Bengaluru Cafe Blast Case: రామేశ్వరం కేఫ్ పేలుడు కేసులో నిందితుడిని జాతీయ దర్యాప్తు సంస్థ (ఎన్ఐఏ) గుర్తించింది. నిందితుడు ఈ ఏడాది జనవరిలో చెన్నైలో నివసించినట్లు కూడా గుర్తించారు. నిందితుడిని ముస్సావిర్ హుస్సేన్ షాజిబ్గా గుర్తించినట్లు వారు తెలిపారు. అనుమానితుడు కర్ణాటకలోని తీర్థహళ్లి జిల్లా శివమొగ్గకు చెందినవాడని కూడా ఎన్ఐఏ వెల్లడించింది. ఈ కేసు దర్యాప్తులో భాగంగా ఎన్ఐఏ పరిసరాల్లోని 1,000 కంటే ఎక్కువ సీసీటీవీ కెమెరాలను పరిశీలించింది. నిందితుడు ధరించిన టోపీని వివిధ సీసీటీవీ వీడియోల్లో గుర్తించిన తర్వాత ఎన్ఐఏ ఈ విషయాలను వెల్లడించింది, ఈ టోపీని చెన్నై మాల్ నుంచి కొనుగోలు చేశాడని, నిందితుడు నెల రోజులకు పైగా చెన్నైలో నివాసం ఉన్నాడని తెలిపింది.
షాజిబ్ సహచరులలో ఒకరిని కూడా తీర్థహళ్లికి చెందిన అబ్దుల్ మతీన్ తాహాగా యాంటీ టెర్రర్ ఏజెన్సీ గుర్తించింది. తమిళనాడు పోలీసు ఇన్స్పెక్టర్ కె విల్సన్ హత్య కేసులో తాహాకు సంబంధం ఉంది. ప్రధాన నిందితుడితో పాటు చెన్నైలో ఉన్నాడు. తాహా కూడా శివమొగ్గలోని ఐఎస్ఐఎస్ మాడ్యూల్లో భాగమని ఎన్ఐఏ వర్గాలు తెలిపాయి. గతంలో అరెస్టయిన మాడ్యూల్ సభ్యులు కూడా ఇదే విషయాన్ని ధృవీకరించారు. పేలుడుకు ఒకరోజు ముందు కేఫ్లో రెక్సీ నిర్వహించిన సీసీటీవీ ఫుటేజీలో తాహా కూడా కనిపించాడు.
Read Also: Sukesh Chandrashekhar: ‘తీహార్ జైలుకు స్వాగతం’ అంటూ కేజ్రీవాల్కు సుకేష్ సందేశం
NIA టోపీ ద్వారా నిందితుడిని ఎలా గుర్తించిందంటే?
నేషనల్ ఇన్వెస్టిగేషన్ ఏజెన్సీ ప్రకారం, తాహా ఎప్పుడూ ట్రిప్లికేన్లో ఉన్నప్పుడు కొనుగోలు చేసిన టోపీని ధరించేవాడు. పేలుడు జరిగిన రోజున అనుమానిత బాంబర్ షాజిబ్ అదే క్యాప్ ధరించి కనిపించాడు. ఈ క్యాప్లు పరిమిత ఎడిషన్ సిరీస్ అని, 400 క్యాప్లు మాత్రమే అమ్ముడయ్యాయని యాంటీ-టెర్రర్ ఏజెన్సీ కనుగొంది. సీసీటీవీ ఫుటేజీలో, చెన్నై మాల్ నుంచి తాహా క్యాప్ కొనుగోలు చేస్తున్నట్లు NIA అధికారులు గుర్తించారు. పేలుడు తరువాత, అనుమానితుడు కేఫ్ నుంచి కొంత దూరంలో టోపీని పడేశాడు. విచారణలో, క్యాప్ జనవరి చివరిలో మాల్ నుంచి కొనుగోలు చేసినట్లు తేలింది. టోపీలో వెంట్రుకలు కనిపించాయని, దానిని ఫోరెన్సిక్కు పంపామని ఎన్ఐఏ వర్గాలు తెలిపాయి. ప్రధాన అనుమానితుడు షాజిబ్ తల్లిదండ్రుల డీఎన్ఏ నమూనాలతో సరిపోలినట్లు నివేదిక నిర్ధారించింది. ఆ తర్వాత షాజిబ్ తల్లిదండ్రులు అతని సీసీటీవీ ఫుటేజీని చూసి, కనిపించిన వ్యక్తి అతని కుమారుడేనని నిర్ధారించారు. షాజిబ్ చెన్నై నుంచి వచ్చి బెంగళూరు కేఫ్లో పేలుడు పదార్ధం పెట్టాడా అనే కోణంలో ఇప్పుడు ఎన్ఐఏ దర్యాప్తు చేస్తోంది. అనుమానితుడు చివరిసారిగా ఆంధ్రప్రదేశ్లోని నెల్లూరులో కనిపించాడని ఏజెన్సీ తెలిపింది.మార్చి 1న బెంగళూరులోని ప్రముఖ కేఫ్లో తక్కువ తీవ్రతతో జరిగిన పేలుడులో పది మంది గాయపడ్డారు. టైమర్ని ఉపయోగించి IED బాంబును ప్రేరేపించడం ద్వారా పేలుడు జరిగింది.