Shubman Gill: కోహ్లీ, రోహిత్ శర్మను వెనక్కి నెట్టేసిన శుభ్‌మన్ గిల్.. ఒక్క విజయంతో మరింత ముందుకు..

ఇంటర్నేషనల్ క్రికెట్ కౌన్సిల్ (ICC) బుధవారం ప్రకటించిన పురుషుల వన్డే ర్యాంకింగ్స్‌లో భారత ఆటగాళ్ల స్థానాల్లో కీలక మార్పులు చోటుచేసుకున్నాయి. టీమిండియా కెప్టెన్ శుభ్‌మన్ గిల్ వన్డేల్లో నంబర్ వన్ స్థానానికి మరింత చేరువయ్యాడు. ఇంగ్లాండ్‌తో బర్మింగ్‌హామ్‌లో జరిగిన మొదటి వన్డేలో 80 పరుగుల అద్భుత ఇన్నింగ్స్ ఆడిన గిల్‌కు 12 రేటింగ్ పాయింట్లు లభించాయి. ప్రస్తుతం న్యూజిలాండ్ ఆటగాడు డారిల్ మిచెల్ (814 పాయింట్లు) మొదటి స్థానంలో ఉండగా, గిల్ రెండో స్థానంలో కేవలం 11 పాయింట్ల వెనుకంజలో ఉన్నాడు. ఈ మ్యాచ్‌లో భారత్ ఇంగ్లాండ్‌పై 6 వికెట్ల తేడాతో ఘనవిజయం సాధించింది.

మరోవైపు.. భారత సీనియర్ బ్యాటర్లు విరాట్ కోహ్లీ, రోహిత్ శర్మలకు ఈ ర్యాంకింగ్స్‌లో నిరాశే ఎదురైంది. మొదటి వన్డేలో విరాట్ కోహ్లీ (5 పరుగులు), రోహిత్ శర్మ (11 పరుగులు) విఫలం కావడంతో ఇద్దరూ పాయింట్లు కోల్పోయారు. కోహ్లీ 11 పాయింట్లు నష్టపోయి 757 పాయింట్లతో మూడో స్థానంలో నిలవగా, రోహిత్ శర్మ 10 పాయింట్లు కోల్పోయి 744 పాయింట్లతో నాలుగో స్థానానికి పరిమితమయ్యాడు. ఇంగ్లాండ్ బ్యాటర్ జో రూట్ అజేయ అర్ధసెంచరీతో రాణించి ఉమ్మడిగా 12వ స్థానానికి చేరుకోగా, భారత వికెట్ కీపర్ బ్యాటర్ కేఎల్ రాహుల్ కూడా అదే స్థానంలో కొనసాగుతున్నాడు.

భారత ఆల్‌రౌండర్ అక్షర్ పటేల్ ఈ మ్యాచ్‌లో అద్భుత ప్రదర్శనతో మ్యాన్ ఆఫ్ ది మ్యాచ్‌గా నిలిచి ర్యాంకింగ్స్‌లో భారీ లాభం పొందాడు. బంతితో 4 వికెట్లు తీసి, బ్యాట్‌తో అజేయంగా 57 పరుగులు చేసిన అక్షర్, బ్యాటింగ్ ర్యాంకింగ్స్‌లో 73వ స్థానానికి, బౌలింగ్‌లో 42వ స్థానానికి చేరుకున్నాడు. అలాగే, ఆల్‌రౌండర్ల జాబితాలో టాప్-10లోకి దూసుకెళ్లి 9వ స్థానాన్ని దక్కించుకున్నాడు. అక్షర్‌తో కలిసి 102 పరుగుల భాగస్వామ్యం నెలకొల్పి అర్ధసెంచరీ చేసిన వాషింగ్టన్ సుందర్ కూడా బ్యాటింగ్, ఆల్‌రౌండర్ విభాగాల్లో ముందంజ వేశాడు. ప్రస్తుతం ఆఫ్ఘనిస్తాన్ ఆటగాడు అజ్మతుల్లా ఒమర్జాయ్ నంబర్ వన్ వన్డే ఆల్‌రౌండర్‌గా, రషీద్ ఖాన్ నంబర్ వన్ వన్డే బౌలర్‌గా కొనసాగుతున్నారు. సుదీర్ఘ విరామం తర్వాత వన్డేల్లోకి పునరాగమనం చేసిన టీమిండియా స్టార్ పేసర్ జస్ప్రీత్ బుమ్రా బౌలింగ్ ర్యాంకింగ్స్‌లో 24వ స్థానానికి చేరుకున్నాడు.