Mohammad Kaif: రోహిత్, కోహ్లీ కాదు.. 2027 వరల్డ్ కప్ గెలవాలంటే భారత్‌కు ఇదే కీలకం..

Mohammad Kaif: రోహిత్ శర్మ, విరాట్ కోహ్లీ కాదు.. 2027 వన్డే వరల్డ్ కప్ గెలవాలంటే అసలైన కీ పాయింట్ వేరే ఉందంటూ మాజీ క్రికెటర్ మొహమ్మద్ కైఫ్ ఆసక్తికరమైన వ్యాఖ్యలు చేశారు. సౌతాఫ్రికా, జింబాబ్వే, నమీబియా వేదికలుగా జరగనున్న ఈ మెగా టోర్నమెంట్‌పై ఆయన తన అభిప్రాయాలను పంచుకున్నారు. సౌతాఫ్రికాలో ఇప్పుడు పిచ్‌లు పూర్తిగా బ్యాటింగ్‌కు అనుకూలంగా మారిపోయాయని, అక్కడ బౌలర్ల కంటే బ్యాటర్లదే హవా ఎక్కువగా ఉంటుందని చెప్పారు. సెమీఫైనల్స్, ఫైనల్స్ జరిగే కేప్‌టౌన్, సెంచూరియన్, జోహన్నెస్‌బర్గ్ లాంటి కీలక వేదికలపై కూడా పిచ్‌లు బ్యాటింగ్‌కు సహకరిస్తాయని, అందుకే ఏ జట్టులో అయితే నాణ్యమైన బౌలింగ్ అటాక్ ఉంటుందో ఆ జట్టే వరల్డ్ కప్ గెలుస్తుందని కైఫ్ స్పష్టం చేశారు.

రోహిత్ శర్మ, విరాట్ కోహ్లీ ఆడతారా లేదా అనే చర్చపై స్పందిస్తూ.. టోర్నమెంట్ నాటికి వారి వయసు 40, 39 ఏళ్లు ఉంటుందని, అయితే వారిద్దరూ ఆడితే పర్వాలేదని, కానీ భారత్ గెలవాలంటే మాత్రం బౌలింగ్, ఫీల్డింగ్ డిపార్ట్‌మెంట్లను పటిష్టం చేసుకోవడం అత్యంత కీలకమని తేల్చిచెప్పారు. విరాట్ కోహ్లీ ఒక్కడే ఉంటే వరల్డ్ కప్ వచ్చేయదని, విదేశాల్లో మెగా టోర్నమెంట్ గెలవాలంటే ఎవరో ఒక్కరిపై ఆధారపడకుండా అందరూ సమిష్టిగా రాణించాలని కైఫ్ హితవు పలికారు. కోహ్లీ ప్రధాన ఆటగాడే అయినప్పటికీ, మిగతా వాళ్లు కూడా సహకరించినప్పుడే విజయం సాధ్యమన్నారు. ఈ సందర్భంగా 2003 వన్డే వరల్డ్ కప్‌ను ఆయన గుర్తుచేశారు. ఆ టోర్నమెంట్‌లో సచిన్ టెండూల్కర్ ప్లేయర్ ఆఫ్ ది టోర్నమెంట్‌గా నిలిచినా, ఒంటిచేత్తో కప్ సాధించలేదని, మిగతా ఆటగాళ్ల సహకారం కూడా ఎంతో ఉందని చెప్పారు. ఆ టోర్నమెంట్‌లో సచిన్‌తో పాటు యువరాజ్ సింగ్ కీలక పరుగులు చేశాడని, న్యూజిలాండ్‌పై తాను అజేయంగా హాఫ్ సెంచరీ సాధించానని, రాహుల్ ద్రవిడ్, వీరేంద్ర సెహ్వాగ్ కూడా రాణించారని గుర్తుచేశారు. అలాగే బౌలింగ్‌లో ఆశిష్ నెహ్రా ఇంగ్లండ్‌పై మ్యాచ్ విన్నింగ్ స్పెల్ వేయగా, జహీర్ ఖాన్, సీనియర్ బౌలర్ శ్రీనాథ్ అద్భుతంగా రాణించారని, గంగూలీ కెప్టెన్సీ కూడా జట్టు విజయాల్లో కీలకమని కైఫ్ వివరించారు.