Shreyas Iyer: శ్రేయస్ అయ్యర్ సారథ్యంలో సరికొత్త శకం.. ఐర్లాండ్‌తో నేడే భారత్ తొలి టీ20..

భారత క్రికెట్‌లో సరికొత్త అధ్యాయం మొదలుకానుంది. శ్రేయస్ అయ్యర్ సారథ్యంలో సరికొత్తగా రూపుదిద్దుకున్న యువ టీమిండియా, శుక్రవారం (జూన్ 26) బెల్‌ఫాస్ట్‌లో ఐర్లాండ్‌తో జరిగే తొలి టీ20 మ్యాచ్‌లో తలపడనుంది. గాయం కారణంగా దూరమైన సూర్యకుమార్ యాదవ్ స్థానంలో శ్రేయస్ అయ్యర్ ఈ  సిరీస్‌కు జట్టు కెప్టెన్‌గా ఎంపికయ్యారు. లాంగ్ గ్యాప్ తర్వాత టీ20 జట్టులోకి అడుగుపెట్టిన శ్రేయస్, మొదటిసారిగా భారత జట్టుకు నాయకత్వం వహిస్తున్నారు. ఈ పర్యటనలో యువ సంచలనం వైభవ్ సూర్యవంశీ అంతర్జాతీయ అరంగేట్రం చేసే అవకాశం ఉండటంతో ఈ మ్యాచ్‌పై భారీ అంచనాలు ఉన్నాయి.

శ్రేయస్ అయ్యర్ పిలుపు
తొలి మ్యాచ్‌కు ముందు బెల్‌ఫాస్ట్‌లో జరిగిన జట్టు సమావేశంలో (టీమ్ హడిల్) కెప్టెన్ శ్రేయస్ అయ్యర్ సహచరుల్లో కొత్త జోష్ నింపారు. కొత్త కెప్టెన్‌కు కోచ్ గౌతమ్ గంభీర్ శుభాకాంక్షలు తెలిపారు. ఈ సందర్భంగా అయ్యర్ మాట్లాడుతూ.. “భారత జట్టుకు కెప్టెన్‌గా వ్యవహరించడం నాకొక గౌరవం, వరం. మనమంతా ఒక కుటుంబంలా ఉంటూ, కష్ట సమయాల్లో ఒకరికొకరు తోడుగా నిలిచే బలమైన బంధాన్ని నిర్మించుకుందాం. మైదానంలోకి దిగితే సింహాల్లా పోరాడాలి, ప్రతి మ్యాచ్‌ను గెలిచేందుకే ఆడాలి. ఆటను ఆస్వాదిస్తూ, ఒకరి విజయాన్ని మరొకరు సెలబ్రేట్ చేసుకోవాలి” అని భావోద్వేగంగా ప్రసంగించారు. దీనికి సంబంధించిన వీడియోను బీసీసీఐ సోషల్ మీడియాలో పంచుకుంది.

వైస్ కెప్టెన్‌గా తిలక్ వర్మ..
ఐపీఎల్‌లో కోల్‌కతా నైట్ రైడర్స్‌ను (2024), పంజాబ్ కింగ్స్‌ను (2025) ఫైనల్స్ చేర్చిన ఘనమైన కप्ताనీ అనుభవం శ్రేయస్ అయ్యర్‌కు ఉంది. ఈ సిరీస్‌లో అక్షర్ పటేల్ జట్టులో ఉన్నప్పటికీ, యువ ఆటగాడు తిలక్ వర్మకు వైస్ కెప్టెన్ బాధ్యతలను అప్పగించడం విశేషం. గంభీర్-అయ్యర్ ద్వయం సరికొత్త వ్యూహాలతో, దూకుడుతో కూడిన విప్లవాత్మకమైన టీమ్ కల్చర్‌ను తీసుకురావడానికి సిద్ధమైంది. అటు యువతతో, ఇటు సీనియర్లతో పటిష్టంగా ఉన్న భారత జట్టు ఐర్లాండ్ గడ్డపై ఘనవిజయంతో ఈ సిరీస్‌ను ప్రారంభించాలని భావిస్తోంది.