Rajat Patidar: ఐపీఎల్ 2026లో డిఫెండింగ్ ఛాంపియన్గా బరిలోకి దిగిన రాయల్ ఛాలెంజర్స్ బెంగళూరు (Royal Challengers Bengaluru) మరోసారి తమ ఆధిపత్యాన్ని ప్రదర్శిస్తుంది. మంగళవారం ధర్మశాల వేదికగా జరిగిన క్వాలిఫయర్-1 మ్యాచ్లో గుజరాత్ టైటాన్స్ (Gujarat Titans) పై 92 పరుగుల భారీ తేడాతో విజయం సాధించి ఫైనల్ లోకి దూసుకెళ్లింది. ముందుగా బ్యాటింగ్ చేసిన ఆర్సీబీ నిర్ణీత 20 ఓవర్లలో 5 వికెట్ల నష్టానికి 254 పరుగుల భారీ స్కోరు నమోదు చేసింది. ఐపీఎల్ ప్లేఆఫ్స్ చరిత్రలో ఇదే అత్యధిక జట్టు స్కోరు. ఇదివరకు 2023 క్వాలిఫయర్-2లో గుజరాత్ టైటాన్స్ ముంబై ఇండియన్స్పై చేసిన 233/3 రికార్డును ఆర్సీబీ బద్దలు కొట్టింది.
ఈ మ్యాచ్లో ఆర్సీబీ కెప్టెన్ రజత్ పటిదార్ అద్భుత ఇన్నింగ్స్తో సంచలనం సృష్టించాడు. మొదట 13 బంతుల్లో 21 పరుగులతో నెమ్మదిగా ఆడిన పటీదార్, ఆ తర్వాత గుజరాత్ బౌలర్లపై శివతాండవం సృష్టించాడు. చివరి 20 బంతుల్లోనే 72 పరుగులు రాబట్టి.. మొత్తం 33 బంతుల్లో అజేయంగా 93 పరుగులు చేశాడు. పటీదార్ ఈ ఇన్నింగ్స్తో ఓ అరుదైన రికార్డును కూడా సమం చేశాడు. ఐపీఎల్ ప్లేఆఫ్స్లో కెప్టెన్గా అత్యధిక వ్యక్తిగత స్కోరు చేసిన ఆటగాడిగా డేవిడ్ వార్నర్ సరసన నిలిచాడు. వార్నర్ 2016 క్వాలిఫయర్-2లో సన్రైజర్స్ హైదరాబాద్ తరఫున 93 పరుగులు చేసిన సంగతి తెలిసిందే.
254 పరుగుల లక్ష్యంతో బరిలోకి దిగిన గుజరాత్ టైటాన్స్ బ్యాటర్స్ ఆర్సీబీ బౌలర్ల దెబ్బకు చేతులెత్తేశారు. ఇన్నింగ్స్ మొదటి నుంచే వికెట్లు కోల్పోతూ ఒత్తిడిలో పడిన గుజరాత్, ఏ దశలోనూ గెలుపు దిశగా సాగలేదు. దీంతో ఆర్సీబీ సునాయాసంగా 92 పరుగుల తేడాతో ఘన విజయం సాధించింది. ఈ విజయంతో ఆర్సీబీ ఐపీఎల్ 2026 ఫైనల్ కు చేరి టైటిల్ ఫేవరెట్గా మారింది. దీనికి కారణం చరిత్ర కూడా ఇప్పుడు ఆర్సీబీకే అనుకూలంగా ఉంది. 2018 నుంచి ఇప్పటివరకు ఐపీఎల్ టైటిల్ గెలిచిన ప్రతి జట్టు కూడా క్వాలిఫయర్-1 గెలిచిన జట్టే. గత ఏడాది కూడా ఆర్సీబీ క్వాలిఫయర్-1లో పంజాబ్ కింగ్స్ను ఓడించి, అనంతరం ఫైనల్లో విజయం సాధించి తమ తొలి ఐపీఎల్ ట్రోఫీని ముద్దాడింది.
మొత్తంగా 2011లో ప్లేఆఫ్స్ వ్యవస్థ వచ్చినప్పటినుండి 15 సీజన్లలో 12 సార్లు క్వాలిఫయర్-1 గెలిచిన జట్టే చివరికి ఛాంపియన్గా నిలిచింది. కేవలం మూడు సార్లు మాత్రమే ఆ జట్లు ఫైనల్లో ఓడిపోయాయి. అందులో 2016లో ఆర్సీబీ కూడా ఒకటి. అప్పట్లో క్వాలిఫయర్-1 గెలిచినా, ఫైనల్లో సన్ రైజర్స్ హైదరాబాద్ చేతిలో పరాజయం పాలైంది. చూడాలిమరి ఈసారి పరిస్థి ఎలా ఉండబోతుందో.