Colombia Earthquake : కొలంబియాలో భారీ భూకంపం.. 47 మంది మృతి, కూలిన భవనాలు.!

పశ్చిమ కొలంబియాలో సోమవారం సంభవించిన భారీ భూకంపం తీరని విషాదాన్ని నింపింది. రిక్టర్ స్కేలుపై 7.4 తీవ్రతతో వచ్చిన ఈ భూకంపం ధాటికి కనీసం 47 మంది ప్రాణాలు కోల్పోయారని అసోసియేటెడ్ ప్రెస్ (AP) నివేదించింది. భూకంప ప్రకంపనల తీవ్రతకు పదుల సంఖ్యలో భవనాలు నేలమట్టమయ్యాయి. శిథిలాల కింద అనేకమంది చిక్కుకుపోగా, వేలాది మంది ప్రజలు భయంతో ఇళ్లను వదిలి వీధుల్లోకి పరుగులు తీశారు.

శాన్ జోస్ డెల్ పాల్మర్ కేంద్రంగా భూకంపం

రాజధాని బొగోటాకు పశ్చిమాన 400 కిలోమీటర్ల దూరంలో ఉన్న చోకో ప్రాంతంలోని శాన్ జోస్ డెల్ పాల్మర్ (సుమారు 4,800 మంది జనాభా ఉన్న ప్రాంతం) వద్ద భూకంప కేంద్రం నమోదైనట్లు అధికారులు గుర్తించారు. భూకంపం భూమికి 107 కిలోమీటర్ల లోతులో సంభవించినట్లు యూఎస్ జియోలాజికల్ సర్వే (USGS) వెల్లడించింది. ఈ ప్రకంపనల తీవ్రత పొరుగున ఉన్న ఈక్వెడార్ దేశంలో కూడా స్పష్టంగా కనిపించింది. కొలంబియాలోని పెరీరా నగరంలోనే అత్యధికంగా 18 మంది మరణించారని మేయర్ మౌరిసియో సలాజర్ తెలిపారు. ప్రస్తుతం అక్కడి పరిస్థితి అత్యంత క్లిష్టంగా ఉందని ఆయన పేర్కొన్నారు.

కూలిన చర్చి టవర్, 6 విమానాశ్రయాల్లో నిలిచిన సేవలు

భూకంప తీవ్రతకు పెరీరా, కాళీ, క్విబ్డో నగరాల్లో అనేక ఇళ్లు, చిన్న భవనాలు కూలిపోయిన దృశ్యాలు స్థానిక మీడియాలో బయటకు వచ్చాయి. మానిజాలెస్ నగరంలో ఉన్న ఒక చారిత్రాత్మక నియో-గోథిక్ కేథడ్రల్ టవర్ తీవ్రంగా దెబ్బతిని కూలిపోయింది. మరోవైపు, భూకంపం కారణంగా పశ్చిమ కొలంబియాలోని పెరీరా, మానిజాలెస్, క్విబ్డో, అర్మేనియా, కార్టాగో, బ్యూనవెంచురా నగరాలకు సేవలుందించే 6 విమానాశ్రయాలు దెబ్బతిన్నాయని, వాటి కార్యకలాపాలను తాత్కాలికంగా నిలిపివేసినట్లు పౌర విమానయాన సంస్థ ఎక్స్ (X) వేదికగా వెల్లడించింది.

రంగంలోకి ప్రభుత్వం

ఈ పీడకల నుంచి తేరుకునేందుకు కొలంబియా ప్రభుత్వం తక్షణ సహాయక చర్యలను చేపట్టింది. నూతనంగా బాధ్యతలు స్వీకరించిన దేశ అధ్యక్షుడు అబెలార్డో దే లా ఎస్ప్రియెల్లా స్వయంగా శాన్ జోస్ డెల్ పాల్మర్‌లో అత్యవసర సహాయక చర్యలను పర్యవేక్షిస్తున్నారు. బాధితులకు ధైర్యం చెప్తూ.. “మీరు ఒంటరిగా లేరు, ప్రభుత్వం మీకు అండగా ఉంది, తక్షణ చర్యలు తీసుకుంటోంది” అని ఆయన వ్యాఖ్యానించారు. కొలంబియాలో చిన్నపాటి భూకంపాలు సాధారణమే అయినప్పటికీ, 6.0 కంటే ఎక్కువ తీవ్రతతో వచ్చే భూకంపాలు చాలా అరుదని నిపుణులు చెప్తున్నారు.