Shaik Mastan Vali: వైఎస్ఆర్ కలను నిజం చేయటానికి షర్మిల కాంగ్రెస్ పార్టీలో చేరారు!

దివంగత నేత, మాజీ సీఎం వైఎస్ రాజశేఖర్ రెడ్డి కలను నిజం చేయటానికి వైఎస్ షర్మిల కాంగ్రెస్ పార్టీలో చేరారు అని పీసీసీ వర్కింగ్ ప్రెసిడెంట్ షేక్ మస్తాన్ వలీ అన్నారు. షర్మిల కాంగ్రెస్ పార్టీలో చేరడంతో కొన్ని పార్టీల్లో భయం పట్టుకుందని విమర్శించారు. వైసీపీలో 2019కి ముందు రాజశేఖర్ రెడ్డి బొమ్మ ఎక్కడ ఉంది?, ఇప్పుడు ఎక్కడ పెట్టారు అని ప్రశ్నించారు. వైసీపీ మోసపూరిత వైఖరి నచ్చకనే షర్మిల ఆ పార్టీకి దూరమయ్యారని మస్తాన్ వలీ పేర్కొన్నారు.

పీసీసీ వర్కింగ్ ప్రెసిడెంట్ షేక్ మస్తాన్ వలీ ఆదివారం గుంటూరులో మీడియాతో మాట్లాడుతూ… ‘వైఎస్ షర్మిల కాంగ్రెస్ పార్టీలో చేరడంతో కొన్ని పార్టీల్లో భయం పట్టుకుంది. రాజశేఖర్ రెడ్డి కుమార్తె షర్మిల అనే విషయం సజ్జల రామకృష్ణారెడ్డి మరిచిపోయారు. వైసీపీలో 2019కి ముందు రాజశేఖర్ రెడ్డి బొమ్మ ఎక్కడ ఉంది?, ఇప్పుడు ఎక్కడ పెట్టారు. వైసీపీ మోసపూరిత వైఖరి నచ్చకనే షర్మిల ఆ పార్టీకి దూరమయ్యారు. వివేకానంద రెడ్డి హత్యను అడ్డుపెట్టుకుని గత ఎన్నికల్లో ఓట్లు దోచుకున్నారు. వైసీపీ అధికారంలో ఉన్న ఈ ఐదేళ్లలో వివేక హత్య కేసు నిందితులను ఎందుకు పట్టుకోలేదు?’ అని ప్రశ్నించారు.

Also Read: Kakani Govardhan Reddy: దళితులంటే ముందునుంచి చంద్రబాబుకు చిన్న చూపే: మంత్రి కాకాని

‘సీఎం జగన్ ప్రధాని మోడీకి పూర్తిగా లొంగిపోయారు. మోడీ దగ్గర జగన్ బానిస బతుకుతున్నారు. రాజశేఖర్ రెడ్డి కలను నిజం చేయటానికి షర్మిల కాంగ్రెస్ పార్టీలో చేరారు. రాజశేఖర్ రెడ్డి మరణంపై సజ్జల రామకృష్ణారెడ్డి అనుమానాలు ఉన్నాయన్నారు. ఈ ఐదేళ్లలో అధికారంలో ఉండి ఎందుకు స్పందించలేదు. వైఎస్ఆర్ మరణంపై విచారణకై ఎందుకు డిమాండ్ చేయలేదు. కేవలం రాజకీయాల కోసం మళ్లీ ఇప్పుడు వైఎస్ఆర్ మరణాన్ని తెరపైకి తెచ్చారు’ అని పీసీసీ వర్కింగ్ ప్రెసిడెంట్ షేక్ మస్తాన్ వలీ పేర్కొన్నారు.