ఖమ్మం జిల్లాలో బీఆర్ఎస్లోకి వివిధ రాజకీయ పార్టీలు, ప్రజా సంఘాల నాయకులు, కార్యకర్తల వలసలు కొనసాగుతున్నాయి. తెలుగుదేశం పార్టీ రాష్ట్ర ప్రధాన కార్యదర్శి, ఖమ్మం కమ్మ మహాజన సంఘం జిల్లా కార్యదర్శి తాళ్లూరి జీవన్ కుమార్ శనివారం రవాణా శాఖ మంత్రి పువ్వాడ అజయ్ కుమార్, ఎమ్మెల్సీ తాతా మధుసూధన్, ఎమ్మెల్యే సండ్ర వెంకట వీరయ్య సమక్షంలో బీఆర్ఎస్ పార్టీలో చేరారు. ఖమ్మం మత్స్యకార సహకార సంఘం సభ్యుడు సింగు శ్రీనివాస్తో పాటు 100 కుటుంబాలు జిల్లా పార్టీ కార్యాలయంలో బీఆర్ఎస్ పార్టీలో చేరారు. అదేవిధంగా కేసీఆర్ టవర్స్ ప్రాంతానికి చెందిన 30 కుటుంబాలు నేలమర్రి రామారావు ఆధ్వర్యంలో కాంగ్రెస్ నుంచి బీఆర్ఎస్లో చేరారు.
Also Read : Garba events: గర్బా వేడుకల్లో విషాదం.. గుండెపోటుతో 24 గంటల్లో 10 మంది మృతి
కాంగ్రెస్లో చేరినట్లు కాంగ్రెస్ నాయకులు చెబుతున్న బీఆర్ఎస్ 31వ మున్సిపల్ డివిజన్ ప్రధాన కార్యదర్శి వెలంపల్లి వెంకట సుబ్బారావు జిల్లా బీఆర్ఎస్ పార్టీ కార్యాలయంలో అజయ్కుమార్ సమక్షంలో తిరిగి బీఆర్ఎస్లోకి వచ్చారు. కాంగ్రెస్ నేతలు తనను బలవంతంగా పార్టీ కండువా కప్పి, ఫొటోలు తీసి సోషల్ మీడియాలో ప్రచారం చేశారని సుబ్బారావు పేర్కొన్నారు. తాను ఎప్పుడూ బీఆర్ఎస్తోనే ఉంటానని, వేరే పార్టీలోకి వెళ్లాల్సిన అవసరం లేదని స్పష్టం చేశారు. కాంగ్రెస్ నేత తుమ్మల నాగేశ్వరరావుకు సంఘీభావం తెలిపినట్లు కాంగ్రెస్ నేత చేసిన వ్యాఖ్యలను బీఆర్ఎస్ సానుభూతిపరుడు, ప్రముఖ కాంట్రాక్టర్ గరికపాటి వెంకటేశ్వరరావు అలియాస్ ఆర్టీసీ వెంకటేశ్వరరావు ఖండించారు. తాను ఎప్పుడూ మంత్రి అజయ్కుమార్తోనే ఉంటానని, అలాగే ఉంటానని ఆయన చెప్పారు. బీఆర్ఎస్ ఖమ్మం పార్లమెంటరీ నియోజకవర్గ సమన్వయకర్త గుండాల కృష్ణ, డీసీసీబీ చైర్మన్ కె.నాగభూషణం, బీఆర్ఎస్ పట్టణ అధ్యక్షుడు పి.నాగరాజు తదితరులు పాల్గొన్నారు.
