక్షిణాఫ్రికా.. మూడో టీ20 భారత్‌దే!

నాలుగు టీ20ల సిరీస్‌లో భాగంగా సెంచూరియన్‌ వేదికగా బుధవారం దక్షిణాఫ్రికాతో జరిగిన మూడో టీ20లో భారత్ విజయం సాధించింది. 220 పరుగుల ఛేదనలో దక్షిణాఫ్రికా 7 వికెట్లకు 208 పరుగులు చేయడంతో టీమిండియా 11 పరుగుల తేడాతో నెగ్గింది. ఛేదనలో హెన్రిచ్‌ క్లాసెన్‌ (41; 22 బంతుల్లో 1×4, 4×6), మార్కో యాన్సెన్‌ (54; 17 బంతుల్లో 4×4, 5×6) సంచలన బ్యాటింగ్‌తో కంగారెత్తించినా.. చివరికి భారతే పైచేయి సాధించింది. ఈ విజయంతో సిరీస్‌లో భారత్‌ 2-1తో ఆధిక్యంలోకి దూసుకెళ్లింది. చివరి టీ20 శుక్రవారం జరుగుతుంది.

ఈ మ్యాచులో ముందుగా బ్యాటింగ్ చేసిన భారత్‌ 6 వికెట్లకు 219 పరుగుల భారీ స్కోరు చేసింది. సంజూ శాంసన్ డకౌట్ అయినా.. అభిషేక్‌ శర్మ (50; 25 బంతుల్లో 3×4, 5×6), తిలక్‌ వర్మ (107 నాటౌట్‌; 56 బంతుల్లో 8×4, 7×6)ల మెరుపులతో భారత్ స్కోర్ పరుగులు పెట్టింది. బ్యాటింగ్‌ ఆర్డర్‌లో ముందొచ్చిన తిలక్‌.. దక్షిణాఫ్రికా బ్యాటర్లపై దాడి చేశాడు. దాంతో పవర్‌ ప్లే ముగిసేసరికే భారత్‌ 70/1తో నిలిచింది. భారీ స్కోరు దిశగా దూసుకెళ్తున్న భారత్‌కు షాక్ తగిలింది. అభిషేక్‌తో పాటు సూర్యకుమార్ (1) వరుస ఓవర్లలో నిష్క్రమించగా.. హార్దిక్‌ పాండ్యా (18) ఎక్కువసేపు నిలవలేకపోయాడు. రమణ్‌దీప్‌ (15; 6 బంతుల్లో 1×4, 1×6) అండతో తిలక్‌ రేచిపోయి సెంచరీ చేశాడు.

ఛేదనలో దక్షిణాఫ్రికాకు మంచి ఆరంభమే దక్కింది. రికిల్‌టన్‌ (20), హెండ్రిక్స్‌ (21) వేగంగా ఆడినా.. త్వరగా అవుట్ అయ్యారు. స్టబ్స్‌ (12), మార్‌క్రమ్‌ (29)ని భారత బౌలర్లు కుదురుకోనివ్వలేదు. దాంతో 10 ఓవర్లలో దక్షిణాఫ్రికా 4 వికెట్లను 84 రన్స్ చేసింది. ఈ సమయంలో క్లాసెన్‌ సిక్స్‌లతో చెలరేగిపోయాడు. దాంతో 15 ఓవర్లకు స్కోరు 134/4గా నిలిచింది. చివరి 5 ఓవర్లలో దక్షిణాఫ్రికా 86 పరుగులు చేయాల్సి ఉన్నా క్లాసెన్‌ దూకుడు భారత్‌ను కలవరపెట్టింది. 19వ ఓవర్లో హార్దిక్ 30 పరుగులు ఇవ్వడంతో మ్యాచ్‌ ఉత్కంఠగా మారింది. ఆఖరి ఓవర్లో దక్షిణాఫ్రికాకు 25 పరుగులు అవసరం కాగా.. ఆర్ష్‌దీప్‌ చక్కగా బౌలింగ్‌ చేశాడు.