జమైకా కింగ్స్‌మెన్‌కు షాక్.. CPL 2026 ఛాంపియన్‌గా ఆంటిగ్వా అండ్ బార్బుడా ఫాల్కన్స్.!

CPL 2026: కరీబియన్ ప్రీమియర్ లీగ్‌ (CPL)లో ఆంటిగ్వా అండ్ బార్బుడా ఫాల్కన్స్ (Antigua and Barbuda Falcons) తొలిసారి టైటిల్‌ను గెలిచింది. తమ మూడో సీజన్‌లోనే ఫాల్కన్స్ ఈ ఘనత సాధించింది. ఆదివారం బ్రిడ్జ్‌టౌన్‌లో జరిగిన ఫైనల్లో టోర్నీలో జమైకా కింగ్స్‌మెన్ (Jamaica Kingsmen) పై 8 వికెట్ల తేడాతో ఘన విజయం సాధించింది.

మ్యాచ్ విషయానికి వస్తే.. టాస్‌ తర్వాత ముందుగా బ్యాటింగ్ చేసిన జమైకా కింగ్స్‌మెన్‌ 20 ఓవర్లలో 9 వికెట్ల నష్టానికి 170 పరుగులు చేసింది. మాజ్ సదాఖత్‌ 58 బంతుల్లో 8 ఫోర్లు, 9 సిక్సర్ల సహాయంతో 114 పరుగులతో అదరహో అనిపించాడు. కింగ్స్‌మెన్‌ జట్టు సాధించిన మొత్తం స్కోర్‌లో సగానికి పైగా పరుగులు సదాఖత్‌ ఒక్కడే చేశాడు. అయితే మిగతా బ్యాటర్లు పెద్దగా రాణించలేకపోయారు. సైమ్ అయూబ్‌ 29 పరుగులతో రెండో అత్యధిక స్కోరర్‌గా నిలిచాడు. టాప్‌-6లో ముగ్గురు బ్యాటర్లు డకౌట్‌ ఇక్కడ మరో విడ్డురం.

ఆరంభంలోనే కింగ్స్‌మెన్‌కు ఎదురుదెబ్బ తగిలింది. జేడెన్ సీల్స్‌ తొలి ఓవర్‌లోనే కిర్క్ మెకెంజీని 4 బంతుల్లో డకౌట్ చేశాడు. నాలుగో ఓవర్‌లో కీసీ కార్టీ 9 పరుగులకే వెనుదిరిగాడు. దీంతో 30 పరుగులకే 2 వికెట్లు కోల్పోయిన జట్టును సదాఖత్‌, సైమ్ అయూబ్‌ ఆదుకున్నారు. ఇద్దరూ కలిసి మూడో వికెట్‌కు 80 పరుగుల భాగస్వామ్యం నెలకొల్పారు. దీంతో కింగ్స్‌మెన్‌ 110/2కు చేరుకుంది. సదాఖత్‌ దూకుడైన బ్యాటింగ్‌తో స్కోరు వేగంగా పెరిగింది.

110 పరుగుల వద్ద కింగ్స్‌మెన్‌ భారీ స్కోరు చేసేలా కనిపించిన సమయంలో సుఫ్యాన్ మొకీమ్‌ మ్యాచ్‌ను మలుపుతిప్పాడు. 12వ ఓవర్‌లో సైమ్ అయూబ్‌ను ఔట్ చేసిన మొకీమ్‌ అదే ఓవర్‌లో రోవ్‌మన్ పావెల్‌ను కూడా పెవిలియన్‌కు పంపించాడు. దీంతో కేవలం మూడు ఓవర్ల వ్యవధిలో కింగ్స్‌మెన్‌ 110/2 నుంచి 113/6కు పడిపోయింది. సదాఖత్‌ మాత్రం మరో ఎండ్‌లో దూకుడుగా ఆడుతూ చివరి వరకు పోరాడాడు. ఇన్నింగ్స్‌ 20వ ఓవర్‌లో చివరి రెండు బంతుల్లో ఒకటికి ఔటయ్యాడు. చివరికి కింగ్స్‌మెన్‌ 170/9 స్కోరుకే పరిమితమైంది. ఫాల్కన్స్‌ తరఫున సుఫ్యాన్ మొకీమ్‌ 4 వికెట్లు పడగొట్టాడు.

171 పరుగుల లక్ష్యంతో బరిలోకి దిగిన ఫాల్కన్స్‌కు రహ్‌కీమ్ కార్న్‌వాల్‌ అదిరిపోయే ఆరంభం అందించాడు. సైమ్ అయూబ్‌ వేసిన తొలి ఓవర్‌లోనే రెండు ఫోర్లు, రెండు సిక్సర్లతో 20 పరుగులు రాబట్టాడు. అయితే అదే ఓవర్‌ చివరి బంతికి బౌల్డ్‌ అయ్యాడు. ఆ తర్వాత ఎవిన్ లూయిస్‌, అమీర్ జంగూ కలిసి ఇన్నింగ్స్‌ను ముందుకు తీసుకెళ్లారు. రెండో వికెట్‌కు 64 పరుగుల భాగస్వామ్యం నెలకొల్పారు. లూయిస్‌ 38 పరుగుల వద్ద ఔటయ్యే సమయానికి ఫాల్కన్స్‌ లక్ష్యంలో దాదాపు సగం పరుగులు పూర్తి చేసింది.

ఆ తర్వాత అమీర్ జంగూ, హసన్ నవాజ్‌ కలిసి కింగ్స్‌మెన్‌కు ఎలాంటి అవకాశం ఇవ్వలేదు. ఇద్దరూ కలిసి అజేయంగా 89 పరుగుల భాగస్వామ్యం నెలకొల్పారు. ఈ క్రమంలో జంగూ 57 పరుగులతో, నవాజ్‌ 47 పరుగులతో నాటౌట్‌గా నిలిచారు. చివర్లో 17వ ఓవర్‌లో నవాజ్‌ వరుసగా రెండు సిక్సర్లు బాదడంతో ఫాల్కన్స్‌ మరో 20 బంతులు మిగిలి ఉండగానే లక్ష్యాన్ని ఛేదించింది. దీనితో ఆంటిగ్వా అండ్ బార్బుడా ఫాల్కన్స్ మొదటిసారి కప్ ను ముద్దాడింది.