Suryapet Bus Accident: సూర్యాపేట జిల్లాలో ఘోర ప్రమాదం.. బస్సు-కంటైనర్ ఢీ, ఆరుగురు మృతి

Suryapet Bus Accident: సూర్యాపేట జిల్లా కోదాడ మండలం దొరకుంట శివారులో బుధవారం తెల్లవారుజామున ఘోర రోడ్డు ప్రమాదం చోటుచేసుకుంది. హైదరాబాద్ నుంచి ఏలూరు (విజయవాడ మార్గం) వైపు వెళ్తున్న ఓ ప్రైవేట్ ట్రావెల్స్ బస్సు, దొరకుంట సమీపంలో ఆగి ఉన్న కంటైనర్‌ లారీని వెనుక నుంచి బలంగా ఢీకొట్టింది. ఆ లారీలో భారీ ఇనుప కడ్డీలు ఉండటంతో ప్రమాద తీవ్ర పెరిగింది. ఈ ప్రమాద సమయంలో బస్సులో మొత్తం 42 మంది ప్రయాణికులు ఉన్నారు. ఈ తీవ్ర ప్రమాదంలో ఆరుగురు ప్రయాణికులు అక్కడికక్కడే ప్రాణాలు కోల్పోగా, మృతుల్లో ఐదుగురు మహిళలు, ఒక పురుషుడు ఉన్నారు. బస్సు ముందు భాగం తీవ్రంగా దెబ్బతినడంతో సుమారు 15 నుంచి 23 మంది ప్రయాణికులు తీవ్రంగా గాయపడ్డారు. స్థానికుల సమాచారంతో పోలీసులు వెంటనే సంఘటనా స్థలానికి చేరుకుని సహాయక చర్యలు చేపట్టారు. క్షతగాత్రులను హుటాహుటిన కోదాడ ప్రభుత్వాసుపత్రితో పాటు సమీపంలోని ఇతర ఆసుపత్రులకు తరలించి చికిత్స అందిస్తున్నారు. గాయపడిన వారిలో కొందరి పరిస్థితి విషమంగా ఉన్నట్లు సమాచారం.

ఈ ఘటనతో హైదరాబాద్ – విజయవాడ జాతీయ రహదారిపై వాహనాల రాకపోకలకు తీవ్ర అంతరాయం ఏర్పడి, భారీగా ట్రాఫిక్ నిలిచిపోయింది. రంగంలోకి దిగిన పోలీసులు రోడ్డుపై ఉన్న వాహనాలను పక్కకు తొలగించి ట్రాఫిక్‌ను పునరుద్ధరించారు. అతివేగం, డ్రైవర్ నిర్లక్ష్యమే ఈ ప్రమాదానికి కారణమా లేక ఆగి ఉన్న లారీని ఢీకొట్టారా అనే కోణంలో పోలీసులు కేసు నమోదు చేసి దర్యాప్తు చేస్తున్నారు. మృతుల గుర్తింపు, ప్రమాదానికి సంబంధించిన పూర్తి వివరాలు అందాల్సి ఉంది.