Diwali Festival: దీపావళి రోజు వీటిని చూస్తే శుభసూచకం..!

దీపావళి పండుగ అంటే పిల్ల, పెద్ద కలిసి ఎంతో ఇష్టంగా, సంతోషంగా జరుపుకునే పండగ. ఈ పండగను భారతదేశంలో ఎంతో ఘనంగా సెలబ్రేట్ చేసుకుంటారు. ఈ పండగకు ఎన్నో రకాల పేర్లు ఉన్నాయి. దీపోత్సవం అని దీపాల పండుగ అని అంటారు. ఈ ఏడాది దీపావళి పండుగను ఆదివారం (నవంబర్ 12) జరుపుకోబోతున్నాం. అయితే ఆ రోజు లక్ష్మీదేవి భూలోకానికి వస్తుందని.. భక్తిశ్రద్ధలతో అమ్మవారిని పూజిస్తే మన బాధలన్నీ తొలగిపోతాయని నమ్ముతారు. అలాగే మన ఇంట్లో అమ్మవారు నివసిస్తారని ప్రతీతి. దీపావళి రోజు లక్ష్మీదేవి సంతోషంగా ఉన్నప్పుడు కొన్ని ప్రత్యేక సంకేతాలు కనిపిస్తాయట. అంతేకాకుండా.. దీపావళి రోజు మీరు కొన్ని జీవులను చూస్తే అదృష్టం మిమ్మల్ని వరిస్తుందని జ్యోతిష్యులు చెబుతున్నారు. అందులో ఏవేవీ ఉన్నాయో ఇప్పుడు తెలుసుకుందాం.

ఆవు
హిందూ మతంలో శకున శాస్త్రం ప్రకారం ఆవుకి తల్లి హోదా ఉంటుంది. దీపావళి రోజున కుంకుమపువ్వు రంగులో ఉన్న ఆవును చూడటం చాలా శుభప్రదంగా భావిస్తారు. ఈ ఆవును దైవత్వానికి చిహ్నంగా భావిస్తారు. దీపావళి రోజున దాని దర్శనం శ్రేయస్సు యొక్క చిహ్నంగా పరిగణిస్తారు. శకున శాస్త్రం ప్రకారం, చిన్న చిన్న విషయాలు కూడా మన భవిష్యత్తు గురించి చాలా చెబుతాయి. దీపావళి రోజున ఈ రంగులో ఉన్న ఆవును చూస్తే మీ ఇంటికి ఐశ్వర్యం, సంపదలు వస్తాయని జ్యోతిష్య పండితులు చెబుతున్నారు.

పిల్లి
ఇంట్లోకి పిల్లి రావడం చాలా శుభప్రదంగా చెబుతారు. దీపావళి నాడు మీరు పిల్లిని చూస్తే అది ఎంతో పవిత్రంగా భావిస్తారు. ఎందుకంటే దీన్ని లక్ష్మీదేవి రాకకు సంకేతంగా భావిస్తారు. చూసిన వ్యక్తికి ధనలాభం కలుగుతుందని నమ్ముతారు.

బల్లులు
బల్లులు సాధారణంగా ప్రతి ఇంట్లో కనిపిస్తాయి. దీపావళి పండుగ పర్వదినాన రాత్రి గణేష్-లక్ష్మీ పూజ తర్వాత వీటిని చూడటం శుభప్రదంగా, పవిత్రంగా భావిస్తారు. దీపావళి రోజున బల్లిని చూడటం అంటే లక్ష్మీదేవి మీ ఇంటికి రాబోతోందని సంకేతమంటున్నారు.

చీమ
దీపావళి రోజు మీ ఇంట్లో నల్ల చీమను చూడటం శుభసూచికమే. మీ ఇంట్లో బంగారు వస్తువులు ఉంచిన చోట నల్ల చీమలు కనిపిస్తే మీ సంపద పెరుగుతుందని అర్థం. అలాగే మీ ఇంటి పైకప్పు నుంచి చీమలు బయటకు రావడం కూడా శుభసూచకమే. అంటే మీకు ఆకస్మిక డబ్బు కలుగుతుందని అర్థం.

గుడ్లగూబ
దీపావళి రోజు రాత్రి గుడ్లగూబ కనిపిస్తే ఇక వారు పట్టిందల్లా బంగారమే అవుతుందట. లక్ష్మీదేవికి వాహనంగా గుడ్లగూబను చెప్తారు. పండుగరోజు రాత్రి గుడ్లగూబను చూస్తే ఐశ్వర్యంతోపాటు, సుఖసంతోషాలు కలుగుతాయని నమ్ముతారు.