Donkey Wedding: వర్షాలు కురవాలని గాడిదలకు ఘనంగా పెళ్లి.. కళ్యాణదుర్గంలో వినూత్న సంప్రదాయం!

Donkey Wedding Held in Kurlapalli Village for Rainfall: అనంతపురం జిల్లా కళ్యాణదుర్గం మండలంలోని కుర్లపల్లి గ్రామంలో వర్షాలు సమృద్ధిగా కురవాలని కోరుతూ గ్రామస్థులు వినూత్నంగా గాడిదలకు వివాహం జరిపించారు. చాలా కాలంగా సరైన వర్షాలు లేక రైతులు ఇబ్బందులు ఎదుర్కొంటున్న నేపథ్యంలో.. ప్రకృతి కరుణించాలని ఆకాంక్షిస్తూ ఈ వివాహ తంతు జరిపించారు. హిందూ సంప్రదాయాల ప్రకారం అన్ని శాస్త్రోక్త విధానాలను పాటిస్తూ గాడిదలకు వివాహ వేడుక నిర్వహించడం స్థానికంగా ఆసక్తికరంగా మారింది.

గాడిదల వివాహ కార్యక్రమంలో గ్రామ పెద్దలు, మహిళలు, యువకులు పెద్ద సంఖ్యలో పాల్గొన్నారు. వధూవరులుగా అలంకరించిన రెండు గాడిదలకు మంగళసూత్రం కట్టి, తలంబ్రాలు పోసి, హారతులు ఇచ్చి, ఆశీర్వదిస్తూ వివాహ వేడుకను ఘనంగా నిర్వహించారు. గ్రామంలో పండుగ వాతావరణం నెలకొనగా.. ఈ విశేష కార్యక్రమాన్ని చూసేందుకు చుట్టుపక్కల గ్రామాల ప్రజలు కూడా తరలివచ్చారు. గ్రామంలో నెలకొన్న వర్షాభావం తొలగి.. చెరువులు, కుంటలు నీటితో నిండిపోవాలని, పంటలు సమృద్ధిగా పండాలని కోరుకుంటూ ఈ కార్యక్రమాన్ని నిర్వహించినట్లు గ్రామస్థులు తెలిపారు.

ప్రకృతి అనుగ్రహం కోసం భక్తి, విశ్వాసాలతో ఈ సంప్రదాయాన్ని తరతరాలుగా కొనసాగిస్తున్నామని కుర్లపల్లి గ్రామ ప్రజలు చెప్పారు. ఇలాంటి ఆచారాలు గ్రామీణ ప్రాంతాల్లో పూర్వకాలం నుంచే కొనసాగుతున్నాయని అక్కడి పెద్దలు గుర్తు చేశారు. వర్షదేవత ప్రసన్నమై మంచి వర్షాలు కురిపిస్తారని విశ్వసిస్తూ ప్రతి ఏడాది అవసరమైతే ఇలాంటి సంప్రదాయ కార్యక్రమాలను నిర్వహిస్తామని తెలిపారు. ఆధునిక కాలంలోనూ గ్రామీణ సంస్కృతి, స్థానిక విశ్వాసాలకు ప్రతీకగా నిలిచే ఈ గాడిదల వివాహం ప్రస్తుతం సోషల్ మీడియాలో చర్చనీయాంశంగా మారింది.