Karnataka High Court: ప్రార్థనల కోసం నివాస గృహాన్ని ఉపయోగించడంపై ఎలాంటి ఆంక్షల్లేవ్..

Karnataka High Court: మతపరమైన ప్రార్థనల కోసం నివాస గృహాన్ని ఉపయోగించడంపై ఎలాంటి ఆంక్షలు లేవని కర్ణాటక హైకోర్టు పేర్కొంది. బెంగళూరులోని హెచ్‌బీఆర్‌ లేఅవుట్‌ నివాసి నివాసాన్ని ప్రార్థనకు ఉపయోగిస్తున్నారంటూ దాఖలైన ప్రజా ప్రయోజన వ్యాజ్యాన్ని (పీఐఎల్‌) కొట్టివేస్తూ కోర్టు ఈ వ్యాఖ్యలు చేసింది. బెంగళూరులోని హెచ్‌బీఆర్‌ లేఅవుట్‌ నివాసితులు దాఖలు చేసిన పిల్‌ను కర్ణాటక హైకోర్టు శనివారం కొట్టివేసింది. ప్రార్థన కోసం రెసిడెన్షియల్ ప్రాపర్టీని వినియోగిస్తున్నారని ఈ పిటిషన్‌లో పేర్కొన్నారు.

ప్రధాన న్యాయమూర్తి జస్టిస్ ప్రసన్న బి. వరాలే, జస్టిస్ ఎంజీఎస్ కమల్‌లతో కూడిన డివిజన్ బెంచ్ ఇటీవల ఈ పిల్‌ను కొట్టివేస్తూ ఇలా పేర్కొంది. విచారణ సందర్భంగా ‘ నివాస స్థలంలో ప్రార్థనలు చేయడం ప్రమాదం’ అని పిటిషనర్ తరఫు న్యాయవాది చేసిన మౌఖిక సమర్పణపై ధర్మాసనం తీవ్రంగా స్పందించింది. ధర్మాసనం ఈ విధంగా వ్యాఖ్యానించింది. “మేము దీనిని అంగీకరించము. ప్రార్థన చేయడం ప్రమాదం కాదు. మీరు ఈ ప్రకటనను తప్పుగా భావించి ఉండవచ్చు, దయచేసి ప్రకటన చేసే ముందు ఒకటికి రెండుసార్లు ఆలోచించండి. మేము అలాంటి ప్రకటనలను అనుమతించము. ఇది మాకు బలమైన అభ్యంతరాలు ఉన్న విషయం, మీరు చాలా సాధారణంగా ప్రకటన చేయలేరు. మీరు న్యాయవాది, దయచేసి ఇలాంటి ప్రకటనలు చేయకండి. ఇలాంటి విపరీతమైన ప్రకటనలు చేసే హక్కు మీకు లేదు. కొన్ని నిబంధనల ఉల్లంఘన జరిగిందని మాత్రమే చెప్పగలరు. ఎవరైనా ప్రార్థన చేయడం బెదిరింపు చర్య అని మీరు ఎలా చెప్పగలరు?” పిటిషనర్‌ తరపు న్యాయవాదిని ధర్మాసనం ప్రశ్నించింది.

Read Also: Pak Space Agency: 62 ఏళ్లలో కేవలం 5 ఉపగ్రహాలను మాత్రమే ప్రయోగించింది.. ఎందుకు వెనుకబడిందంటే?

ఈ సమస్యపై హౌసింగ్ అండ్ అర్బన్ డెవలప్‌మెంట్ డిపార్ట్‌మెంట్, బీబీఎంపీ, మసీదు ఇ-అష్రాఫిట్‌లకు వ్యతిరేకంగా హెచ్‌బీఆర్ లేఅవుట్‌కు చెందిన శామ్ పి ఫిలిప్, కృష్ణ ఎస్కే, జగైసన్ టీపీ, మరో ఐదుగురు కోర్టును ఆశ్రయించారు. నివాస ప్రాంతాన్ని ప్రార్థనా మందిరంగా వినియోగిస్తున్నందున, కొన్నిసార్లు ప్రజలు గణనీయంగా గుమిగూడి నివాసితులకు ఇబ్బంది కలిగిస్తున్నందున నిబంధనలను ఉల్లంఘించారని పిటిషనర్లు కోర్టును ఆశ్రయించారు.

మసీదు ట్రస్టు బీబీఎంపీ అనుమతి లేకుండా భవనాన్ని నిర్మించినప్పుడు కూడా ఈ విషయం కోర్టుకు చేరింది. మదర్సా భవనాన్ని బీబీఎంపీ నుంచి అనుమతి పొందిన తర్వాతే నిర్మించాలని కోర్టు ఆదేశించింది. ఆ తర్వాత ఈ భవనాన్ని నిర్మించి పేద పిల్లలకు మదర్సాగా ఉపయోగించారు. అక్కడ భవనం నిర్మించిన తర్వాత ఈ పిల్‌ దాఖలైంది. నివాస స్థలంలో ప్రార్థనలు చేయడం వల్ల స్థానికులకు ఇబ్బంది కలుగుతోందని పిటిషనర్లు కోర్టుకు విన్నవించారు. నివాసితులు లేదా వారి అతిథులు ప్రార్థనలు చేయడానికి నివాస ప్రాంతాన్ని ఉపయోగించడాన్ని నిరోధించడానికి పిటిషనర్లు సమర్పించిన నిర్దిష్ట నిషేధం లేదా చట్టపరమైన ఆధారం లేదని కోర్టు పేర్కొంది. పదేపదే ప్రశ్నించినప్పటికీ, పిటిషనర్ల న్యాయవాది అటువంటి చట్టపరమైన నిషేధాన్ని ప్రదర్శించడంలో విఫలమయ్యారు.

పిల్‌పై విచారణ సందర్భంగా.. ప్రార్థన వల్ల ప్రమాదం ఉందని పిటిషనర్ల తరఫు న్యాయవాది సమర్పించడంపై కోర్టు తీవ్ర అభ్యంతరం వ్యక్తం చేసింది. అలాంటి ప్రకటనలను అనుమతించేది లేదని కోర్టు హెచ్చరించింది. ఇది మేం తీవ్రంగా వ్యతిరేకిస్తున్న విషయం. మీరు ఇంత సాధారణ ప్రకటనలు చేయలేరు. ఇలాంటి విపరీతమైన ప్రకటనలు చేసే హక్కు మీకు లేదు. కొన్ని నిబంధనల ఉల్లంఘన జరిగిందని మాత్రమే చెప్పవచ్చు. ఒకరికి ప్రార్థన చేయడం బెదిరింపు చర్య అని మీరు ఎలా చెప్పగలరు? అంటూ కోర్టు ఆగ్రహం వ్యక్తం చేసింది.