Ramagundam: ఎన్టీపీసీ ఫేజ్-2 ప్రాజెక్టు కోసం ప్రజాభిప్రాయ సేకరణ ప్రారంభం

Ramagundam: పెద్దపల్లి జిల్లా గోదావరిఖనిలో నేడు రామగుండం ఎన్టీపీసీ సూపర్ థర్మల్ పవర్ ప్రాజెక్ట్ ఫేజ్-2 కోసం ప్రజాభిప్రాయ సేకరణ ప్రారంభమైంది. జిల్లా కలెక్టర్ కోయ శ్రీ హర్ష ఆధ్వర్యంలో ఎన్టీపీసీ జిల్లా పరిషత్ హై స్కూల్‌లో ఈ కార్యక్రమం నిర్వహించారు. ప్రజాభిప్రాయ సేకరణను ప్రశాంతంగా కొనసాగించేందుకు భారీగా పోలీసుల బందోబస్తు ఏర్పాటు చేశారు. ఈ ప్రాజెక్టుకు సంబంధించి, ముఖ్యంగా స్థలాల కోసం ప్రజల అభిప్రాయాలను సేకరిస్తున్నారు. అయితే, స్థానిక భూ నిర్వాసితులు, ప్రజాప్రతినిధులు ప్లాంటు ఏర్పాటుతో పాటు స్థానికులకే ఉద్యోగ అవకాశాలు కల్పించాలని డిమాండ్ చేస్తున్నారు. పోలీసుల పహారాలో సాగుతున్న ఈ కార్యక్రమంలో ప్రజల హాజరుపై ఆంక్షలు విధించడం వివాదానికి దారితీసింది. స్థానిక నాయకులను, ప్రజలను లోనికి అనుమతించకుండా, ఎంపిక చేసిన వారినే ఈ సమావేశంలో పాల్గొనేలా పోలీసులు చర్యలు తీసుకున్నారు. నిర్వాసిత గ్రామాల ప్రజల పట్ల కూడా ఇలాంటి ఆంక్షలు విధించడంతో నిరసనలు వ్యక్తమవుతున్నాయి. అరెస్టు చేసిన స్థానిక నాయకులను సమీపంలోని పోలీస్ స్టేషన్లకు తరలించారు.

Also Read: Bhumana Karunakar Reddy: చంద్రబాబు మాటలపై పవన్‌ సమాధానం చెప్పాలి.. ఇప్పుడు ఏ గుడిమెట్లు కడుగుతారు..?

ఎన్టీపీసీ ప్రాజెక్టు పేజ్-2 పై ప్రజల అభిప్రాయాలను స్వీకరించడానికి నిర్వహించిన ఈ సమావేశంలో ఎక్కువ మంది ప్రజలు హాజరుకాలేకపోవడంతో సభలో ఖాళీ కుర్చీలు కనిపించాయి. ప్రజాభిప్రాయ సేకరణను ప్రశాంతంగా ముగించేందుకు అధికారులు అన్ని చర్యలు తీసుకున్నప్పటికీ, స్థానికుల ఆందోళనలు, పోలీసుల ఆంక్షలు కార్యక్రమం చుట్టూ వివాదాలు సృష్టిస్తున్నాయి. రామగుండం ఎన్టీపీసీ ప్రాజెక్టు భవిష్యత్తు మీద ఈ అభిప్రాయ సేకరణ ఎంత మేర ప్రభావం చూపుతుందో చూడాల్సి ఉంది.