డైరెక్టర్ రాంగోపాల్ వర్మ అరెస్టుకు రంగం సిద్ధమైంది. మరోసారి ప్రకాశం జిల్లా పోలీసులకు ఆర్జీవీ హ్యాండ్ ఇచ్చారు. ఇవాళ ఒంగోలు రూరల్ సర్కిల్ కార్యాలయంలో విచారణకు హాజరు కావాల్సిన ఆయన డుమ్మా కొట్టారు. విచారణకు హాజరుకాలేనని పోలీసులకు సమాచారం ఇచ్చారు. విచారణకు ఆర్జీవీ హాజరుకాకుంటే.. ఆయనను అరెస్ట్ చేసేందుకు హైదరాబాద్లోని వర్మ నివాసానికి ఇప్పటికే జిల్లా పోలీసులు చేరుకున్నారు.
ఈనెల 19న విచారణకి హాజరు కాకుండా డైరెక్టర్ రాంగోపాల్ వర్మ వారం రోజులు గడువు కోరటంతో.. ఆయన విజ్ఞప్తి మేరకు ఇవాళ హాజరు కావాలని 20వ తేదీన పోలీసులు మరోసారి నోటీసు ఇచ్చారు. ఆర్జీవీని విచారించేందుకు ఒంగోలు రూరల్ సర్కిల్ కార్యాలయంలో అన్నీ ఏర్పాట్లు చేశారు. తీరా అయన విచారణకు హాజరుకానని చెప్పడంతో.. అరెస్టుకు రంగం సిద్ధం చేశారు. హైదరాబాద్లోని రాంగోపాల్ వర్మ ఇంటికి ఒంగోలు పోలీసులు ఇప్పటికే చేరుకున్నారు. సీఎం చంద్రబాబు నాయుడు, డిప్యూటీ సీఎం పవన్ కళ్యాణ్, మంత్రి నారా లోకేష్ ఫోటోలు మార్ఫింగ్ చేసి.. ఎక్స్ (ట్విట్టర్)లో పోస్ట్ చేసిన కేసులో వర్మ విచారణ ఎదుర్కొంటున్నారు. అయితే రాంగోపాల్ వర్మ వ్యవహారంపై జిల్లా పోలీసుల సీరియస్గా ఉన్నారు.
